Malivi 27
27
Milao bakeñisa limpo za Muñ'a Bupilo
1Muñ'a Bupilo a fa Mushe milao. 2Mushe n'a na ni ku bulelela Maisilaele milao ye tatama, kuli, “Mutu h'a filwe Muñ'a Bupilo ka mukwa wa ku taleleza buitamo bo buñwi, mutu yo, u ta lukululwa ka litifo zeo ze tatama ka ku latelela tifo ye tomilwe.
3Mutu wa munna ya sa hulile, wa
lilimo ze mashumi a mabeli ku isa
ku ze mashumi a silezi, tifo
ya hae ki mashumi a ketalizoho
a muwaya-waya wa silivela.
4Musali yo muhulu, tifo ya hae ki
mashumi a malalu
a muwaya-waya wa silivela.
5Mushimani wa lilimo ze kalela ka
ze ketalizoho ku isa ku ze mashumi
a mabeli, tifo ya hae ki
mashumi a mabeli
a muwaya-waya wa silivela.
Musizana, yena, tifo ya hae ki
lishumi feela la muwaya-waya wa
silivela.
6Mbututu wa mushimani wa lilimo ze
si ka fita kale ku ze ketalizoho, yena tifo ya
hae ki butanu feela
bwa muwaya-waya wa silivela.
Mbututu wa musizana, yena, tifo ya
hae ki lisilivela ze talu.
7Munna ya fitelela lilimo ze mashumi a silezi, tifo
ya hae ki lisilivela ze lishumi ka ze ketalizoho.
Musali ya fitelela lilimo ze mashumi a silezi, tifo
ya hae ki lisilivela ze lishumi.
8“Haiba mutu yo, ya ezize buitamo, a li mubotana hahulu mi a palelwa ku lifa tifo ye tomilwe, u ka tisa mutu yo ku muprisita, mi yena muprisita u ta fukuza kwa teko ka mw'a ta bonela kuli ki yona tifo ya ta kona ku lifa mubotana yo.
9“Buitamo bo bwa folofolo ye lumelelwa ku ba mpo ya Muñ'a Bupilo bu eza folofolo yeo ku ba ye kenile. 10Mi ni yena mutu ya ezize buitamo bo a si ke a yolisa ye ñwi mwa sibaka sa ya pili. Haiba a eza cwalo, bubeli bwa zona lifolofolo zeo li ta ba za Muñ'a Bupilo. 11Kono haiba buitamo bo ki bwa folofolo ye silafezi, ye sa lumelelwi ku ezezwa Muñ'a Bupilo sitabelo, mutu yo u ta isa folofolo yeo ku muprisita. 12Muprisita u ta toma teko ya yona ka ku latelela mo i inezi, i be ye nde kamba ye maswe, mi teko yeo ye ka tomwa i ta ba yona ya mafelelezo. 13Haiba mutu yo a lata ku i kutisa, u na ni ku lifa mali a tomilwe ni ku ekeza fateñi kalulo ya buketalizoho ya teko yeo.
14“Mutu h'a fa ndu ya hae ku Muñ'a Bupilo, muprisita ki yena ya ta toma teko ya yona ka mo i inezi, ili bunde kamba bumaswe bwa yona, mi teko yeo i ta ba yona ya mafelelezo. 15Haiba muñ'a yona ya n'a fanile ndu yeo, a lakaza ku i liulula, u swanezi ku lifa teko ya yona ni ñambeko ya kalulo ya buketalizoho.
16“Haiba mutu a fa kalulo ye ñwi ya simu ya hae ku Muñ'a Bupilo, teko ya yona i ka tomwa ka ku likanyeza buñata bwa peu ye calwa mwateñi, ili lishumi la muwaya-waya wa silivela fa sizuma sa mabele. 17Haiba a fa simu yeo ku Muñ'a Bupilo kapili-pili, silimo sa Jubile si sa z'o fela feela, fo i ta lekwa ka teko ye tezi. 18Haiba a i fana ka nako ye ñwi feela mwamulaho, muprisita u ta likanya teko ya yona ka ku latelela palo ya lilimo ze siyezi ku isa fa silimo sa Jubile ye tatama, mi cwale u ka toma teko ye kutisizwe mwa mulaho. 19Haiba mutu n'a file Muñ'a Bupilo simu ya hae, mi cwale a lakaza ku i kutisa, u swanezi ku lifa teko ya yona ni ku ekeza ku yona kalulo ya buketalizoho ya teko yeo. 20Haiba a lekisa simu yeo ku yo muñwi, yena a si ka i lukulula ku Muñ'a Bupilo, h'a sa na ku ba ni tukelo ya ku i leka hape. 21Ka silimo sa Jubile ye tatama, simu yeo i ta ba ya Muñ'a Bupilo kuya kuile. I ta ba ya baprisita.
22“Mutu wa kona ku fa Muñ'a Bupilo simu y'a itekezi. 23Muprisita u ta likanyeza teko ya yona ka ku ya ka lilimo ze siyezi ku isa fa silimo sa Jubile ye tatama, mi mutu yo u swanezi ku lifa teko ya yona ka lona lizazi leo. Mali ao ki a Muñ'a Bupilo. 24Ka silimo sa Jubile simu yeo i ta kutisezwa ku muñ'a yona kamba kwa baikulyaye.
25“Liteko kaufela li lukela ku tomwa ka ku latelela teko ye tomilwe ki mulao.
26“Ha ku na mutu ya ta zwisa folofolo ya maizibulo ku i fa Muñ'a Bupilo ka tato ya hae, kakuli n'e s'e li ya Muñ'a Bupilo ni kale. Namani, ngunyana kamba pulinyana, zeo kaufela ki za Muñ'a Bupilo. 27Kono folofolo ya maizibulo ye si ka kena ya kona ku kutiswa ka ku i lekulula, ka teko ye tomilwe ni ku ekeza ku yona kalulo ya buketalizoho ya teko yeo. Ha i sa lekululwi ki muñ'a yona, i lekiswe ku mañi ni mañi ka teko ye tomilwe.
28 #
Lipa 18.14
“Ha ku na mutu ya ka lekisa kamba ku lekulula z'a n'a fungulezi Muñ'a Bupilo, i ka ba mutu, folofolo kamba simu. Ki ya Muñ'a Bupilo kuya kuile. 29Niha i ka ba mutu ya n'a fungulezwi ki Muñ'a Bupilo, h'a na ku lekululwa. U ta bulaiwa.
30 #
Lipa 18.21; Mul 14.22-29 “Kalulo ya bulishumi ya lico za mwa masimu kamukana, i ka ba bubeke kamba miselo, kaufela ki za Muñ'a Bupilo. 31Haiba mutu a lakaza ku lekulula ye ñwi ya zona, u swanezi ku lifa teko ye tomilwe ni ku ekeza ku yona kalulo ya buketalizoho ya teko yeo. 32Ye ñwi ni ye ñwi ya limunanu ze lishumi ki ya Muñ'a Bupilo. Limunanu ha li balwa, ya bulishumi kaufela ki ya Muñ'a Bupilo. 33Muñ'a zona a si ke a ketela Muñ'a Bupilo ze maswe kamba ku zwisa ye nde ni ku yolisa mwateñi ye maswe. Haiba a ka eza cwalo, bubeli bwa zona limunanu zeo li ta ba za Muñ'a Bupilo, mi ha li sa na ku lekululwa hape.”
34Ze ki zona litaelo za batu ba Isilaele z'a n'a filwe Mushe ki Muñ'a Bupilo fa Lilundu la Sinai.
Currently Selected:
Malivi 27: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
