Isaya 8
8
Isaya u pepelwa mushimani
1Muñ'a Bupilo a li ku na, “Nga litapa le lituna, mi u ñole fateñi ka litaku ze tuna, u li, ‘Hapa kapili, akufisa ku lobela tutu ye hapilwe!’ 2U nge banna ba babeli ba ba sepahala, ili muprisita Uria ni Zakaria mwan'a Jeberekia, ku ba lipaki.”
3Mwamulahonyana, na zibana ni musal'a ka. A itwala, mi a pepa mwana wa mushimani. Muñ'a Bupilo a ni bulelela, a li, “U mu beye libizo la Hapa-kapili, Akufisa-ku-lobela-tutu. 4Pili mwanana a si ka tiya ni ku kona ku biza Mama ni Tate, tutu ya Damaseka kamukana ni ze hapilwe mwa Samaria kaufela li ta ngiwa ki mulena wa Asiria.”
Mulena wa Asiria wa taha
5Muñ'a Bupilo a bulela ni na hape. 6A li, “Batu ba, ba hanile mezi a kuzize a kwa mulapo wa Siloe, mi ba njanja fapil'a Mulena Rezini ni Mulena Peka. 7Kihona kuli na, Muñ'a Bupilo, ni ta tisa mulena wa Asiria ni limpi za hae kaufela ku t'o lwanisa Juda. Ba ta taha sina mendai a Nuka ya Yuferati, h'a tibisa minanga ya yona kamukana. 8Ba ta kena naha ya Juda kaufela, sina muunda o kumisa mwa mulala ni o apesa lika kamukana.
Mafufa a bona a' ambalalile a ta unsafaza naha. Mulimu u lu puluse!”
9Mina macaba, mu kopane hamoho ka sabo! Mu teeleze, mina libaka za lifasi ze kwahule. Mu itukiseze ku t'o lwana, kono mu sabe! Ee, mu itukise, kono mu sabe! 10Mu eze milelo ya mina! Kono ha i na ku konda. Mu bulele ze mu bata kaufela! Kono ha li na tuso kamukana, kakuli Mulimu u na ni luna.
Mulena u lemusa mupolofita
11Ka maata a hae a matuna Muñ'a Bupilo u ni lemusize kuli ni si ke na latelela nzila ye ba latelela ba bañwi. U ize, 12#1 Pit 3.14-15 “U si ke wa kena mwa milelo ya batu, mi u si ke wa saba lika ze ba saba. 13Mu hupule kuli na, Muñ'a Bupilo ya Maata Kaufela, ni kenile. Ki na feela ye mu swanezi ku saba. 14#1 Pit 2.8 Kakuli ka ku kena kwa ka ko ku sabisa, ni swana ni licwe le ba sitatala ku lona batu. Ni swana ni siteo se si ta swasa batu ba mibuso ya Juda ni Isilaele, ni batu ba Jerusalema cwalo. 15Ba bañata ba ta sitatala ni ku wa. Ba ta wa mi ba pyatiwe. Ba ta swasiwa.”
Temuso ka za ku buza ba ba shwile
16Balutiwa ba ka ba lukela ku tokomela ni ku buluka litaba z'a ni file Mulimu. 17#Maheb 2.13 Muñ'a Bupilo u ipatile kwa batu ba hae, kono na mu kolwa, mi ni beile sepo ya ka ku yena.
18 #
Maheb 2.13
Ki na yo ni bana b'a ni file Muñ'a Bupilo. Muñ'a Bupilo ya Maata Kaufela, ya na ni lubona lwa hae fa Lilundu la Sione, u ezize kuli lu be inge manzwi a pila kwa sicaba sa Isilaele.
19Batu ba ta mi bulelela ku y'o buza litaba kwa balauli ni liñomboti, ba ba shobota ni ku umbuna-umbuna. Ba ta li, “Ha si fo, bunde n'e ka ba kuli batu ba buze litaba kwa milimu, ba buze ba ba shwile bakeñisa ba ba pila.”
20Mu ba alabe, mu li, “Mu teeleze z'a mi luta Muñ'a Bupilo! Mu si ke mwa teeleza kwa liñomboti. Ze ba ta mi bulelela ha li na ku mi tusa se siñwi.”
Nako ya maswenyeho
21Batu ba ta yambaela mwa naha, ba zwafile ni ku shwa tala. Mwa tala ni bunyemi bwa bona ba ta kuta mulen'a bona ni Mulimu wa bona. Ba ka na ba talima kwahalimu. 22Mwendi ba ka lubukela fafasi, kono ha ku na se ba ta bona konji manyando ni lififi, ili lififi le li sabisa mo ba isiwa. Ha ku na ku ba ni mukwa o ba ta pima nako yeo ya manyando.
Lozi Interconfessional Bible, Catholic Edition © Bible Society of Zambia, 2009.