Joshua 4
4
Macwe a, a talusañi?
1Sicaba kamukana ha si se si silile Jordani, Muñ'a Bupilo a li ku Joshua, 2“A mu kete banna ba lishumi ka ba babeli, a li muñwi mwa lusika ni lusika. 3Mu ba laele kuli ba nope macwe a lishumi ka a mabeli fahal'a Jordani, ili fa sibaka luli fo ne ba yemi baprisita. Mu a lwale, mi mu y'o a kubukanya fafasi ko mu ka y'o tibelela kacenu!”
4Cwale Joshua a biza banna ba lishumi ka ba babeli b'a n'a ketile. 5Mi a li ku bona, “Mu kene mwa Jordani kwapil'a Likwati la Bulikani bwa Muñ'a Bupilo, Mulimu wa mina. Yo muñwi ni yo muñwi wa mina a y'o lwala licwe fa maheta, ili kuli lusika ni lusika lwa Isilaele lu be ni licwe la lona. 6Macwe ao a ta hupulisa batu s'a ba ezelize Muñ'a Bupilo. Ka lilimo ze taha, bana ba mina ba ta mi buza kuli macwe ao a talusa sika mañi ku mina. 7Mu ta ba bulelela kuli mezi a Jordani n'a kile a yema muta Likwati la Bulikani bwa Muñ'a Bupilo li sila nuka. Macwe a, a ta ba kupuzo kwa sicaba sa Isilaele kuya kuile.”
8Batu bao ba eza mw'a n'a ba laelezi Joshua. Sina Muñ'a Bupilo mw'a n'a bulelezi Joshua, ba y'o nga macwe a lishumi ka a mabeli fahal'a Jordani, ili licwe ka lusika ni lusika lwa Isilaele. Ba a lwala, mi ba y'o a lulela fo ne ba il'o tibelela. 9Joshua hape a toma macwe a mañwi a lishumi ka a mabeli mwahal'a Jordani fo ne ba yemi baprisita ba ba ne ba lwezi Likwati la Bulikani. Macwe ao a sa li teñi ni kacenu. 10Baprisita ba yema fahal'a Jordani ku fitela lika kamukana z'a n'a laezwi Joshua ki Muñ'a Bupilo li fela, ili lika z'a n'a bulelezi batu kuli ba li eze. Ki zona z'a n'a kile a laela Mushe.
Cwale batu ba akufa, mi ba sila. 11Ha ba se ba silile kaufela, Likwati la Bulikani bwa Muñ'a Bupilo ni baprisita ba etelela sicaba. 12Batu ba lusika lwa Rubeni ni lwa Gadi ni kalulo ya lusika lwa Manase ba sila pili, ba itukiselize ku lwana, ba bañwi ba si ka sila kale, sina mw'a n'a ba bulelezi Mushe. 13Muñ'a Bupilo a nz'a talimezi, banna ba ba eza likiti ze mashumi a mane, ba ba itukiselize ku lwana, ba silela mwa libala le li fakaufi ni Jeriko. 14S'a n'a ezize Muñ'a Bupilo, lizazi leo, sa bubanisa Joshua mwahal'a batu ba Isilaele, mane ba kuteka hahulu Joshua. Ba mu nga sina mutu yo mutuna-tuna. Ba mu kuteka cwalo mwa bupilo bwa hae kaufela, sina mo ne ba kutekela Mushe.
15Cwale Muñ'a Bupilo a bulelela Joshua, a li, 16“Laela baprisita ba ba lwezi Likwati la Bulikani kuli ba tatuhe Nuka ya Jordani.” 17Joshua a eza cwalo. 18Baprisita ha ba se ba fitile fa likamba, fo ku omile, nuka ya kala ku buba hape, mi minanga ya yona ya kutela ku tala.
19Batu ba sila Jordani ka la bulishumi mwa kweli ya pili, mi ba y'o tibelela mwa Giligali, kwa upa wa Jeriko. 20Hona fo, Joshua a toma macwe a lisumi ka a mabeli a n'a ngile kwa Jordani. 21Kih'a bulelela batu ba Isilaele, a li, “Ka linako ze taha, bana ba ka buza bashemi ba bona, ba li, ‘Kanti macwe a, a talusañi?’ 22Fohe mu ba taluseze kuli Maisilaele ba kile ba sila Jordani i nze i omile. 23Kwa ba cwalo kakuli Muñ'a Bupilo, Mulimu wa mina, a mi kaliseza mezi a Jordani ku fitela ha mu se mu silile, sina mw'a n'a kaliselize Liwate le Lifubelu ku fitela lu li sila. 24Kabakala zeo, macaba kaufela a lifasi a ta ziba maata a Muñ'a Bupilo, mi mu ta saba Muñ'a Bupilo, Mulimu wa mina, kuya kuile.”
Lozi Interconfessional Bible, Catholic Edition © Bible Society of Zambia, 2009.