Joshua 22
22
Masika a kwa upa ba kutela kwa mahae
1Cwale Joshua a kopanya batu ba masika a Rubeni, Gadi ni kalulo ya lusika lwa Manase. 2#Lipa 32.20-32; Josh 1.12-15 A ba bulelela, a li, “Mu ezize lika kamukana ze ne mu laezwi ki Mushe, mutang'a Muñ'a Bupilo, mi mu bulukile litaelo za ka kaufela. 3Ha mu si ka kauhana ni banabahabo mina Maisilaele nako ye kamukana, mane ku fitela la kacenu le. Mu bulukile milao ya Muñ'a Bupilo, Mulimu wa mina, ka tokomelo. 4Cwale, Muñ'a Bupilo, Mulimu wa mina u file banabahabo mina Maisilaele kozo, sina mw'a n'a sepiselize. Cwalehe mu ye kwa naha ye mu ikupezi kuli i be ya mina, naha ye mwabuse bwa Nuka ya Jordani, ye mu filwe ki Mushe, mutang'a Muñ'a Bupilo. 5Mu be ni niti ya ku buluka litaelo ni Mulao o mu filwe ki Mushe, mutang'a Muñ'a Bupilo. Mu late Muñ'a Bupilo, Mulimu wa mina, mu eze tato ya hae, mu buluke litaelo za hae, mu sepahale ku yena, mi mu mu sebeleze ka lipilu za mina ni ka moya wa mina kaufela.” 6Joshua a ba tohonolofaza, mi a ba fundula. Cwale ba ya kwa mahae.
7Mushe n'a file naha mwa Bashani ku ba kalulo ye ñwi ya ba Manase, kono ba kalulo ya bubeli ne ba filwe ki Joshua kwa wiko wa Jordani, hamoho ni masika a mañwi. Cwale Joshua a sin'o fuyaula batu bao, a ba fundula, 8A ba bulelela, a li, “Mu kutela kwa mahae mu nze mu fumile hahulu. Mu na ni likomu ze ñata, silivela, gauda, kopa, sipi ni liapalo ze ñata. Mu ikabele ni Maisilaele, bahabo mina, ze mu ngile kwa lila za mina.”
9Cwale, batu ba masika a Rubeni, Gadi ni kalulo ya lusika lwa Manase ba kutela kwa mahae. Ba siya Maisilaele ba bañwi mwa Shilo, mwa naha ya Kanana, mi ba ya kwa naha ya Giliadi, naha ya bona luli ye ne ba ngile sina mw'a n'a ba laelezi Muñ'a Bupilo ka Mushe.
Joshua u yaha katala
10Ha ba t'o fita fa Gililoti, fa munanga wa Nuka ya Jordani kwa neku la Kanana, ba yaha katala ka katuna ka ka buheha, hona fa munanga wa nuka. 11Ba sicaba sa Isilaele ba ba siyezi ba utwa taba yeo. Ba bulelelwa manzwi a li, “A mu utwe! Batu ba masika a Rubeni, Gadi ni kalulo ye ñwi ya lusika lwa Manase ba yahile katala kwa Gililoti, fakaufi ni mululwani wa Kanana, neku la kwanu ku luna la Jordani!” 12Ba sicaba sa Isilaele ha ba utwa cwalo, ba t'o kopanela kwa Shilo kaufel'a bona, kuli ba y'o ba lwanisa.
13Ba luma Finehasi, mwan'a muprisita Eliazare, kwa batu ba masika a Rubeni, Gadi ni kalulo ya lusika lwa Manase, mwa naha ya Giliadi. 14Manduna ba lishumi ba ya ni Finehasi. Kwa zwa nduna a li muñwi mwa lusika ni lusika lwa Isilaele. Yo muñwi ni yo muñwi wa bona n'a yemela ba mba ya habo. 15Ba taha mwa naha ya Giliadi, mi ba t'o li kwa batu ba Rubeni, Gadi ni kalulo ya ba Manase, 16#Mul 12.13-14 “Se, ki sona se si bulelwa ki sicaba sa Muñ'a Bupilo. Ba li, ‘Kiñi ha mu ezelize Mulimu wa Isilaele nto ye maswe cwalo? Mu fetuhezi Muñ'a Bupilo ka ku ikahela katala ka! Ha mu sa mu latelela! 17#Lipa 25.1-9 Mu hupule sibi sa kwa Peori, Muñ'a Bupilo h'a utwisa batu ba hae butuku? Lu sa nyanda ni ka nako ye kabakala yona taba yeo. Kana sibi sani ne si sa likani, nji? 18Kana mu tuha mu tuhela ku latelela Muñ'a Bupilo, nji? Haiba mu mu fetuhela kacenu, kamuso u ta nyemela batu ba Isilaele kamukana. 19Cwalehe, haiba ku sa lukeli ku lapela mwa naha ya mina mu tahe mwa naha ya Muñ'a Bupilo mo ku na ni Tabelenakele ya hae. Mu lu kupe naha. Kono mu si ke mwa fetuhela Muñ'a Bupilo, kamba luna, ka ku ikahela katala ka sili ku ekeza fa katala ka Muñ'a Bupilo, Mulimu wa luna. 20#Josh 7.1-26 Mu hupule kuli Akani, mwan'a Zera, n'a hanile ku buluka taelo ka lika ze ne laulezwi ku sinyiwa, mi kabakala hae, sicaba sa Isilaele kamukana sa utwiswa butuku. I n'e si Akani feela ya n'a shwile kabakala sibi sa hae!’ ”
21Batu ba masika a Rubeni, Gadi ni kalulo ya lusika lwa Manase ba alaba litoho za limba za Isilaele, ba li, 22“Ya Maata ki Mulimu! Luli Ya Maata ki Mulimu! Ki yena Muñ'a Bupilo! Wa ziba, yena, kuli kiñi ha lu ezize cwalo, mi ni mina mu swanezi ku ziba cwalo! Haiba lu fetuhezi Muñ'a Bupilo ni ku mu foseza, mu si ke mwa lu tuhela lu nze lu pila! 23Haiba lu hanyelize Muñ'a Bupilo mi lwa ikahela katala ka luna ku ciseza fateñi litabelo, kamba ku ka sebelisa ka limpo za lico kamba litabelo za buitumelo, Muñ'a Bupilo a be yena muatuli wa luna. 24Lu ezize cwalo kabakala ku saba kuli kwa mazazi a taha, baikuliyenu ba ta li kwa baikuliyetu, ‘Mu na ni taba mañi ni Muñ'a Bupilo Mulimu wa Isilaele? 25Muñ'a Bupilo u beile mululwani wa Nuka ya Jordani mwahal'a luna ni mina, batu ba Rubeni ni Gadi. Ha mu na tukelo ku Muñ'a Bupilo.’ Fohe mwendi bana ba mina ba ka swana ba tuhelisa bana ba luna ku lapela Muñ'a Bupilo. 26Katala ke lu yaha ha si ka ku ciseza litabelo kambe ku eza limpo. 27Lu ka yahezi kuli ka be sisupo kwa litopa ze peli za luna, ni masika a ka taha mwamulaho a luna, lu batu ba ba lapela Muñ'a Bupilo ka limpo za luna ze ciswa, ni ka litabelo ni limpo za buitumelo. Wo i n'e li mukwa wa ku hanisa bana ba mina kuli ba si ke ba bulelela bana ba luna ka nako ye taha kuli, ‘Mina, ha mu na taba ni Muñ'a Bupilo.’ 28I n'e li ona mulelo wa luna kuli, haiba ku ka ezahala cwalo, lu kone ku bulela kuli, ‘A mu bone! Bati bo kukw'a luna ba yahile katala ka ka swana ni ka Muñ'a Bupilo. I n'e si katala ka ku ciseza litabelo kamba ka ku ezeza limpo, kono i n'e li sisupo kwa litopa za luna ze peli.’ 29Ne lu sa hupuli kuli lu ka fetuhela Muñ'a Bupilo, kamba ku palelwa ku mu latelela ka nako ye, ka ku yaha katala fo ku ciseswa limpo za lico kamba litabelo. Batili, ne lu si ke lwa yaha katala ka kañwi kwand'a katala ka Muñ'a Bupilo, Mulimu wa luna, ka ka yemi fapil'a Tabelenakele ya hae.”
30Muprisita Finehasi, ni manduna ba sicaba ba ba ne ba tile ni yena, ni litoho za limba za Isilaele, ba utwa ze ne bulelwa ki ba masika a Rubeni, Gadi ni Manase, mi ba taba. 31Finehasi, mwan'a muprisita Eliazare, a li kwa batu ba Rubeni, Gadi ni Manase, “Cwale lwa ziba kuli Muñ'a Bupilo u sa na ni luna, kakuli ha mu si ka mu fetuhela. Mu pilisize bana ba Isilaele kwa ku utwiswa butuku ki Muñ'a Bupilo.”
32Cwale Finehasi ni manduna ba siya batu ba Rubeni ni Gadi mwa naha ya Giliadi. Ba kutela kwa Kanana, kwa batu ba Isilaele, mi ba y'o ba taluseza. 33Piho ya bona ya tabisa sicaba sa Isilaele. Ba lumba Mulimu, mi ha ba si ka bulela hape ka za ku ya kwa ndwa ni ku sinya naha mo ne ba yahile batu ba Rubeni ni Gadi.
34Batu ba Rubeni ni Gadi ba beya katala kao libizo la Paki, kakuli ba li, “Ki paki ku luna kaufela kuli Muñ'a Bupilo ki Mulimu.”
Lozi Interconfessional Bible, Catholic Edition © Bible Society of Zambia, 2009.