Joshua 23
23
Joshua u bulela kwa sicaba
1Mwamulaho a nako ye telele, Muñ'a Bupilo ha s'a file Maisilaele kozo ni lila ze ne ba beile mwahali, Joshua n'a s'a supezi hahulu. 2A biza bana ba Isilaele kaufela, bahulu, manduna, baatuli ni bazamaisi ba sicaba, mi a li ku bona, “Ni se ni supezi hahulu cwale. 3Mu se mu boni lika kamukana zeo Muñ'a Bupilo, Mulimu wa mina a li ezize kwa macaba ao kaufela kabakala mina. Muñ'a Bupilo, Mulimu wa mina, u mi lwanezi. 4Mu teeleze! Ni se ni abezi masika a mina liluwo la macaba a sa siyezi, hamohocwalo ni macaba a ni se ni ngile, ku zwa kwa Jordani mwa upa ku y'o fita kwa Liwate la Mediteranea mwa wiko. 5Muñ'a Bupilo, Mulimu wa mina, u ta ba sabisa fapil'a mina, mi a ba lelekele kwahule ni mina. Mu ta nga naha ya bona, sina mw'a n'a mi sepiselize Muñ'a Bupilo, Mulimu wa mina. 6Cwalehe, mu tiye, mu be ni niti ya ku mamela ni ku eza lika kamukana ze ñozwi mwa Buka ya Mulao wa Mushe. Mu si ke mwa keshebisa nihaili kalulo feela ya ona. 7Mu eze cwalo kuli mu si ke mwa kopana-kopana ni batu ba ba sa siyezi mwahal'a mina, kamba ku bulela mabizo a milimu ya bona, kamba ku konka ka ona, kamba ku sebeleza milimu yeo ni ku i kubamela. 8Mu sepahale ku Muñ'a Bupilo, sina mo mu ezelize ku fitela nako ye. 9Muñ'a Bupilo u mi lelekezi licaba ze tuna, ze na ni maata, mi ha ku na ya konile ku yemisana ni mina ku fitela ni nako ye. 10#Mul 3.22; 32.30 Yo muñwi ni yo muñwi wa mina u kona ku sabisa batu ba sikiti, kakuli Muñ'a Bupilo, Mulimu wa mina, wa mi lwanela sina mw'a n'a sepiselize. 11Mu be ni nitihe, ya ku lata Muñ'a Bupilo, Mulimu wa mina. 12Mu si ke mwa mu fulalela, ni ku kopana ni macaba a siyezi mwahal'a mina, kapa ku nyalana ni bona. 13Mu zibe hande kuli Muñ'a Bupilo, Mulimu wa mina, h'a sa na ku mi lelekiseza macaba ao. Mane, a ta ba ni kozi ku mina, sina silaha kamba musima. A ta mi utwisa butuku sina pafa fa mukokoto kamba miutwa mwa meeto a mina. Ku ta ba cwalo ku fitela mu zwa mwa naha ye nde ye, y'a mi file Muñ'a Bupilo, Mulimu wa mina.
14“Cwale ni tuha ni shwa. Yo muñwi ni yo muñwi wa mina wa ziba mwa pilu ni mwa moya wa hae kuli Muñ'a Bupilo, Mulimu wa mina, u mi file ze nde kaufela z'a n'a mi sepisize. Z'a n'a sepisize kamukana li ezahlile. Ha ku na nihaili i liñwi ya lisepiso za hae ye si ka petahala. 15Ee, Muñ'a Bupilo, Mulimu wa mina, u mi ezelize ze nde kaufela z'a n'a bulezi kuli u ta li eza. Kono Muñ'a Bupilo u ta mi tiseza ze maswe kaufela z'a mi bembile ka zona, ku fitela ha mi lundulula mwa naha ye nde y'a mi file. 16Kono ha mu sa buluki bulikani bo mu laezwi ki yena kuli mu bu buluke, haiba mu ikela ku y'o lapela milimu i sili ni ku i kubamela, fohe u ta mi utwisa butuku, mane mu felelele kaufela mwa naha ye nde ye y'a mi file.”
Lozi Interconfessional Bible, Catholic Edition © Bible Society of Zambia, 2009.