Joshua 5
5
Mupato ni Paseka kwa Giligali
1Malena ba Maamori kaufela, kwa wiko wa Jordani, ni malena ba Makanana kamukana, kwatuko a Liwate la Mediteranea, ba utwa kuli Muñ'a Bupilo n'a kalisize Jordani, sicaba sa Isilaele ha ne si sila. Ba kenelwa ki sabo, mi ba felelwa ki maata kabakala Maisilaele.
2Cwale Muñ'a Bupilo a bulelela Joshua, a li, “Eza litipa ka macwe a buhali mi u ise Maisilaele kwa mupato hape.” 3Joshua kih'a eza litipa, mi a ba isa kwa mupato fa Lilundu la Mupato. 4A eza cwalo kakuli batu kamukana ba ba ne ba lukela ku lwana, ha ba zwa mwa Egepita, ne ba shwezi mwa nzila kaufela ha ne ba li mwa lihalaupa. 5Nihaike banna kamukana ba ba ne ba zwile kwa Egepita ne ba se ba ile kwa mupato, ba ba ne ba pepilwe ha ku silwa lihalaupa kamukana ne ba si ka ya kwateñi bona. 6#Lipa 14.28-35 Sicaba sa Isilaele ne si zamaile lilimo ze mashumi a mane mwa lihalaupa. Ka nako yeo, banna kaufela ba ba zwile mwa Egepita ba ba ne ba lukela ku lwana, ne ba se ba shwile kakuli ne ba si ka utwa linzwi la Muñ'a Bupilo. A ba bulelela kuli ha ba na ku bona naha ye nde, ye nunile, y'a n'a sepisize bo kukw'a bona kuli u ta ba fa yona. 7Kono bana ba bona, ba ba ne ba ngile libaka za bona, ne ba si ka isiwa kwa mupato ha ne ba sa zamaya mwa lihalaupa. Mi ki lona lusika lo, lo lunca, lw'a n'a isa Joshua kwa mupato.
8Mupato ha u se u felile, sicaba kamukana sa ina mwa mafulo ku fitela litombo ha li se li folile. 9Muñ'a Bupilo kih'a li ku Joshua, “Kacenu ni mi zwisize mwa maswabi a ku ba batanga mwa Egepita.” Kikabakaleo sibaka se ha si bizwa Giligali ni kacenu.
10 #
Mut 12.1-13
Maisilaele ha ne ba sa tibelezi mwa Giligali, mwa libala le li potolohile Jeriko, ba cela Paseka hona mo ka nako ya manzibwana ka la bulishumi ni a mane kwa kweli. 11Ha bu sa feela, ba ca lico ze ne limilwe mwa Kanana, ili mabele a matuyu-tuyu ni mahobe a si na mumela. 12#Mut 16.35 Mwamulaho a zeo, manna ya tuhela ku wa, mi Maisilaele ha ba si ka i fumana hape. Ku kala ka sona silimo seo, ba ca lico ze limilwe mwa Kanana.
Joshua ni mutu ya n'a na ni sabule
13Joshua ha s'a li fakaufi ni Jeriko, h'a y'o kumbuluka a bona mutu ya yemi fapil'a hae, a sweli sabule. A ya ku yena, mi a mu buza, a li, “Wena u wa masole ba luna kamba u sila?” 14Mutu yo a alaba, a li, “Batili! Ha ni sila kapa yo muñwi wa mina. Na, ni muzamaisi wa mpi ya Muñ'a Bupilo.”
Joshua a inama ku lapela, a li, “Muñ'a ka, u til'o ni laela lifi? Ni itukiselize ku li eza. U bata kuli ni ku ezezeñi?”
15Muzamaisi wa mpi ya Muñ'a Bupilo a mu bulelela, a li, “Tubula makatulo a hao, kakuli u yemi fa sibaka se si kenile.” Mi Joshua a eza mw'a n'a bulelezwi.
Lozi Interconfessional Bible, Catholic Edition © Bible Society of Zambia, 2009.