Lipalo 11
11
Sibaka se si bizwa Tabeera
1Batu ba kala ku tongoka ku Muñ'a Bupilo ka za bumai bwa bona. Muñ'a Bupilo h'a utwa cwalo, a nyema, mi a lumela mulilo kwa batu. Wa tumbuka mwahal'a bona, mi wa cisa neku le liñwi la mafulo. 2Batu ba itilelela ku kupa tuso ku Mushe. Yena a lapela ku Muñ'a Bupilo, mi mulilo wa tima. 3Cwale sibaka seo sa bizwa Tabeera, kakuli mulilo wa Muñ'a Bupilo n'o tukezi mwahal'a bona.
Mushe u keta baeteleli ba mashumi a supile
4Sitopa sa balicaba ba ba ne ba zamaya ni Maisilaele ne ba na ni takazo ye tuna hahulu ya nama, mane nihaili bona Maisilaele kasibili ba kala ku bilaela, ba li, “Kambe ne lu ka fumana nama! 5Mwa Egepita ne lu icela litapi, lu sa li leki. A mu hupuli mawakalala, mahapu, nyanisi ye kima ni ye sisani, ze ne lu na ni zona! 6Kono cwale maata a luna s'a felile. Ha ku na ni se sikana sa ku ca. Ha ku na haisi ona manna feela, ka zazi ni zazi.”
7 #
Mut 16.31
Manna n'a swana ni lipeu ze sisani, za mubala o musweu. 8Batu ba ba ne ba y'o a nopanga ne ba a sila kamba ku a sita bupi, mi cwale ne b'a apeha, ni ku a eza mañende. Mwa hanu n'a utwahala sina bupi bwa buloto bo bu lubilwe ka mafula a olive. 9#Mut 16.13-15 Manna n'a welanga mwa mafulo busihu, hamoho ni puka.
10Mushe a utwa batu kaufela ha ba tongoka ba nze ba yemi ka litopa-topa kwa minyako ya litende za bona. Muñ'a Bupilo a ba nyemela. Mushe a swaba hahulu. 11A li ku Muñ'a Bupilo, “Kiñi ha u ni ezize maswe cwalo? Kikabakalañi ha u sa ni tabeli? U ni feziñi buikalabelo bwa ku zamaisa batu ba kamukana? 12Ha ni si ka ba bupa kamba ku ba pepa! U ni ezezañi muleli wa bona? U ni lwalisezañi bona mwa mazoho a ka sina limbututu mwa nzila kaufela, mane ku y'o fita mwa naha y'o sepisize bo kukw'a bona? 13Ne ni ka fumana kai nama ye n'e ka likana batu ba kaufela? Ba tundamezi ku itilelela ni ku kupa nama. 14Ha ni koni ku babalela batu ba kamukana ni li nosi. Na palelwa luli! 15Haiba u ka ni eza cwalo, u ni utwele butuku, mi u ni bulaye, kuli ni si ke na nyanda cwalo!”
16Muñ'a Bupilo a li ku Mushe, “U kopanye batu ba mashumi a supile ba ba zibahala kuli ki baeteleli ba sicaba, u ba tise ku na kwa Tende ya Kopano, mi u ba bulelele kuli ba yeme hona fo, kwatuko a hao. 17Ni ta shetumuka ni t'o bulela ni wena hona koo, mi ni ta nga kwa moya o ni ku file, ni ba fe ona. Cwale ba ta ku tusa kwa ku zamaisa batu ba, mi ha u sa na ku imelwa u li nosi. 18Cwale u bulelele batu, u li, ‘Mu ikeniseze la kamuso. Mu ta fumana nama ya ku ca. Muñ'a Bupilo u utwile pilaelo ya mina ya kuli mu shukezi ku fumana nama, ni kuli ne mu pila hande mwa Egepita. Cwale Muñ'a Bupilo u ta mi fa nama, mi mu ta i ca. 19Mu ta i ca isiñi feela ka zazi li li liñwi, kamba a mabeli, a ketalizoho, a lishumi kamba mane a mashumi a mabeli, batili. 20Mu ta i ca kweli mutumbi, ku fitela mane i mi nyikwe. Se, si ta ezahala cwalo kakuli mu hanile Muñ'a Bupilo, ya li teñi mwahal'a mina, mi mu tongokile kuli kabe mu si ka zwa mwa Egepita ni kamuta!’ ”
21Mushe a li ku Muñ'a Bupilo, “Ki na yo, ni etelezi batu ba ba eza likiti ze mianda ye silezi mi u li u ta ba fa nama ye ta ba likana kweli mutumbi? 22Ku ta bulaiwa likomu ni lingu ze ta ba likana, nji? Kana litapi ze mwa liwate kaufela za ba likana, naa?”
23Muñ'a Bupilo a alaba, a li, “Kana maata a ka a na ni f'a felela, nji? U tuha u bona haiba se ni bulezi si ta ezahala kamba nya!”
24Cwale Mushe a zwa, mi a y'o bulelela batu s'a n'a bulezi Muñ'a Bupilo. A kopanya baeteleli ba mashumi a supile, mi a ba beya mwa libaka ze potolohile Tende ya Kopano. 25Cwale Muñ'a Bupilo a shetumuka mwa lilu, mi a t'o bulela ni Mushe. A nga kwa moya w'a n'a mu file, mi a u fa baeteleli ba mashumi a supile. Moya wo ha u t'o fita ku bona, ba kala ku huwa inge ba ba takani, kono ba kuza kapili.
26Ba babeli, kwa baeteleli bao ba mashumi a mabeli, ili bo Elidadi ni Medadi, ne ba itulezi mwa mafulo, mi ne ba si ka ya kwa Tende. Hono mo mwa mafulo, ba kenwa ki ona moya wo, mi ba huwa inge ba ba takani. 27Mucaha a mata ku y'o taluseza Mushe ze ne ba eza bo Elidadi ni Medadi.
28Cwale Joshua mwan'a Nuni, ya n'a li mutusi wa Mushe ku kala a sa li mucaha, a bulela, mi a li ku Mushe, “U ba kuzise, muñ'a ka!”
29Mushe a alaba, a li, “Kikuli u ni shwela muna, nji? Ni lakaza kuli kabe Muñ'a Bupilo n'a ka fa batu ba hae kaufela ona moya wo, mi kamukan'a bona ba bulele sina bapolofita.” 30Cwale Mushe ni baeteleli ba mashumi a supile ba Isilaele ba kutela mwa mafulo.
Makwali
31Kapili-pili Muñ'a Bupilo a fukisa moya, mi moya wo wa tisa makwali a nz'a fufela fafasi ku zwa kwa liwate. A t'o lula mwa mafulo ni kwand'a mafulo, mi a yamba sibaka seo mwa maneku kaufela. 32Cwale batu ba sebeza lizazi leo kaufela ni busihu bwa lona, mane ni ha bu sa ba nze ba swala makwali. Ne ku si na ya n'a si ka swala a mañata a n'a ka tala lizuma ze mashumi a ketalizoho. Kiha ba a yaneha mwa mafulo kaufela. 33Nama i si ka fela kale, mi ba sa na ni ye ñata ya ku ca, Muñ'a Bupilo a nyemela batu, mi a ba tizeza butuku bwa mafu a sipundumukela. 34Sibaka seo sa bizwa Mabita a Takazo, kakuli mwateñi ne ku pumbekilwe batu ba ba ne ba lakalize nama.
35Ku zwa fo, batu ba shimbulukela kwa Hazeroti, mo ba il'o tibelela.
Lozi Interconfessional Bible, Catholic Edition © Bible Society of Zambia, 2009.