Joshua 1
1
Buitukiso bwa ku hapa naha ya Kanana
1Mushe mutang'a Muñ'a Bupilo ha s'a shwile, Muñ'a Bupilo a li ku mutusi wa Mushe, yena Joshua, mwan'a Nuni, 2“Mutang'a ka Mushe u shwile. U itukise cwale, wena ni batu ba Isilaele kamukana, mu sile Nuka ya Jordani, mi mu ye mwa naha ye ni mi fa yona. 3#Mul 11.24-25 Sina ha ne ni bulelezi Mushe, ni mi file naha kaufela ye mu ta zamaya ku yona, mina sicaba sa ka. 4Milulwani ya mina i ta kalela kwa lihalaupa le li kwa mboela, ku y'o fita kwa malundu a Lebanoni a kwa mutulo. Kwa upa, i ta kalela kwa nuka ye tuna ya Yuferati, mane ku ngelela cwalo ni naha ya Mahiti, ku be ku y'o fita kwa liwate le lituna la kwa wiko. 5#Mul 31.6, 8; Maheb 13.5 Ha ku na ya ka kona ku ku tula mwa bupilo bwa hao kaufela. Ni ta ba ni wena sina mo ne ni bezi ni Mushe. Ha ni na ku ku siya ni kamuta. 6#Mul 31.6, 7, 23 U tiye, u be ni bundume, kakuli ki wena ya ka etelela sicaba se ha si hapa naha ye ni sepisize bo kukw'a bona kuli ni ta ba fa yona. 7Konohe u itiise, u be ni bundume luli, mi u tokomele kuli u latelele Mulao kaufela w'a ku file mutang'a ka Mushe. U si ke wa limbulula nihaili kalulo ye ñwi ya ona, mi za hao kaufela li ta konda kai ni kai k'o ya. 8U si ke wa libala ni kamuta Buka ya Mulao. U n'o ituta yona busihu ni musihali, mi u bone kuli u latelela ze ñozwi mwateñi kaufela. Fohe, u ta zwelapili ni ku kondisa z'o eza kamukana. 9U hupule feela taelo ya ka, ‘U tiye, mi u be ni bundume.’ U si ke wa saba kamba ku zwafa, kakuli na, Muñ'a Bupilo, Mulimu wa hao, ni ta ba ni wena kai ni kai k'o ta ya.”
10Cwale Joshua a laela manduna ba sicaba, a li, 11“Mu zamaye mwa mafulo kaufela mu nze mu bulelela batu, mu li, ‘Mu lukise mifaho ya mina, kakuli mwamulaho a mazazi a malalu mu ta sila Nuka ya Jordani ku y'o hapa naha y'a mi fa Muñ'a Bupilo, Mulimu wa mina.’ ”
12 #
Lipa 32.28-32; Mul 3.18-20; Josh 22.1-6 Joshua a li kwa masika a bo Rubeni ni Gadi, ni kwa kalulo ye ñwi ya lusika lwa Manase: 13“Mu hupule s'a n'a mi bulelezi Mushe, mutang'a Muñ'a Bupilo, h'a n'a ize, ‘Muñ'a Bupilo, Mulimu wa mina, u ta mi fa naha ye kuli i be ya mina.’ 14Basali, bana ni likomu za mina ba ta ina mwa naha y'a mi file Mushe, hona kwanu kwa neku la upa wa Nuka ya Jordani. Kono masole ku mina ba ta sila ba li kwapil'a banabahabo mina, bona Maisilaele, ba itukiselize ku ba tusa mwa ndwa. 15Ni bona cwalo ha ba se ba hapile naha y'a ba file Muñ'a Bupilo, Mulimu wa mina, mi ku bonahala kuli i s'e iketile, fohe ni mina mu ta kutela mwa naha ya mina, ye mu filwe ki Mushe mutang'a Muñ'a Bupilo, ili buse bwa kwanu bwa Nuka ya Jordani.”
16Ba alaba Joshua, ba li, “Lu ta eza z'o lu bulelezi kaufela, mi lu ta ya kai ni kai k'o ta lu luma. 17Lu ta ku utwa sina mo ne lu utwela Mushe, feela Muñ'a Bupilo, Mulimu wa hao, a be ni wena sina mw'a n'a bezi ni Mushe! 18Ufi ni ufi ya ka hanyeza kamba ku hana litaelo za hao, i be ze cwañi kamba cwañi, yo u ta bulaiwa. U tiye feela mi u be ni bundume.”
Lozi Interconfessional Bible, Catholic Edition © Bible Society of Zambia, 2009.