Joshua 9
9
Joshua ni Magibioni
1Taba ye ya zibahala kwa malena kaufela ba ba ne ba yahile kwa wiko wa Jordani, ba ba ne ba pila mwa malundu, mwa mabala, ni ba ba ne ba li fa minanga ya Liwate la Mediteranea mane ku y'o fita kwa Lebanoni kwa mutulo, ili malena ba Mahiti, Maamori, Makanana, Maperizi, Mahivi ni Majebusi. 2Ba kopana hamoho ku lwanisa Joshua ni Maisilaele.
3Batu ba mwa Gibioni ba utwa z'a n'a ezize Joshua kwa Jeriko ni Ai. 4Kiha ba lela ku mu puma ka butali. Ba y'o nga lico, ba li lwesa limbongolo za bona mwa masaka a bolile ni mikotana ya matalo ya waine ye se i supezi, i punyehile, mane i s'e beilwe limanahani. 5Ba apala makatulo a pazauhile, a luka-lukilwe, ni liapalo ze cancaukile. Linkwa ze ne ba lwezi ne li omile, hape ne li bolile. 6Cwale ba ya ku Joshua, mwa mafulo a Giligali, ba y'o li ku yena ni kwa sicaba sa Isilaele, “Lu zwa kwa naha ye kwahule. Cwalehe, a mu eze tumelelano ni luna.”
7 #
Mut 23.32; 34.12; Mul 7.2 Kono Maisilaele ba li kwa Mahivi bao, “Lu ezezeñi tumelelano ni mina? Mwendi mu yahile fakaufi bo?”
8Bona ba li ku Joshua, “Lu ipeya kwatas'a hao.”
Joshua a ba buza, a li, “Ki mina bo mañi? Mi hape mu zwa kai?”
9Cwale ba mu bulelela litaba za bona, ba li, “Muñ'a ka, lu zwa mwa naha ye kwahule, kakuli lu utwile ka za Muñ'a Bupilo, Mulimu wa hao. Lu utwile lika kamukana z'a ezize mwa Egepita. 10#Lipa 21.21-35 Lu utwile ni z'a ezize kwa malena ba babeli ba Maamori kwa upa wa Jordani, ili ku Sihoni mulena wa Heshiboni ni ku Ogo mulena wa Bashani ya n'a yahile mwa Ashitaroti. 11Bazamaisi ba luna, ni batu kamukana ba ba yahile mwa naha, ba lu bulelezi kuli lu itukiseze mifaho, mi lu y'o katanyeza batu bao, lu y'o li ku bona, ‘Lu ipeya kwatas'a mina. Cwalehe, muñ'a ka, a mu eze tumelelano ni luna!’ 12Bona lico za luna. Ha lu funduka ku t'o mi katanyeza, lu zwile ni zona kwa hae li sa futumala. Kono bona! Cwale li se li omile ni ku bola. 13Ha lu taza mikotana ya matalo ye ya waine, ne i sa li ye minca, kono cwale bona! I pazauhile. Liapalo ni makatulo a luna li shwezi mwa musipili o mutelele wo.”
14Banna ba Isilaele ba lika ku utwa lico zeo, kono ne ba si ka kupa kelezo ku Muñ'a Bupilo. 15Cwale Joshua a eza kozo ni bona. A eza tumelelano ye tiile ya kuli ba lumelelwe ku pila. Mi ni bona bazamaisi ba sicaba sa Isilaele ba sepisa cwalo ka ku tiisa.
16Ba sin'o eza tumelelano yeo, mwamulaho a mazazi a malalu feela, kihona Maisilaele ba lemuha kuli kanti batu bao ne ba yahile fakaufi. 17Cwalehe, batu ba Isilaele ba funduka, mi ha ba se ba felize mazazi a malalu mwa nzila, ba y'o fita mwa minzi mo ne ba yahile bona batu bao, ili mwa Gibioni, Kefira, Beeroti ni mwa Kiryati-Jearimi. 18Kono Maisilaele ne ba si ke ba ba bulaya, kakuli bazamaisi ba bona ne ba sepisize batu bao ka ku konka ka Muñ'a Bupilo, Mulimu wa Isilaele. Batu kamukana ba bilaela kwa bazamaisi ka taba yeo. 19Kono bazamaisi ba alaba, ba li, “Lu ba sepisize ka ku tiisa ka libizo la Muñ'a Bupilo, Mulimu wa Isilaele. Cwale ha lu koni ku ba utwisa butuku. 20Kabakala sepiso ya luna ye tiile lu swanezi ku ba tuhela ba pile. Ha lu sa ezi cwalo, Mulimu u ka lu utwisa butuku. 21Lu ba tuhele ba pile, kono ba ka lu lemelanga likota ni ku lu kelanga mezi.” Wo, n'e li ona muhupulo wa bazamaisi.
22Joshua kiha s'a biza batu ba mwa Gibioni, a t'o ba buza, a li, “Mu lu pumeziñi, ha mu t'o lu bulelela kuli mu zwa kwahule, kanti mu zwa hona fa? 23Kakuli mu ezize cwalo, Mulimu u mi kutile. Kuya kuile mu ka na mu tisanga babeleki ba ba ta lema likota ni ku kelela mezi a mwa sibaka se si kenile sa Mulimu wa ka.”
24Ba alaba, ba li, “Lu ezize cwalo, muñ'a ka, kakuli lu zibile kuli ki niti luli, Muñ'a Bupilo, Mulimu wa mina, u bulelezi mutang'a hae Mushe ku mi fa naha ye kaufela, ni ku bulaya batu ba ba yahile mwateñi ha mu nze mu kena ku yona. Lu ezize cwalo kakuli ne lu mi saba hahulu. Ne lu saba kuli mu ta lu bulaya. 25Cwale lu mwa maata a hao. U lu eze ka mo n'o ka hupulela.” 26Joshua a ba sileleza kwa sicaba sa Isilaele, mi a ba pilisa kwa ku bulaiwa. 27Kono ku zwa nako yona yeo, Joshua a ba eza balwaleli ba likota ni bakeleli ba mezi a batu ni a katala ka Muñ'a Bupilo. Mane ni kacenu ba sa sweli ku eza cwalo, ku sebeza f'a ketile Muñ'a Bupilo kuli a lapelelwe fateñi.
Lozi Interconfessional Bible, Catholic Edition © Bible Society of Zambia, 2009.