Malivi 14

Litabelo bakeñisa matuku a litalo

1Muñ'a Bupilo a bulelela Mushe. 2#Mat 8.4; Mar 1.44; Luk 5.14; 17.14 A mu fa milao ye bakeñisa ku ikenisa kwa mutu ya folisizwe kwa butuku bwa mbingwa, a li, “Ka lona lizazi l'a bulelwa mutu kuli u kenile, u ta tiswa ku muprisita. 3Muprisita u ta mu isa kwand'a mafulo, ni ku y'o mu tatuba, ili ku ikolwisa kuli butuku bu folile. 4Yena muprisita u ta laela kuli ku tiswe linyunywani ze peli ze kenile, hamoho ni sibala sa kota ya sedare, bwanda bo buñwi bwa bupuzwa bwa bunsu, ni kota ya hisopa. 5Cwale muprisita u ta laela kuli ye ñwi ya linyunywani i bulaelwe mwa mukeke wa lizupa wa kwiti o na ni mezi a mande a mwa liwelu-welu. 6U ta nga nyunywani ye ñwi hamoho ni kota ya sedare, bwanda bo bufubelu, ni kota ya hisopa, a li cupweke mwa mali a nyunywani ye bulailwe. 7Muprisita u ta hasa mali hasupile ku mutu yo ya keniswa kwa butuku bwa mbingwa, mi ku zwa fo a bulele kuli u kenile. U ta lisela nyunywani yeo ye pila i ikele. 8Mutu yo u ta tapisa liapalo za hae, a kute milili ya hae kaufela, mi a tape. Cwale u ta ba ya kenile ka mulao. Ku zwa fo, u ka kena mwa mafulo, kono u swanezi ku ina kwand'a tende ya hae mazazi a supile. 9Ka lizazi la busupa, a ikute hape kwa toho, mulelu, linsi ni bwambo kaufela bo bu fa mubili wa hae. A tapise liapalo za hae ni ku tapa fa mubili, mi cwale u ta ba ya kenile ka mulao.

10“Ka lizazi la busupa ka li li liñwi, mutu yo u ta tisa lingunyana za lipoho ze peli, ni i liñwi ya sitole, za silimo si li siñwi, ze si na fo li nyazahala, likilo ze peli za bupi bo bu kopanyizwe ni mafula a olive, ni botolo ya mafula a olive. 11Cwale muprisita u ta isa mutu yo hamoho ni limpo kwa munyako wa Tende ya Kopano. 12Muprisita kih'a ta nga ye ñwi ya lingunyana za lipoho ni botolo ya mafula a olive, mi a li eze sitabelo sa litifo. U ta li fitisa ku Muñ'a Bupilo, ili mpo ya butokwa, pili li si ka fiwa baprisita. 13U ta bulaela ngunyana yeo kwa sibaka fo ku bulaelwanga lifolofolo za litabelo za ku zwisa libi ni litabelo za ku cisa. U lukela ku eza cwalo kakuli mpo ya litifo, sina mpo ya ku zwisa libi, ki za baprisita, mi li kenile hahulu. 14Muprisita u ta nga mali a mañwi a ngunyana, mi a' sase fa mafelelezo a zebe ya bulyo, fa munwana o mutuna wa lizoho la bulyo, ni fa munwana o mutuna wa kwa lihutu la bulyo wa mutu yo ya bulelwa kuli u kenile. 15Muprisita u ta nga mafula a mañwi a olive, mi a' sele mwa singandi sa lizoho la hae la nzohoto. 16Hape u ta cupwa munwana wa lizoho la hae la bulyo mwa mafula ao, mi u ta fafaza a mañwi ku ona hasupile hona mo fapil'a Muñ'a Bupilo. 17U ta nga mafula a mañwi ku a mwa singandi sa lizoho la hae ni mali a mañwi a ngunyana, mi a toze fa mafelelezo a zebe ya bulyo, fa munwana o mutuna wa lizoho la bulyo, ni fa munwana o mutuna wa lihutu la bulyo la mutu yo ya ta bulelwa kuli u kenile ka mulao. 18Cwale kihona a ta beya mafula kaufela a siyezi mwa singandi sa lizoho la hae fa toho ya mutu yo. Ka mukwa wo muprisita u ta eza sebelezo ya ku kenisa mutu.

19“Cwale muprisita u ta eza sitabelo sa ku zwisa libi ni sebelezo ya ku kenisa. Mwamulaho a fo, kihona a ta bulaya folofolo ya sitabelo sa ku cisa. 20U ta i fitisa fa katala, hamoho ni limpo za lico. Ka mukwa wo muprisita u ta eza sebelezo ya ku kenisa, ni mutu yo u ta kena ka mulao.

21“Haiba mutu yo ki mubotana, mi a sa koni ku tisa zeo kaufela, u ta tisa feela ngunyana ya poho ya sitabelo sa tifo ya ku mu kenisa ili mpo ya butokwa ye fitiswa ku Muñ'a Bupilo, pili i si ka fiwa baprisita. Hape u ta tisa kilo i liñwi ya bupi bo bu kopanyizwe ni mafula a olive, hamohocwalo ni botela i liñwi ya mafula ili sitabelo sa lico. 22Hape u ta tisa maiba a mabeli, kamba linkwilimba ze peli. Ye ñwi i ta ba ya sitabelo sa ku zwisa libi, mi ye ñwi i be ya sitabelo sa ku cisa. 23Ka lizazi la busupa ni li li liñwi la ku keniswa kwa hae, u ta li tisa ku muprisita kwa munyako wa Tende ya Kopano. 24Muprisita u ta nga ngunyana ni mafula a olive, mi a li fitise ku Muñ'a Bupilo, ili mpo ya butokwa, pili li si ka fiwa baprisita. 25U ta bulaya ngunyana, mi a nge mali a mañwi, a' lambe fa mafelelezo a zebe ya kwa bulyo, fa munwana o mutuna wa lizoho la bulyo, ni fa munwana o mutuna wa kwa lihutu la bulyo la mutu yo. 26Muprisita u ta sela mafula a mañwi mwa singandi sa lizoho la hae la nzohoto. 27Mi ka munwana wa hae wa kwa lizoho la bulyo, muprisita u ta fafaza mali a mañwi hasupile hona mo fapil'a Muñ'a Bupilo. 28U ta beya mafula a mañwi ku zona libaka zeo z'a hasize mali, ili kwa mafelelezo a zebe ya bulyo, fa munwana o mutuna wa kwa lizoho la bulyo, ni fa munwana o mutuna wa kwa lihutu la bulyo la mutu yo. 29U ta beya mafula kamukana a siyezi mwa singandi sa lizoho la hae fa toho ya mutu yo, mi ka ona mukwa wo u ta eza sebelezo ya ku kenisa mutu. 30Cwale kihona a ta fitisa le liñwi la maiba kamba linkwilimba. 31A i eze sitabelo sa ku zwisa libi, mi ye ñwi a i eze sitabelo sa ku cisa ha ku fitiswa limpo za lico. Ka mukwa wo muprisita u ta eza sebelezo ya ku kenisa mutu ka mulao. 32Wo ki ona mulao wa mutu ya na ni mbingwa, kono ili ya sa koni ku fumana limpo ze tokwahala mwa sebelezo ya ku keniswa kwa hae.”

Muuta wa mwa mandu

33Muñ'a Bupilo a li ku Mushe ni Aruni: 34“Ha mu se mu keni mwa naha ya Kanana, ye ni ta mi fa kuli i be ya mina, ni ta kenya muuta mwa mandu a mina.” Cwale Muñ'a Bupilo kiha s'a ba fa milao ye, ye tatama. 35A li, “Mutu ya ta fumana muuta mwa ndu ya hae u swanezi ku y'o u bulelela muprisita. 36Muprisita u ta laela kuli lika kaufela li zwiswe mwa ndu yeo pili a si ka y'o tatuba muuta wo, ili kuli lika kamukana ze mwa ndu yeo li si ke za balelwa kuli ha li si ka kena. Cwalehe kihona a ta ya kwa ndu yeo. 37U ka y'o tatuba muuta wo. A ka swana a fumana mibalanyana ye mitalanyana kamba ye mifubelunyana ye ta bonahala ku kena mwa limota. 38Mi cwale u ta zwa mwa ndu moo ni ku i kwala mane ku fite mazazi a supile. 39Ka lizazi la busupa u ta kutela ku yona, a y'o i tatuba hape. A ka swana a fumana kuli muuta wo u ekezehile. 40Mi cwale muprisita u ta laela kuli macwe, fo ku fumanehile muuta wo, a zwisiwe, mi a y'o nepelwa mwa sibaka se si si ka kena se si kwand'a munzi. 41Mwamulaho a zeo kihona a ta laela kuli mamota a mwahal'a ndu kaufela a faliwe, mi mubu wa teñi u y'o sululelwa mwa sibaka se si si ka kena se si kwand'a munzi. 42Cwale ku itusiswe macwe a sili mwa sibaka s'a n'a zwisizwe, mi hape mamota kaufela a ta lilululwa ka mubu o munca.

43“Muuta wo wa kona ku bonahala hape mwamulaho a ku zwisa macwe, ku fala ndu, ni ku i lilulula. 44Cwale muprisita u ta ya kwateñi a y'o bona. Haiba muuta wo u ekezehile, ndu yeo ha i si ka kena. 45I swanezi ku lutululwa, mi macwe a yona, likota ni mubu o i lilulusizwe kamukana li zwiswe mwa munzi, li iswe kwa sibaka se si si ka kena, se si kwand'a munzi. 46Mutu kaufela ya ta kena mwa ndu yeo i nze i kiilwe cwalo, u ta ba ya si ka kena ku fitela manzibwana. 47Mutu kaufela ya ta lobala, kapa ku cela mwa ndu yeo, u swanezi ku tapisa liapalo za hae.

48“Haiba muprisita a t'o bona, mi a fumana kuli muuta wo ha u si ka bonahala hape mwamulaho a ndu ha i se i liluluzwi, fo u ta bulela kuli ndu yeo i kenile ka mulao, kakuli muuta u felile. 49Cwale, h'a ta kenisa ndu yeo, muprisita u ta nga linyunywani ze peli, likotanyana za sedare, bwanda bo buñwi bwa mubala wa bufubelunyana ni bunsunyana, ni kota ya hisopa. 50Ku zwa fo, u ta nga ye ñwi ya linyunywani zeo, a i bulaele fahalimw'a mukeke wa lizupa o na ni mezi a mande a mwa liwelu-welu. 51Cwale kihona a ta nga kota yeo ya sedare, ya hisopa, bwanda bo bufubelu ni nyunywani ye sa pila, a li cupwe mwa mali a nyunywani ye bulailwe ni mwa mezi a mande. Hape a fafaze ndu yeo hasupile. 52Ka mukwa wo u ta kenisa ndu yeo ka mali a nyunywani, ka mezi a mande, ka nyunywani ye pila, ka kota ya sedare, ka kota ya hisopa ni bwanda bo bufubelu. 53Cwale u ta tuhela nyunywani ye sa pila kuli i ikele mwa naheñi. Ka mukwa wo u ta eza sebelezo ya ku kenisa ndu, mi i ta kena ka mulao.

54“Ye ki yona milao bakeñisa matuku a litalo a yambukela. 55Ki milao bakeñisa muuta wa fa liapalo, kamba wa mwa mandu. 56Mi hape ki milao bakeñisa litombo, mambongola ni ku tutuluka. 57Milao ye i bonisa lika ha li kenile ni ha li si ka kena.”

Currently Selected:

Malivi 14: Lozi09

Highlight

Copy

Compare