Malivi 15

Milao bakeñisa mishamo ni ze ñwi

1Muñ'a Bupilo a fa Mushe ni Aruni milao ye tatama. 2Ne ba na ni ku bulelela kwa batu ba Isilaele kuli, “Munna kaufela ya kula sooya u silafezi. 3Ku silafala kwa hae ka sooya ki cwana. Mubili wa hae niha u zwetisa sooya, kamba u si tibela, yena u silafezi. 4Mumbeta kaufela f'a ta ina kamba ku lobala, ni ona u silafezi. 5Ya swala mumbeta wa hae kamukana, u swanezi ku tapisa liapalo za hae ni ku tapa fa mubili, mi u ta ina cwalo a nz'a silafezi ku fitela manzibwana. 6Ya swala sika sifi ni sifi s'a n'a inzi, u swanezi ku tapisa liapalo za hae ni ku tapa fa mubili, mi u ta ina cwalo a nz'a silafezi ku fitela manzibwana. 7Mutu kamukana ya ta swala munna ya na ni sooya, u swanezi ku tapisa liapalo za hae ni ku tapa fa mubili, mi u ta silafala cwalo ku fitela manzibwana. 8Haiba yena munna yo ya kula sooya a kwela mutu ya kenile mati, yo ya kwezwi mati u lukela ku tapa ni ku tapisa liapalo za hae, mi u ta ina cwalo a silafezi ku fitela manzibwana. 9Sipula sifi ni sifi, kamba pate f'a ina yena munna yo wa sooya, si silafezi. 10Mutu kaufela ya swala sika sifi ni sifi s'a inanga munna yo, u ta silafala ku fitela manzibwana. Hape mutu kamukana ya lwala sika sifi ni sifi se ne si inzwi ki munna yo, u lukela ku tapa ni ku tapisa liapalo za hae, mi u ta ina cwalo a nz'a silafezi ku fitela manzibwana. 11Haiba munna ya kula sooya a swala mutu pili a si ka tapa kwa mazoho, yena yo ya swelwi u swanezi ku tapisa liapalo za hae ni ku tapa fa mubili, mi u ta ina cwalo a nz'a silafezi ku fitela manzibwana. 12Piza ya lizupa kaufela ye ta swalwa ki munna yo i lukela ku tubiwa, mi mukeke wa kota kamukana w'a swala u swanezi ku tapiswa.

13“Mutu yo ha s'a folile u swanezi ku ina mazazi a supile, mi cwale kihona a ta tapisa liapalo za hae ni ku tapa fa mubili mwa mezi a mande a mwa liwelu-welu, mi kihona a ta ba ya kenile. 14Ka lizazi la busupa ni li li liñwi u ta nga maiba a mabeli kamba linkwilimba ze peli, a li ise kwa munyako wa Tende ya Kopano, mi a y'o li fa muprisita. 15Cwale muprisita u ta eza ye ñwi ya yona sitabelo sa ku zwisa libi, mi ye ñwi u ta i eza sitabelo sa ku cisa. Ka mukwa wo u ta eza sebelezo ya ku kenisa mutu.

16“Mushamo wa lupepo ha u izwela feela ku munna, munna yo u swanezi ku tapa fa mubili kaufela, mi u ta ina cwalo a silafezi ku fitela manzibwana. 17Sika kaufela se si ezizwe ka lisila kapa litalo, se si lotezwi ki ona mushamo wo si swanezi ku tapisiwa, mi si ta ina cwalo si nze si silafezi ku fitela manzibwana. 18Munna ni musali ha ba se ba zibani, bubeli bwa bona ba swanezi ku tapa, mi ba ta ina cwalo ba nze ba silafezi ku fitela manzibwana.

19“Musali h'a keluhile, u ta ba ya silafezi ka mazazi a supile. Ya mu swala kaufela u ta silafala ku fitela manzibwana. 20Sika kaufela f'a ina, kamba ku lobala, h'a nz'a keluhile, si silafezi. 21Mutu kaufela ya swala mumbeta wa hae, u swanezi ku tapisa liapalo za hae ni ku tapa fa mubili, mi u ta ina cwalo a nz'a silafezi ku fitela manzibwana. 22Mutu kaufela ya swala sika kaufela f'a n'a inzi, u swanezi ku tapisa liapalo za hae ni ku tapa fa mubili, mi u ta ina cwalo a nz'a silafezi ku fitela manzibwana. 23Ya swala mumbeta wa hae kamba sika kaufela f'a n'a inzi u silafezi ku fitela manzibwana. 24Haiba munna a zibana ni musali yo a nz'a sa keluhile cwalo, u yambukezwi ki masila a hae, mi u ta ba ya silafezi ka mazazi a supile, mane ni ona mumbeta f'a lobala kaufela u silafezi.

25“Haiba musali a kula mweya ka mazazi a mañata, kwand'a mazazi a keluhanga ka ona, kamba mweya wo u zwelapili mane ku fitelela mazazi a hae, u ta ba cwalo a nz'a silafezi, sina mw'a inelanga h'a keluhile, mweya ha u sa zwelapili cwalo. 26Mumbeta kaufela f'a lobala ni sika kamukana f'a ina ka yona nako yeo, si silafezi. 27Ya li swala kaufela u silafezi, mi u swanezi ku tapisa liapalo za hae ni ku tapa fa mubili. U ta ina a silafezi cwalo ku fitela manzibwana. 28Mweya wo ha s'o yemi, musali yo u swanezi ku ina mazazi a supile, mi cwale kihona a ta ba ya kenile. 29Ka lizazi la busupa ni li li liñwi, u ta isa maiba a mabeli kamba linkwilimba ze peli ku muprisita, ili kwa munyako wa Tende ya Kopano. 30Muprisita u ta eza ye ñwi ya zona sitabelo sa ku zwisa libi, ni ye ñwi sitabelo sa ku cisa, mi ka mukwa wo u ta eza sebelezo ya ku kenisa musali yo.”

31Muñ'a Bupilo a bulelela Mushe ku lemusa batu ba Isilaele ka za ku silafala kwa bona, ili kuli ba si ke ba silafaza Tende ya Kopano ye mwahal'a mafulo. Ha ba ka i silafaza, ba ka shwa.

32Ye ki yona milao bakeñisa munna ya silafezi kabakala ku kula sooya kamba ku zwa mushamo wa lupepo. 33Mi hape ki yona milao bakeñisa musali ya keluhile, kapa munna ya zibani ni musali ya silafezi.

Currently Selected:

Malivi 15: Lozi09

Highlight

Copy

Compare