Malivi 16
16
Lizazi le lituna la swalelo
1Muñ'a Bupilo a bulelela Mushe mwamulaho a lifu la bana ba Aruni ba babeli, ba ba ne ba bulailwe ha ne ba tukiselize Muñ'a Bupilo mulilo o n'o si ka kena. 2#Maheb 6.19 A li, “U bulelele mwanahenu Aruni kuli a n'o yanga kwamulaho wa lisila le li pumisizwe mwa Sibaka se si Kenile ka nako ye swanela feela, kakuli ki mona mo ni iponahazanga ni nze ni li mwa lilu, fahalimw'a sikwahelo sa Likwati la Bulikani. Haiba a hanyeza u ta bulaiwa. 3#Maheb 9.7 N'a ka kenanga feela mwa Sibaka se si Kenile Hahulu seo, haiba a tisa pulwana ya sitabelo sa ku zwisa libi ni ngu ya poho ya sitabelo sa ku cisa.”
4Cwale Muñ'a Bupilo a mu fa milao ye, a li, “Aruni a si ka ya kale mwa Sibaka se si Kenile Hahulu, u swanezi ku tapa ni ku apala liapalo za buprisita, ili siapalo se sitelele sa lisila la line, kaputula, lukanda ni tukwe.
5“Batu ba Isilaele ba fe Aruni lipuli ze peli za lipoho, za sitabelo sa ku zwisa libi, ni ngu ya poho ya sitabelo sa ku cisa. 6U ta eza poho yeo sitabelo sa ku zwisa libi za hae ni za lubasi lwa hae. 7Cwale kihona a ta isa lipuli ze peli kwa munyako wa Tende ya Kopano. 8Ha s'a li kwa munyako ko, a laule ka macwe a mabeli, le liñwi i be le li ñozwi ‘Ya Muñ'a Bupilo’ mi le liñwi ‘Ya Azazele.’ 9Aruni u ta ezeza Muñ'a Bupilo sitabelo ka puli ye ketezwi Muñ'a Bupilo, mi a i eze sitabelo sa ku zwisa libi. 10Puli ye ketezwi Azazele i ta fiwa Muñ'a Bupilo i nze i sa pila, mi i ta isiwa mwa lihalaupa ku Azazele, ili ku zwisa libi za batu.
11“Aruni u ka eza poho yeo sitabelo sa libi za hae ni za lubasi lwa hae. 12U ta nga liñetana le li beiwanga mulilo le li tezi mashala a yekauka a zwa kwa katala, ni mazoho a mabeli a tezi insense ye nde, mi a li tise mwa Sibaka se si Kenile Hahulu. 13Ha s'a li fapil'a Muñ'a Bupilo, u ta beya insense fa mulilo, mi musi wa insense u ta pata sikwahelo sa Likwati la Bulikani kuli a si ke a si bona, mi a si ke a shwa. 14Cwale kihona a ta nga mali a mañwi a poho, a' fafaze ka munwana wa hae fapil'a sikwahelo, mi cwale a fafaze a mañwi a ona hasupile fapil'a Likwati la Bulikani.
15 #
Maheb 9.12
“Mwamulaho a zeo, a bulaye puli ya sitabelo sa ku zwisa libi za batu, mi a tise mali a yona mwa Sibaka se si Kenile Hahulu, a' fafaze fa sikwahelo, mi cwale kihona a t'a fafaza fapil'a Likwati la Bulikani, sina mw'a n'a ezelize ka mali a poho. 16Ka mukwa wo, u ta eza sebelezo ya ku kenisa Sibaka se si Kenile Hahulu, kwa ku silafala kwa batu ba Isilaele, ni kwa libi za bona kaufela. U swanezi ku eza cwalo ni kwa Tende ya Kopano kakuli i yemi mwahal'a mafulo a silafezi. 17Ha ku swaneli kuli ku be ni mutu ni yo mukana mwa Tende ya Kopano, ku kala ka nako y'a kena Aruni mwa Sibaka se si Kenile Hahulu ku eza sebelezo ya ku kenisa, ku fitela a zwa mwateñi. Pili u swanezi ku feza sebelezo ya ku ikenisa ili yena, ni ku kenisa bana ba hae ni batu kaufela. 18Cwale u swanezi ku ya kwa katala ku y'o eza sitabelo sa ku cisa ni ku ka kenisa. U swanezi ku nga mali a mañwi a poho, ni a mañwi a puli, mi a' lambe kaufela fahalimw'a manaka a kwa malulu a katala. 19U swanezi ku fafaza mali a mañwi hasupile fa katala ka munwana wa hae. Ka mukwa wo u ta ka kenisa kwa libi za sicaba sa Isilaele, ka kenelele.
Puli ya libi
20“Aruni ha s'a felize ku eza sebelezo ya ku kenisa Sibaka se si Kenile Hahulu, Tende ya Kopano kaufela, ni katala cwalo, u ta fitisa puli ye pila ku Muñ'a Bupilo. 21#Tob 8.3 U ta beya mazoho a hae a mabeli fahalimw'a toho ya yona, ni ku bulela bumaswe kaufela, libi, ni bufetuheli bwa batu ba Isilaele, mi cwale a li shimbululele fa toho ya puli. Cwale puli yeo i lelekelwe kwahule mwa naheñi ki mutu ya ketilwe kuli a i ise. 22Puli yeo i ta lwala libi za bona kaufela, i ye ni zona mwa naha ye si na batu.
23 #
Ezek 44.19
“Cwale Aruni kih'a ta kena mwa Tende ya Kopano ku y'o tubula liapalo za buprisita, z'a n'a apezi pili a si ka kena mwa Sibaka se si Kenile Hahulu, mi a li siye mwateñi. 24U swanezi ku tapela mwa sibaka se si kutekeha, ni ku apala liapalo za hae. Ku tuha fo, u ta zwela fande a y'o eza sitabelo sa ku cisa ku zwisa libi za hae ni za batu. 25U ta ciseza lisuzo la folofolo fa katala ku eza sitabelo sa ku zwisa libi. 26Mutu yo, ya isize puli mwa naheñi, u swanezi ku tapisa liapalo za hae ni ku tapa fa mubili pili a si ka kutela mwa mafulo. 27#Maheb 13.11 Poho ni puli ze n'e bulaezwi ku ezisa sitabelo sa ku zwisa libi, zeo mali a zona n'a tisizwe mwa Sibaka se si Kenile Hahulu ku zwisa sibi, li ta zwisezwa kwand'a mafulo, li y'o ciswa. Litalo, nama ni mala kaufela li ciswe ni zona. 28Ya y'o li cisa u swanezi ku tapisa liapalo za hae ni ku tapa fa mubili pili a si ka kutela mwa mafulo.
Ku buluka lizazi la swalelo
29 #
Malivi 23.26-32; Lipa 29.7-11 “Milao ye latelela yeo i na ni ku tokomelwa ka linako kaufela ze sa taha. Ka lizazi la bulishumi la kweli ya busupile, Maisilaele kaufela, ni balicaba ba ba pila mwahal'a bona, ba swanezi ku itima lico ni ku sa eza musebezi ufi kamba ufi. 30Ka lona lizazi leo, ku swanezi ku eziwa sebelezo ya ku ba kenisa kwa libi za bona kamukana, ili kuli ba be ba ba kenile ka mulao. 31Lizazi leo li na ni ku ba le li kenile hahulu, le ba na ni ku itima lico ni ku sa sebeza. Mulao wo u na ni ku bulukwa kuya kuile. 32Muprisita yo muhulu ya yolisizwe ka mulao, mi a tohonolofalizwe ku yola ndat'ahe, ki yena ya na ni ku eza sebelezo ya ku kenisa. U ta apala liapalo za baprisita. 33U ka eza sebelezo ya ku kenisa Sibaka se si Kenile Hahulu, Tende ya Kopano kamukana, katala, baprisita ni batu kaufela ba sibaka seo. 34Mulao wo u na ni ku bulukwa ka linako ze taha kaufela. Sebelezo ye i swanezi ku eziwanga hañwi ka silimo, ili ku kenisa batu ba Isilaele kwa libi za bona kaufela.”
Mushe a eza mw'a n'a mu laelezi Muñ'a Bupilo.
Currently Selected:
Malivi 16: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
