Joshua 2
2
Joshua u lumela matwela kwa Jeriko
1 #
Maheb 11.31; Jak 2.25 Cwale Joshua a luma matwela ba babeli ku zwa mwa mafulo a Shitimi, ku si na ya ziba, ka litaelo ze, a li, “Mu ye, mu y'o talima hande naha ni munzi wa Jeriko.” Ba zamaya, ba y'o fitela mwa ndu ya musali wa lihule ya n'a bizwa Rahaba, mi ba ina mwateñi. 2Mulena wa Jeriko a ba utwa. Kih'a li, “Ku na ni Maisilaele ba bañwi ba ba tile mwa hae mo, bona busihu bo, ku t'o twela naha!” 3Mulena kiha s'a lumelela linzwi ku Rahaba, a li, “Batu ba ba mwa ndu ya hao ba tezi ku t'o twela naha kaufela! Ba zwiseze kwanu!”
4Kono musali yo n'a s'a patile batu bao ba babeli, kih'a alaba, a li, “Ne ku tile banna mwa ndu ya ka, yeo ki niti, kono ne ni sa zibi ko ne ba zwa. 5Ba fundukile manzibwana, minyako ya munzi ha i se i bata ku kwaliwa. Ha ni si ka ikataza ku ziba ko ne ba ya, kono ha mu ka ba latelela kapili mu ta ba swala.” 6N'a isize matwela bao fahalimw'a situwa, ni ku ba pata mwa makuku a n'a yanehile fateñi. 7Batu ba ba ne ba lumilwe ki mulena ba sa z'o zwa feela mwa hae, munyako wa kwalwa. Ba zamaya ba bata matwela mane ba y'o fita fa mupao wa Nuka ya Jordani.
8Banna bao ba si ka lobala kale, Rahaba a ya ku bona fa situwa. 9Kih'a y'o li ku bona, “Ni ziba kuli Muñ'a Bupilo u mi file naha, mi ni lumela kuli kaufel'a luna lwa mi saba. 10#Mut 14.21; Lipa 21.21-35 Lu se lu utwile Muñ'a Bupilo mw'a omiselize Liwate le Lifubelu fapil'a mina, muta mu zwa mwa Egepita. Lu utwile ni mo mu bulaezi malena ba Maamori kwa upa wa Jordani, ili bo Sihoni ni Ogo ni limpi za bona. 11Lwa tula lipilu ha lu utwa cwalo, mi ufi ni ufi u s'a felezwi ki maata kabakala mina. Mulimu wa mina, Muñ'a Bupilo, ki Mulimu wa lihalimu ni lifasi. 12Cwalehe, mu itame ku Muñ'a Bupilo kuli mu ta buluka sepiso ya mina ni ku babalela lubasi lwa ka, sina na ha ni mi babalezi, mi mu ni fe sisupo sa kuli mu ka eza cwalo. 13Mu pilise bo ndate, bo me, likaizeli ni banyani ba ka, ni mabasi a bona kamukana! Mu si ke mwa lu tuhela lu bulaiwa?”
14Batu bao ba li ku yena, “Lu itukiselize ku mi shwela! Haiba mu sa buleli ze lu ezize, lu ku sepisa kuli lu ta buluka buitamo bwa luna ku wena, Muñ'a Bupilo h'a ka lu fa naha ye.”
15Rahaba n'a pila mwa ndu ye ne yahezwi kwa lukwakwa lwa munzi, cwale a shulumuna batu bao ka muhala fa lihaulo. 16A ba bulelela, a li, “Mu ye kwa malundu, hakusicwalo batu ba mulena ba ta mi fumana. Mu ipate mazazi a malalu, ku fitela ba kuta. Mwamulaho a fo, mu ka na mwa zwelapili mwa musipili wa mina.”
17Banna bao ba li ku yena, “Lu ta buluka buitamo bo lu ku sepisize. 18Utwahe! Ha lu ka t'o taseza naha ya mina, u tame ona muhala o mufubelu wo fa lihaulo mo u lu shulumunezi. U nge bo ndat'aho ni m'aho, likaizeli ni banyani ba hao, mi ba kene mwa ndu ya hao hamohocwalo ni lubasi lwa ndat'aho kamukana. 19Ufi ni ufi ya ka zwa mwa ndu mo, ku ya mwa mukwakwa, yo i ka ba mulatu wa hae h'a ka shwa. Ha lu na ku ba ni buikalabelo mwa taba mo. Kono haiba ya mwa ndu ni wena a ka holofazwa, fohe mulatu i ta ba wa luna. 20Kono ha u ta bulela ze lu ezize, fo ha lu na ku buluka sepiso ya luna.” 21Kih'a ba alaba, a li, “Na lumela.” Cwale a ba fundula, mi ba zamaya. A tamelela muhala o mufubelu fa lihaulo.
22Ba ya mwa malundu, mi ba y'o ipata mwateñi, batu ba mulena ha ba nze ba ba bata mwa naha kaufela mazazi a malalu. Kono ha ku na ye ba fumani, cwale ba kutela kwa Jeriko. 23Kiha matwela bao ba babeli ba zwa mwa malundu, ba sila nuka, ba kutela ku Joshua, mi ba y'o mu bulelela ze ezahalile kamukana. 24Ba li ku yena, “Lu na ni niti kuli Muñ'a Bupilo u lu file naha yeo kaufela. Batu ba mwa naha mo kamukana ba se ba lu saba maswe.”
Lozi Interconfessional Bible, Catholic Edition © Bible Society of Zambia, 2009.