Joshua 7
7
Sibi sa Akani
1Sicaba sa Isilaele sa tula mulao wa Muñ'a Bupilo, wa kuli ba si ke ba nga sifi ni sifi ku ze swanezi ku sinyiwa. I ne li Akani ya n'a ngile lika ze ñwi. Akani yo n'a pepilwe ki Karami, mwan'a Zabidi, mwan'a Zera, wa mwa lusika lwa Juda. Muñ'a Bupilo a halifela hahulu Maisilaele.
2Joshua h'a li mwa Jeriko n'a lumile batu ba bañwi kwa Ai, munzi o kwa upa wa Betele, fakaufi ni Beti-Aveni. N'a ba bulelezi kuli ba y'o bona naha. Batu bao kiha ba ya, ba y'o twela Ai. 3Ha ba t'o taluseza Joshua, ba mu bulelela, ba li, “Ha ku tokwahali ku isa batu kamukana. U lumele feela batu ba ba ka likana likiti ze peli kapa ze talu ku y'o taseza Ai. U si ke wa luma batu kaufela ku y'o lwana kwateñi. Munzi ha si o mutuna.” 4Cwale kwa ya Maisilaele ba ba bata ku eza likiti ze talu feela, kono batu ba mwa Ai ba y'o ba leleka. 5Lila za bulaya batu ba mashumi a malalu ka ba ba silezi. Za lelekisa Maisilaele ku zwa fa minyako ya munzi mane ku y'o fita kwa Shebarimi, mi za ba bulaya ka buñata ha ba nze ba shetumuka lilundu. Cwale Maisilaele ba felelwa ki maata, mi ba saba.
6Joshua a pazula liapalo za hae ka ku swaba, mi a wela fafasi ka pata fapil'a Likwati la Bulikani bwa Muñ'a Bupilo. Manduna ba Isilaele ba patama ni yena ku fitela manzibwana, ba isukululezi liluli kwa litoho ku bonisa maswabi a bona. 7Mi Joshua a li, “Munñ'a Bupilo ya Pahami! Kikabakalañi ha u lu silisize Jordani? I n'e li ku t'o lu kasheza feela kwa Maamori kuli ba lu bulaye, nji? Kiñihe ha lu si ka itulela mwabuse bwani bwa Jordani? 8Ni ka liñi, Muñ'a Bupilo, Maisilaele ha ba se ba saba lila za bona cwana? 9Makanana ni batu kaufela mwa naha, ha ba ka utwa, ba ka t'o lu beya mwahali, ba lu bulaye kamukan'a luna! Mi foo u ta eza cwañi ku sileleza libizo la hao le li tumile?”
10Muñ'a Bupilo a li ku Joshua, “Zuha. Kiñi s'o patamezi cwalo? 11Maisilaele ba fosize! Ba lobile tumelelano ye ne ni laezi kuli ba i buluke. Ba ngile lika ze ñwi ze ne laezwi kuli li sinyiwe. Ba li uzwize, mi ba bulezi mashano ka zona, mane se ba li beile mwahal'a lika za bona. 12Kikabakaleo Maisilaele ha ba sa koni ku itwanela kwa lila za bona. Ba saba lila za bona, kakuli i s'e li bona cwale ba ba se ba lukela ku feliswa! Ha ni sa na ku ba ni mina, konji ha mu ka sinya lika ze, ze ne mu bulelezwi kuli mu si ke mwa li nga! 13Yema! Eza litukiso kamukana za ku ikenisa, mi sicaba si itukiseze ku t'o bonana ni na. U ba bulelele kuli ba itukiseze ku t'o bonana ni na kamuso, kakuli na, Mulimu wa Isilaele, ni na ni se ni bata ku bulela, mi ki se, ‘Mina Maisilaele, mu na ni lika ze ne ni mi laezi kuli mu li sinye! Ha mu na ku yema faipil'a lila za mina ku fitela mu zwisa lika zeo!’ 14Cwale kamuso, kakusasa mu ka tiswa ka masika a mina. Lusika lw'a ta keta Muñ'a Bupilo lu ka tiswa ka mishiku ya lona. Mushiku w'a ta keta Muñ'a Bupilo, u ka tiswa ka limba za ona. Mi mba y'a ta keta Muñ'a Bupilo, i ta taha mutu ka mutu. 15Mutu ya ka fumanwa ni lika ze bulezwi zani, u ta ciswa hamoho ni lubasi lwa hae cwalo ni lika kamukana z'a na ni zona. U ezize nto ye maswe hahulu, kakuli u tuzi tumelelano ye n'e ezizwe mwahal'a batu ba ka ni na cwalo!”
16Joshua a zuha i sa li kakusasa, a suteleza Maisilaele kwapili, lusika ka lusika. Lusika lwa Juda lwa ketwa. 17A tisa mishiku ye simuluha ku Juda kwapili, mi mushiku wa Zera wa ketwa. Mushiku wa Zera kiha u tiswa kwapili, mba ka mba, mi mba ya Zabidi ya ketwa. 18Cwale Zabidi a tisa mba ya hae kwapili, mutu ka mutu, mi Akani a ketwa. I n'e li mwan'a Karami, mwan'a Zabidi, mwan'a Zera, wa lusika lwa Juda. 19Joshua kih'a li ku Akani, “Mwan'a ka, bulela feela niti hona fa, fapil'a Muñ'a Bupilo, Mulimu wa Isilaele, mi u ipulele. U ni bulelele s'o ezize. U si ke wa lika ku ni patela sika.”
20Akani a alaba, a li, “Eni, ni foselize Muñ'a Bupilo, Mulimu wa Isilaele, mi se ni ezize ki se. 21Ni boni mwahal'a lika ze lu hapile siapalo se sinde sa kwa Babilona, likilo ze ne za muwaya-waya wa silivela, ni sikoto sa gauda sa bukiti bo bu fitelela likilo ze peli. Ne ni li lakaza hahulu-hulu, cwale kiha se ni li nga. Mu ta li fumana mwa tende ya ka mo ni li pumbekile. Ni beile silivela kwatasi.”
22Joshua kiha s'a luma batu. Ba matela kwa tende, mi ba y'o fumana kuli kaniti ne li pumbekilwe mwateñi, mane ni silivela kwatasi. 23Ba li zwisa mwa tende, mi ba li isa ku Joshua ni Maisilaele kaufela, mi ba y'o li beya fapil'a Muñ'a Bupilo. 24Joshua, hamohocwalo ni sicaba sa Isilaele kaufela, ba nga Akani, silivela, siapalo, sikoto sa gauda, bana ba hae ba bashimani ni ba basizana, likomu za hae, limbongolo, lingu ni z'a n'a na ni zona kaufela, mi ba kambamela ni zona kwa Libala la Akore. 25Joshua kih'a li, “Kiñi ha u lu tiselize mufili-fili o cwalo? Kacenu Muñ'a Bupilo u ta ku tiseza mufili-fili ni wena!” Batu kaufela kiha ba pobaula Akani ka macwe, mane a shwa. Ba bulaya cwalo lubasi lwa hae, mi ba cisa liluwo la hae kamukana. 26Ba kubukanya fahalimw'a hae libunda-tuna la macwe, le li sa li teñi ni kacenu. Kikabakaleo sibaka seo ha si sa bizwa Libala la Akore.
Cwale Muñ'a Bupilo a kuyuka.
Lozi Interconfessional Bible, Catholic Edition © Bible Society of Zambia, 2009.