Malivi 26

Limbuyoti za ku mamela Mulao

(Mul 7.12-24; 28.1-14)

1 # Mut 20.4; Malivi 19.4; Mul 5.8; 16.21-22; 27.1 Muñ'a Bupilo a li, “Mu si ke mwa eza maswaniso kamba lika ze bupilwe kapa ku betwa, ze cwaleka misumo ya macwe, kapa macwe a betilwe, kuli mu li lapele. Ki na Muñ'a Bupilo, Mulimu wa mina. 2Mu buluke la Pumulo, mi mu kuteke Tende ya ka ye Kenile. Ki na Muñ'a Bupilo.

3 # Mul 11.13-15; 28.1-14 “Mina a mu pile ka ku latelela milao ya ka ni ku utwa litaelo za ka. 4Mi cwale ni ta mi neliseza pula ka nako ya teñi, ili kuli naha i melise lico, ni kuli likota li beye miselo. 5Lico za mina li ta ba ze ñata hahulu kuli mane mu ka be mu sa kutula mabele ka nako ya ku koyaula miselo ya veine, ni ku nopa miselo ya veine ka nako ya ku cala masimu. Mu ta fumana lico ze mu tokwa kaufela, mi mu ta pila hande mwa naha ya mina.

6“Ni ta mi fa kozo mwa naha ya mina, mi mu ta pila hande mu sa sabi mutu ni yo mukana. Ni ta zwisa libatana ze maswe ze bulaya kaufela mwa naha, mi hape ha ku sa na ku ba ni ndwa mwateñi ni kamuta. 7Mu ka tula lila za mina. 8Batu baketalizoho feela ku mina ba ta kona ku tula lila ze mwanda, mi ba ku mina ba mwanda ba ta kona ku tula lila ze likiti ze lishumi. 9Ni ta mi tohonolofaza ni ku mi atisa. Ni ta buluka bulikani bo ni itamile ni mina. 10Likutulo za mina li ta ba ze ñata hahulu kuli mane li ta feza silimo, mi nihakulicwalo mu ka sulula tuku, ili ku siyela ze nca sibaka. 11Ni ta ina ni mina mwa Tende ya ka ye Kenile ye mwahal'a mina, mi ha ni na ku mi nyikwa. 12#2 Bakor 6.16 Ni ta ba Mulimu wa mina, mi mina mu ta ba batu ba ka. 13Na, Muñ'a Bupilo, Mulimu wa mina, ni mi zwisize mwa Egepita kuli mu si ke mwa ba batanga ni kamuta. Ni felisize maata a n'a mi tamile, mi ni mi lukuluzi kuli mane mu kone ku izamaela hande mu nze mu lukuluhile.”

Bumai bwa ku sa utwa milao

(Mul 28.15-68)

14 # Mul 28.15-68 Muñ'a Bupilo a li, “Haiba mu sa utwi litaelo za ka, mu ta fiwa mulatu. 15Mu si ke mwa sinya bulikani bo ne ni itamile ni mina, ka ku hana ku mamela milao ni litaelo za ka. 16Ka ku eza cwalo ni ta mi fa mulatu. Ni ta mi tiseza liziezi, fibele ni matuku a sa konwi ku alafiwa, ili a ta mi bulaya meeto ni ku mi sinyeza bupilo bwa mina. Mu ka cala lipeu za mina kono ha li na ku konda se siñwi kakuli lila za mina li ta mi tula, mi li ta ca ze mu limile. 17Ni ta mi fetuhela, ili kuli mu te mu tulwe ki lila za mina, mi mu te mu buswe ki ba ba mi toile. Mu ta saba hahulu kuli mane mu hela-hele feela niha mu sa matiswi ki batu.

18“Haiba ni mwamulaho a zeo kaufela mu sa zwelapili mu sa ni utwi, ni ta ekeza mulatu wa mina hasupile. 19Ni ta felisa mahañi ni buikuhumuso bwa mina. Ha ku na ku ba ni pula, mi naha ya mina i ta omelela hahulu ni ku ba tata sina sipi. 20Niha mu ka sebeza ka tata, ha mu na ku fumana se siñwi, kakuli naha ya mina ha i na ku melisa lico, ni likota ha li na ku beya miselo.

21“Hape, haiba mu sa zwelapili ku sa ni utwa cwalo, ni ta ekeza kwa mulatu wa mina hasupile. 22Ni ka mi lumeleza libatana ze maswe ze ka t'o bulaya bana ba mina ni ku feza likomu za mina, mi li ka siya ba sikai feela ku mina, mane linzila za mina li be li unde.

23“Kono mwendi mwamulaho a milatu ye kaufela mu sa zwelapili ku sa ni utwa, ni ku ni foseza ka likezo za mina. 24Fohe, ni ta mi fetuhela ni ku mi ekeleza hahulu mulatu hasupile ku fita pili. 25Ni ta mi tiseza ndwa ye ka t'o mi utwisa butuku kabakala ku sinya bulikani bwa luna, mi niha mu ka sabela mwa minzi ya mina, ni ta mi lumeleza matuku a sa konwi ku alafiwa kuli mane mu koze kwa lila za mina. 26Ni ta fukuza lico za mina, ili kuli mane basali ba lishumi ba kopanele fa liiso li li liñwi ku apeha buhobe bo ba na ni bona kaufela. Ba ta mi abela bona, mi ha mu se mu bu cile kamukana mu ka be mu sa lapile.

27“Hape, mwendi ni mwamulaho a zeo kaufela mu sa zwelapili ku ni foseza ni ku hana ku ni utwa. 28Cwale ka bunyemi bwa ka ni ta mi fetuhela ni ku mi ekeleza mulatu wa mina ka tata hahulu hasupile. 29Tala i ta ba ye tuna hahulu kuli mane mu be mu ce bana ba mina. 30Ni ta sinya libaka za lisebelezo za mina ze fa malundu, ni lutulule tutala twa mina twa insense, ni ku nepakela litupu za mina fa milimu ya mina ya maswaniso ye wile. Ni ka mi nyemela hahulu! 31Ni ta fetula minzi ya mina matota, ni sinye libaka za lisebelezo za mina, ni ku hana ku amuhela litabelo za mina. 32Ni ta sinya naha ya mina kamukan'a yona, ili kuli mane lila ze mwateñi li te li mbwetuke hahulu ka sinyeho yeo. 33Ni ka mi tiseza ndwa ni ku mi hasanyeza mwa linaha li sili. Naha ya mina mu ta i sabela, mi minzi ya mina i ta ba matota feela. 34Cwalehe, kihona naha i ta ikola pumulo ya lilimo ze mu si ka ipumanela zona. 35I ta ipumulela feela, mina mu nze mu li mwa butanga mwa naha ya lila za mina.

36“Ni ta kenya boi ku mina ba ba hapilwe kaufela, ili boi bo butuna hahulu kuli mane mu ta matiswa feela ki mulumo wa litali le li fefulwa ki moya. Mu ta mata sina ba ba lelekiswa ki ndwa, mi mu ta na mu wanga feela mikube-kube niha mu si ka sutelelwa ki lila za mina. 37Mu ka na mu hatikelana, mu sa lelekiswi ki mutu, mi ha mu na ku kona ku itwanela kwa lila za mina kaufela. 38Mu ta shwela mwa butanga, mu pumbekwe mwa naha ya lila za mina. 39Ki ba sikai ku mina ba ba ta banduka mwa naha ya lila za mina mo, ba ta iponela feela kabakala libi za mina ni za bo kukw'a mina.

40“Kono baikulyenu ba ta bakela libi za bona ni za bo kukw'a bona ba ba si ka ni utwa, mi ba ni fetuhela. 41Kiha ni ba nyemezi ni ku ba isa mwa butanga mwa naha ya lila za bona. Kwa mafelelezo baikulyenu ba ikokobeze, ni ku lifa mulatu wa libi ni petuhelo ya bona. 42#Sim 17.7-8; 26.3-4; 28.13-14 Mi cwale ni ta hupula bulikani bwa ka ni Jakobo, Isaka ni Abrahama, mi cwale ni ta tiisa sinca sepiso ya ka ya ku fa batu ba ka naha. 43Kono pili, naha i swanezi ku siyala feela, i si na batu, ili kuli i kone ku ikola pumula ya yona, mi bona batu ba lifelele mulatu kabakala ku hana milao ni litaelo za ka. 44Kono nihakulicwalo, ha ba sa li mwa naha ya lila za bona, ha ni na ku ba libala, kamba ku ba timeza kaufela. Kezo ye cwalo n'e ka felisa bulikani bwa ka ni bona. Mi, na, ki na Muñ'a Bupilo, Mulimu wa bona. 45Ni ta tiisa sinca bulikani bo ni itamile ni bo kukw'a bona, ha ni bonisa macaba kaufela maata a ka, ka ku zwisa batu ba ka mwa Egepita, ili kuli na, Muñ'a Bupilo, ni be Mulimu wa bona.”

46Yeo kaufela ki yona milao ni litaelo za batu ba Isilaele z'a n'a filwe Mushe ki Muñ'a Bupilo fa Lilundu la Sinai.

Currently Selected:

Malivi 26: Lozi09

Highlight

Copy

Compare