Joshua 3
3
Batu ba Isilaele ba sila Jordani
1Joshua a zuha i sa li kakusasa, mi hamoho ni batu ba Isilaele kamukana ba zwa mwa mafulo a Shitimi, ba ya kwa Jordani. Ba y'o tibelela kwateñi ba si ka sila kale. 2Mwamulaho a mazazi a malalu, bahulu ba sicaba ba zamaya mwa mafulo kaufela. 3Ba bulelela batu, ba li, “Ha mu ta bona baprisita ba lwala Likwati la Bulikani bwa Muñ'a Bupilo, Mulimu wa mina, mu pute libyana za mina, mi mu li latelele. 4Kihona mu ta ziba nzila ye mu lukela ku ya ka yona, kakuli ha mu si ka fita kale kwanu ni kamuta. Kono mu si ke mwa sutelela kwa Likwati la Bulikani. Mu zamaele kwahule ni lona, mu siye sibaka se si likana ni licika la sibima mwahali.”
5Joshua a bulelela batu, a li, “Mu ikenise fapil'a Muñ'a Bupilo, kakuli kamuso u ta eza lika ze tuna mwahal'a mina.” 6Joshua cwale a bulelela baprisita, a li, “Mu nanule Likwati la Bulikani mi mu etelele sicaba.” Kiha ba eza mw'a n'a bulelezi.
7Cwale Muñ'a Bupilo a li ku Joshua, “Se ni ta eza kacenu si ta ku tahiseza likute fapil'a Maisilaele, ba ku talime sina mutu yo mutuna, mi ba ta ziba kuli ni na ni wena sina mo ne ni bezi ni Mushe. 8Laela baprisita ba ba lwala Likwati la Bulikani, u li, ‘Ha mu fita kwa nuka, mu yeme mwa mezi fakaufi ni likamba.’ ”
9Cwale Joshua a bulelela batu, a li, “A mu tahe kwanu, mu t'o ikutwela s'a bata ku bulela Muñ'a Bupilo, Mulimu wa mina. 10Kacenu mu ta kolwa kuli Mulimu ya pila u mwahal'a mina. Ha mu sutelela, yena u ta leleka Makanana, Mahiti, Mahivi, Maperizi, Magirigashi, Maamori ni Majebusi. 11Likwati la Bulikani bwa Mulena wa lifasi kamukana li ta itangeta ku sila Nuka ya Jordani. 12Cwale mu kete banna ba lishumi ka ba babeli. Mu nge a li muñwi mwa lusika ni lusika lwa Isilaele. 13Baprisita ba ba lwezi Likwati la Bulikani bwa Mulena wa lifasi kaufela ha ba t'o hata mezi, Nuka ya Jordani ha i sa na ku buba, mi mezi a zwa kwa musweto a ta kubukana mwa sibaka si li siñwi.”
14I n'e li nako ya kutulo, mi nuka ne i tezi.
Cwale batu ba zwa mwa mafulo ku y'o sila Nuka ya Jordani. Baprisita ba zamaya kwapili ba nze ba lwezi Likwati la Bulikani. 15Ba t'o fita kwa nuka ni ku t'o hata mezi ka mahutu. 16Mezi a yema mi a kubukana kwahule koo, kwa musweto, ku be ku y'o fita kwa Adama, munzi o fakaufi ni Zaretani. Mezi a n'a bubela mwa Liwate la Lizwai a kala, mi batu ba silela fakaufi ni Jeriko. 17Ha ne ba nze ba sila cwalo fo ku omile, baprisita ba ba ne ba lwezi Likwati la Bulikani ba yema fafasi fo ku omile, mwahal'a Jordani, ku fitela batu kamukana ha ba se ba silile nuka.
Lozi Interconfessional Bible, Catholic Edition © Bible Society of Zambia, 2009.