Joshua 8
8
Ku hapiwa ni ku sinyeha kwa Ai
1Muñ'a Bupilo a li ku Joshua, “U si ke wa saba kamba ku zwafa. U nge masole kamukana, mi u ye ni bona kwa Ai. Ni ta ku fa maata a ku tula mulena wa Ai. Mi batu ba hae, munzi ni naha li ta ba za hao. 2U eze Ai ni mulen'a ona sina m'o ezelize Jeriko ni mulen'a ona. Kono cwale mu lumelezwi ku ipulukela libyana ni likomu ze mu ta fumana mwateñi. Mu itukiseze ku ba bandamena kwa munjewela wa munzi.”
3Cwale Joshua a itukiseza ku ya kwa Ai ni masole kamukana. A keta banna ba lindume ba likiti ze mashumi a malalu, mi a ba fundula busihu. 4A ba fa litaelo, a li, “Mu y'o ipata kwa neku le liñwi la munzi. Mu si ke mwa ya kwahule hahulu ni ona, kono mu be fakaufi mu itukiselize ku lwana. 5Batu ba ka, ni na cwalo, lu ta sutelela kwa munzi. Ha ba ka zwela ku luna, lu ta saba sina mo ne lu ezelize pili. 6Ba ta lu lelekisa mane lu ba ise kwahule ni munzi. Ba ta hupula kuli lwa ba saba sina mo ne lu ba sabezi pili. 7Honafohe, mina mu ta zwa ko mu ipatile, mi mu ta hapa munzi. Muñ'a Bupilo, Mulimu wa mina, u ta mi fa ona. 8Ha mu se mu hapile munzi, mu u cise, sina mw'a laelezi Muñ'a Bupilo. Ze ki zona litaelo za mina.” 9Cwale Joshua kiha s'a ba fundula, mi ba ya kwa sibaka sa bona sa maipato, ili kwa wiko wa Ai, mwahal'a Ai ni Betele. Joshua, yena, a tola busihu bo ni masole mwa mafulo.
10I sa li kakusasa, Joshua a zuha mi a kopanya masole kaufela. Cwale yena ni bazamaisi ba Isilaele ba ba etelela ku ya kwa Ai. 11Ba yelela kwa munyako o mutuna wa munzi, mi ba y'o tibelela kwa neku la mutulo, ko ne ku na ni libala mwahal'a bona ni Ai. 12A nga banna ba ba bata ku eza likiti ze ketalizoho, mi a ba pata kwa malikelelo a munzi, mwahal'a Ai ni Betele. 13Wo ki ona mukwa o ne ba lukisizwe ka ona masole bakeñisa ndwa, ili mafulo a matuna kwa mutulo wa munzi ni a mañwi kwa wiko. Joshua, yena, a tola busihu mwa libala. 14Mulena wa Ai h'a bona batu ba Joshua, a eza kapili. Yena ni batu ba hae ba liba kwa Libala la Jordani ku y'o lwanisa Maisilaele mwa sibaka mo ne ba lwanezi pili. N'a sa zibi kuli u ta lwaniswa kwamulaho. 15Joshua ni batu ba hae ba ikezisa inge ba saba, mi ba matela mwa naheñi. 16Batu ba mwa hae kamukana ne ba bizizwe ku y'o ba lelekisa, mi ha ne ba lelekisa Joshua ne ba nze ba ya kwahule ni munzi. 17Munna kaufela mwa Ai, n'a latelezi Maisilaele. Munzi wa siyala u atami, ku si na ya ka u sileleza.
18Cwale Muñ'a Bupilo a bulelela Joshua, a li, “Supa lilumo la hao kwa Ai. Ni ku fa ona.” Joshua a eza sina mw'a n'a bulelezwi. 19Mi a sa nanula feela lizoho la hae, batu ba ba ne ba ipatile ba pundumuka kapili, ba matela mwa munzi, mi ba u hapa. Mi kapili-pili ba u cisa. 20Batu ba munzi wa Ai ha ba itemuna, ba bona musi s'o y'o swala kwahalimu. Ne ba si na ko ne ba ka sabela, kakuli Maisilaele ba ba ne ba matezi mwa naheñi ba ba fetuhela. 21Joshua ni batu ba hae ha ba bona kuli ba bañwi ba se ba hapile munzi, ni kuli u s'o ca, ba fetuha mi ba kala ku bulaya batu ba munzi wa Ai. 22Maisilaele ba ba mwa hae ba tela batu ba mwa Ai. Ba beiwa mwahali ki Maisilaele, mi ba bulaiwa. Ha ku na ya punyuhile kamba ku pila. 23Kono ba swala mulena wa Ai, mi ba mu isa ku Joshua.
24Maisilaele ba bulaya lila kamukana mwa naheñi ko ne li ba lelekiselezi. Cwale ba kutela kwa Ai, mi ba y'o bulaya ba ba ne ba sa li teñi moo. 25Batu ba mwa Ai kaufela ba bulaiwa ka lona lizazi leo, ili banna ni basali ba ba eza likiti ze lishumi ka ze peli. 26Joshua a ina a nz'a supile lilumo la hae kwa Ai, mi h'a si ka li beya fafasi ku fitela batu ba mwateñi kamukana ha ba se ba bulailwe. 27Maisilaele ba ikungela likomu ni libyana ze ne ba hapile mwa munzi mo, sina Joshua mw'a n'a bulelezwi ki Muñ'a Bupilo. 28Joshua a cisa Ai, mi a u siya ili matota feela kuya kuile, sina mo ku sa inezi ni kacenu. 29A bulaya mulena wa Ai ka ku mu tamelela kwa kota, mi a mu siya fo ku fitela manzibwana. Ha li se li likezi, Joshua a laela kuli ba y'o pahulula situpu, mi ba y'o si nepela fande kwa munyako wa munzi. Ba kubukanya fahalimw'a sona libunda-tuna la macwe le li sa li teñi ni kacenu le.
Ku baliwa Mulao fa Lilundu la Ebali
30 #
Mul 27.2-8
Cwale Joshua a yahela Muñ'a Bupilo, Mulimu wa Isilaele, katala fa Lilundu la Ebali. 31#Mut 20.25 A ka yaha ka likelezo zeo Mushe mutang'a Muñ'a Bupilo n'a li file Maisilaele, sina mo ku bulelelwa mwa Mulao wa Mushe, kuli i be “katala ka macwe a si ka betiwa ka lisebeliso za lisipi.” Ku kona, ba ezeza Muñ'a Bupilo litabelo za ku cisa ni litabelo za buitumelo cwalo. 32Honafo, Maisilaele ba nze ba talimezi, Joshua a ñola fa macwe a katala Mulao o n'o ñozwi ki Mushe. 33#Mul 11.29; 27.11-14 Maisilaele kamukana, ni bazamaisi ba bona, babusisi ni baatuli, hamohocwalo ni bazwahule ba ba ne ba li mwahal'a bona, ba t'o yema kwa maneku a mabeli a Likwati la Bulikani bwa Muñ'a Bupilo, ba talimezi kwa baprisita ba Malivi ba ba li lwezi. Kalulo ye ñwi ya batu ya t'o yema kwa njetumuko ya Lilundu la Gerizimi ni kalulo ye ñwi hape ku la Ebali. Mushe, mutang'a Muñ'a Bupilo, n'a ba laezi pili kuli ba eze cwalo, nako ha i se i fitile ya ku amuhela mbuyoti. 34Cwale Joshua a bala Mulao kaufela ka ku tiisa, limbuyoti hamohocwalo ni likuto, sina mo li ñolezwi mwa Buka ya Mulao. 35Joshua a bala o muñwi ni o muñwi wa milao ya Mushe, mi wa balelwa ba ba ne ba kopani kaufela ili banna, basali ni banana hamohocwalo ni bazwahule ba ba ne ba yahile ni bona.
Lozi Interconfessional Bible, Catholic Edition © Bible Society of Zambia, 2009.