Joshua 24
24
Joshua u bulela kwa batu mwa Sikemi
1Joshua a kopanyeza masika kamukana a Isilaele kwa Sikemi. A biza bahulu, manduna, baatuli ni bazamaisi ba Isilaele, mi ba taha fapil'a Mulimu. 2#Sim 11.27 Joshua kih'a li kwa batu kaufela, “S'a bulela Muñ'a Bupilo, Mulimu wa Isilaele ki se, u li, ‘Kale-kale bo kukw'a mina ne ba yahile mwabuse bwa Nuka ya Yuferati, mi ne ba lapela milimu i sili. Yo muñwi wa bo kukw'a mina bao i n'e li Tera, yena ndat'ahe Abrahama ni Nakori. 3#Sim 12.1-9; 21.1-3 Cwale na zwisa Abrahama mwa naha, na mu silisa Nuka ya Yuferati mi na mu zamaisa mwa naha kaufela ya Kanana. Na mu fa baikulu ba bañata. Na mu fa Isaka. 4#Sim 25.24-26; 36.8; 46.1-7; Mul 2.5 Mi Isaka na mu fa Jakobo ni Isau. Isau na mu fa naha ya malundu a Seiri kuli i be ya hae, kono Jakobo ni bana ba hae ba ya kwa Egepita. 5#Mut 3.1—12.42 Cwale na luma Mushe ni Aruni, mi na tisa sinyehelo ye tuna mwa Egepita. Kiha ni mi zwisa mwateñi. 6#Mut 14.1-31 Ni zwisize bo ndat'a mina mwa Egepita, mi ba y'o fita kwa Liwate le Lifubelu. Maegepita, ba ba lelekisa ka likoloi ni bazamaisi ba zona mane ba y'o fita kwa liwate. 7Kono ha ba se ba ni lapezi ka lipilu za bona kaufela, na tisa lififi mwahal'a bona ni Maegepita. Maegepita bao na ba kwahela ka liwate. Mu boni se ni ezize kwa Egepita.
“‘Mu pilile nako ye telele mwa lihalaupa. 8#Lipa 21.21-35 Cwale na mi tisa mwa naha ya Maamori ba ba ne ba yahile kwa upa wa Nuka ya Jordani. Ba mi lwanisize, mi na mi fa maata a ku ba tula. Mu ngile naha ya bona, mi ni ba bulaile fapil'a mina. 9#Lipa 22.1—24.25 Cwale Balaki mwan'a Zipori, mulen'a Moabi, a lwanisa Maisilaele. A lumela linzwi ku Balaami, mwan'a Beori, mi a mu kupa kuli a mi kute. 10Kono ha ni si ka mu teeleza bakeñisa sikuto, mane a mi fuyaula, mi na mi pilisa ku Balaki. 11#Josh 3.14-17; 6.1-21 Mu silile Nuka ya Jordani, mwa t'o kena mwa Jeriko. Batu ba mwa Jeriko ba mi lwanisa sina mo ba mi lwaniselize Maamori, Maperizi, Makanana, Mahiti, Magirigashi, Mahivi ni Majebuse cwalo. Ni mi file maata a ku ba fenya. 12#Mut 23.28; Mul 7.20 Na lumela ze sabisa fapil'a mina ku leleka malena ba Maamori ba babeli. I n'e si ka lisabule ni masho a mina. 13#Mul 6.10-11 Ni mi file naha ye ne mu si ka sebelisa ni minzi ye ne mu si ka yaha. Mu inzi hona mo, mu nze mu ca miselo ya likota za veine ni liolive za likota ze mu si ka cala.’
14“Cwalehe, mu lapele Muñ'a Bupilo, mi mu mu sebeleze ka pilu ya mina kaufela ni ka ku sepahala. Mu libale milimu ye ne ba lapela bo kukw'a mina mwa Mesopotamia ni mwa Egepita, mi mu sebeleze Muñ'a Bupilo. 15Ha mu sa lati ku sebeleza Muñ'a Bupilo, mu iketele kacenu ye mu lata ku sebeleza, milimu ye sebelizwe ki bo kukw'a mina mwa naha ya Mesopotamia, kamba milimu ya Maamori, bao mu pila mwa naha ya bona ka nako ye. Haili na, ni ba ndu ya ka, lu ta sebeleza Muñ'a Bupilo.”
16Batu ba alaba, ba li, “Ha lu na ku hupula ku fulalela Muñ'a Bupilo ku y'o sebeleza milimu i sili! 17Muñ'a Bupilo, Mulimu wa luna, u zwisize bo ndat'a luna ni luna cwalo mwa butanga, mwa naha ya Egepita, mi lu iponezi lika ze tuna z'a ezize. U lu babalezi hande mo ne lu zamaya kaufela, mwahal'a macaba kamukana mo lu fitile. 18Ha ne lu sutelela, Muñ'a Bupilo, yena, n'a lelekisa batu, sina Maamori ba ba ne ba yahile mwa naha. Cwale ni luna cwalo lu ta sebeleza Muñ'a Bupilo. Ki yena Mulimu wa luna.”
19Joshua a li kwa batu, “Ha mu koni ku sebeleza Muñ'a Bupilo, mu nze mu sebeleza milimu i sili, kakuli yena ki Mulimu ya kenile, ya na ni lifufa. H'a na ku swalela libi ni lifoso za mina. 20Haiba mu fulalela Muñ'a Bupilo ku y'o sebeleza milimu i sili, u ta mi fulalela ni yena, a mi utwise butuku. U ta mi bulaya, niha n'a bile ni musa ku mina kwa makalelo.”
21Batu ba li ku Joshua, “Batili! Lu ta sebeleza Muñ'a Bupilo.”
22Joshua a ba bulelela, a li, “Mu ipakezi ili mina ka ku iketela ku sebeleza Muñ'a Bupilo.”
Ba li, “Eeni, lu lipaki.”
23Kih'a li, “Cwale mu zwise milimu i sili ye mu na ni yona, mi mu ise lipilu za mina ku Muñ'a Bupilo, Mulimu wa Isilaele.”
24Sicaba sa li ku Joshua, “Lu ta sebeleza Muñ'a Bupilo, Mulimu wa luna, ni ku buluka litaelo za hae.”
25Joshua kih'a eza bulikani ni sicaba lona lizazi leo, mi hona ko kwa Sikemi a ba fa milao ni litaelo. 26Joshua a ñola litaelo zeo mwa Buka ya Mulao wa Mulimu. A nga licwe le lituna, mi a li yemisa hona fo, mwatas'a kota ya oke, mwa sibaka se si kenile sa Muñ'a Bupilo. 27Kih'a li kwa sicaba kaufela, “Mu talime licwe le! Li ta ba paki ya luna. Li utwile manzwi kamukana a' lu bulelezwi ki Muñ'a Bupilo. Cwale li ta ba paki ye sa mi yemeli, ye ta mi hanisa ku fulalela Mulimu.” 28Joshua kih'a lukulula batu, mi yo muñwi ni yo muñwi a kutela kwa hae.
Joshua ni Eliazare ba shwa
29Mwamulaho a zeo, Joshua mwan'a Nuni, mutang'a Muñ'a Bupilo, a shwa a nz'a na ni lilimo ze mwanda ka lishumi. 30#Josh 19.49-50 Ba mu buluka mwa mubu wa hae kwa Timinati-Sera, mwa naha ya malundu a Eferaimi, kwa mutulo wa Lilundu la Gaashi.
31Sicaba sa Isilaele sa sebeleza Mulimu nako ya n'a pila Joshua. Mi mwamulaho a lifu la hae, ba zwelapili ku sebeleza Muñ'a Bupilo cwalo ha ne ku sa pila bazamaisi ba ba ne ba zibile lika kamukana zeo Muñ'a Bupilo n'a li ezelize sicaba sa Isilaele.
32 #
Sim 33.19; 50.24-25; Mut 13.19; Joa 4.5; Lik 7.16 Masapo a Josefa a n'a tisizwe ki sicaba sa Isilaele ku zwa kwa Egepita, a pumbekiwa mwa Sikemi, mwa kabunyana ka n'a lekile Jakobo kwa bana ba Hamori, ndat'ahe Sikemi, ka muwaya-waya wa silivela o n'o eza mwanda. Naha yeo ya ba ya baikulu ba Josefa.
33Eliazare mwan'a Aruni a shwa, mi a bulukwa mwa Gibeyati, munzi wa mwan'a hae Finehasi, w'a n'a filwe mwa naha ya malundu a Eferaimi.
Lozi Interconfessional Bible, Catholic Edition © Bible Society of Zambia, 2009.