Joshua 6
6
Ku wa kwa Jeriko
1Minyako ya munzi wa Jeriko ne i kwalilwe, i tiisizwe luli, ili ku kwalela Maisilaele. Ne ku si na ya n'a kona ku kena kamba ku zwa mwa hae. 2Muñ'a Bupilo kih'a li ku Joshua, “Utwa! Ni tuha ni ku fa munzi wa Jeriko ni mulen'a ona ni masole ba ba pilu-tata ba mwateñi. 3Wena ni masole ba hao mu potolohange munzi hañwi ka zazi ni zazi mu be mu feze mazazi a silezi. 4Yo muñwi ni yo muñwi wa baprisita ba supile a lwale tolombita, mi ba zamaye Likwati la Bulikani kwapili. Ka lizazi la busupa, wena ni masole ba hao mu potolohe munzi hasupile, baprisita ba nze ba liza litolombita. 5Cwale ba lize mufumbo o mutelele. Ha mu ka utwa mufumbo wo, batu kamukana ba huwe hahulu, mi mamota a munzi a ta wa ku welela. Fohe, mutu ni mutu u ta ikenela f'a fumana kaufela.”
6Cwale, Joshua kih'a biza baprisita, mi a ba bulelela, a li, “Mu nanule Likwati la Bulikani, mi ba supile ku mina ba li etelele ba nze ba lwezi litolombita. Masole ba mi zamaye kwapili.” 7A bulelela sicaba, a li, “A mu funduke! Mu potolohe munzi, masole bona ba nze ba zamaya Likwati la Bulikani bwa Muñ'a Bupilo kwapili.”
8Sina mw'a n'a laelezi Joshua, baprisita ba supile ba zamaya kwapil'a Likwati la Bulikani bwa Muñ'a Bupilo ba nze ba liza litolombita. 9Masole ba etelela baprisita ba ba ne ba liza litolombita, mi likolo le liñwi la latelela Likwati la Bulikani. Nako kaufela litolombita ne li nze li lila. 10Kono Joshua n'a bulelezi batu kuli ba si ke ba huwa, nihaili ku eza lilata, ku fitela a ba laela. 11Cwale a lumela baprisita ni Likwati la Bulikani bwa Muñ'a Bupilo, mi ba y'o potoloha munzi hañwi. Ba kutela kwa mafulo, mi ba y'o lobala kwateñi.
12Habusa, i sa li kakusasa, Joshua a zuha mi baprisita ba nanula Likwati la Bulikani. 13Baprisita ba supile, ba ba lwezi litolombita ze supile, ba etelela ba nze ba li liza nako kaufela. Masole ne ba zamaya kwapil'a bona, mi likolo ne li taha mwamulaho. Nako kamukana litolombita ne li nze li lila. 14Hape, ka la bubeli, ba potoloha munzi hañwi, mi ba kutela kwa mafulo. Ba eza cwalo ka mazazi a silezi.
15Ka lizazi la busupa, ba zuha li sa pazula feela, mi ba potoloha munzi hasupile ka mukwa o swana. I n'e li lona lizazi leo feela fo ba potolohile munzi hasupile. 16Ha ba potoloha lwa busupa, baprisita ha ba se ba li fakaufi ni ku liza litolombita, Joshua a bulelela batu, a li, “A mu huwe! Muñ'a Bupilo u mi file munzi! 17Munzi ni ze mwateñi kamukana li lukululezwi ku sinyeha inge mpo ye fiwa Muñ'a Bupilo. Konji Rahaba wa lihule ni ba ndu ya hae, ki bona ba ba ta siyala, kakuli Rahaba n'a patile matwela ba luna. 18Kono haili mina, mu be kwahule ni ze ka sinyeha. Haiba mu nga sifi ni sifi ku ze lukela ku sinyeha, mu ka tisa bumai ni ku shandauka kwa mafulo a Maisilaele. 19Kono lika kamukana ze ezizwe ka silivela, ka gauda, ka kopa kamba ka sipi ki za Muñ'a Bupilo. Li na ni ku beiwa mwa pulukelo ya hae.”
20 #
Maheb 11.30
Cwale baprisita ba liza litolombita. Batu ba sa li utwa feela, ba huweleza ka tata, mi limota la wela fafasi ku welela. Cwale batu kaufela ba kena mwa munzi, mi ba u hapa. 21Ba bulaya ufi ni ufi wa mwateñi ka lisabule za bona, banna ni basali, banana ni ba bahulu. Ba bulaya cwalo ni zona likomu, lingu ni lingombolo.
22Joshua a bulelela banna ba babeli ba ba ne ba lumilwe ku twela naha, a li, “Mu ye mwa ndu ya lihule, mi mu y'o mu zwisa mwateñi, yena ni lubasi lwa hae, sina mo mu mu sepiselize.” 23Cwale ba ya, ba y'o zwisa Rahaba hamohocwalo ni ndat'ahe, m'ahe, likaizeli za hae ni lubasi lwa hae kamukana. Ba ba ngelela hamoho ni batanga cwalo, mi ba t'o ba beya kwatuko a mafulo a Maisilaele. 24Kiha ba cisa munzi ni ze mwateñi kaufela kwand'a lika ze ne ezizwe ka gauda, silivela, kopa ni sipi, ze ne ba zwisize ni ku y'o li beya mwa pulukelo ya Muñ'a Bupilo. 25#Maheb 11.31 Kono Joshua a pilisa Rahaba wa lihule ni banabahabo kamukana, kakuli n'a patile balumiwa ba ba ne ba lumilwe ki yena ku y'o twela munzi wa Jeriko. Lusika lwa hae lu sa pila mwa Isilaele ni ka nako ye.
26 #
1 Male 16.34
Ka nako yeo Joshua a kalimela batu ka tata, a li, “Mutu ufi kamba ufi ya ka lika ku yaha sinca munzi wo, wa Jeriko, u ta kutiwa ki Muñ'a Bupilo.
Mañi ni mañi ya ka beya mutomo,
u ta shwelwa ki mwan'a hae wa mweli.
Mi mañi ni mañi ya ka yaha minyako,
u ta shwelwa ki ñomba wa hae.”
27Muñ'a Bupilo a ba ni Joshua cwalo, mi libubo la hae la hasanela mwa naha kaufela.
Lozi Interconfessional Bible, Catholic Edition © Bible Society of Zambia, 2009.