Isaya 7
7
Litaba ze lumezwi Mulena Akazi
1 #
2 Male 16.5; 2 Lita 28.5-6 Mulena Akazi, mwan'a Jotami ni muikulu wa Oziasi, ha n'a busa Juda, kwa zuha ndwa. Rezini mulena wa Siria, ni Peka mwan'a Remalya, mulena wa Isilaele, ba lwanisa Jerusalema, kono ba palelwa ku u hapa.
2Linzwi la y'o fita ku mulena wa Juda kuli limpi za Siria li se li keni kale mwa naha ya Isilaele. Yena ni batu ba hae kamukana ba saba maswe, mi ba njanja sina likota ze nyungiwa ki moya.
3Muñ'a Bupilo a li ku Isaya, “Nga mwan'a hao Sheari Jashubi, mi mu zamaye, mu y'o katanyeza Mulena Akazi. Mu ta mu fumana mwa mukwakwa fo ba belekela baluki ba masila, kwa mafelelezo a mukokolombwa o tisa mezi ku zwa mwa lisa le li fa ñambamo. 4Mu mu bulelele kuli a ine ka maseme, a kuzise, a sa sabi kamba ku filikana. Buhali bwa Mulena Rezini ni Masiria ba hae, hamoho ni bwa Mulena Peka ha bu sa na kozi ye fita ya musi o tunya fa tukota to tubeli. 5Siria, hamoho ni Isilaele ni mulen'a yona, ba ezize mulelo. 6Ba lela ku y'o taseza Juda, ili ku y'o sabisa batu kuli ba lumele ku kena ku bona, mi ba beya mwan'a Tabeele fa bulena.
7“Kono na, Muñ'a Bupilo, ni tiisa kuli zeo ha li na ku ezahala. 8Kabakalañi? Kakuli naha ya Siria ha i fiti Damaseka kwa maata, mi Damaseka ha u fiti Mulena Rezini. Haili ka naha ya Isilaele, i ta be i sinyehile maswe mwa lilimo ze silezi kapa ze ketalizoho ze sa taha mi ha i sa na ku ba sicaba hape. 9Isilaele ha i fiti munzi wa Samaria kwa maata, mi munzi wa Samaria ha u fiti Mulena Peka kwa maata.
“Tumelo ya mina ha i si na maata, ha mu na ku tiya.”
Sisupo sa Emanuele
10Muñ'a Bupilo a lumela manzwi a mañwi hape ku Akazi, a li, 11“Kupa Muñ'a Bupilo, Mulimu wa hao, kuli a ku fe sisupo. Si ka ba se si zwa kwatasi, mwa lifasi la ba ba shwile, kamba kwahalimu, mwa lihalimu.”
12Akazi a ikeza inge ya saba Mulimu, mi a alaba, a li, “Ha ni na ku kupa sisupo. Ha ni lati ku lika Muñ'a Bupilo.”
13Isaya kih'a li, “Teeleza cwale, muikulu wa Mulena Davida. Ki nto ye maswe hahulu ku filikanya buiswalo bwa batu, kana u ta filikanya cwalo ni buiswalo bwa Mulimu, nji? 14#Mat 1.23 Cwale Mulena kasibili u ta ku fa sisupo. Ku na ni kalibe ye itwezi. U ta pepa mwana wa mushimani mi u ta bizwa Emanuele. 15Ha s'a hulile ni ku ikezeza z'a lata, lico za hae li ta ba mabisi ni linosi feela. 16Mane nako yeo i si ka fita kale, manaha a malena ba babeli bao, ba ba ku sabisa, a ta shandauka.
17“Muñ'a Bupilo u tuh'a tiseza wena ni batu ba hao, mane ni ba lusika lwa bulena kaufela, mazazi a manyando a maswe ku fita a n'a tile kamukana ku kalela fo u kauhela mubuso wa Isilaele ku wa Juda. U tuh'a tisa mulena wa Asiria!
18“Nako yeo ha i ta fita, Muñ'a Bupilo u ta lizeza Maegepita muloli kuli ba tahe ka buñata sina linzi, ku zwa kwa linukana za Nile ze kwahule, ni Masiria kuli ba zwe mwa linaha za bona sina limuka. 19Mi ba ta ina mwa misindi ni mañope a macwe, mi ba ta apesa mikakani kaufela ni mafulelo kamukana.
20“Nako yeo ha i ta fita, Muñ'a Bupilo u ta biza mukuti ya zwa mwabuse bwa Nuka ya Yuferati, mulena wa Asiria. U ta mi kuta milelu. U ta kuta milili kwa litoho za mina ni bwambo fa mibili.
21“Nako yeo ha i ta fita, mwendi mulimi a ka ba ni komu i liñwi ni lipuli ze peli feela. 22Nihakulicwalo li ta sisa hahulu, mane ku mu likane. Ee, ba ba pilile kamukana, ili ba ba siyezi mwa naha, ba ta ca mabisi ni linosi.
23“Nako yeo ha i ta fita, masimu a mande a na ni likota za veine ze sikiti, mi a lekilwe ye ñwi ni ye ñwi ka muwaya-waya wa silivela o eza sikiti, a ta mela mikakani ni miondo. 24Ha ku na ya ka ituma pilu ku ya mwateñi konji h'a sweli buta ni masho. Ee, naha kaufela i ka tala mikakani ni miondo. 25Mwa malundu kamukana mo ne ku limiwa lico ku ta ñañana miutwa feela mane mutu a palelwe ku hata mwateñi. I ta ba sibaka sa mafulelo a likomu ni lingu.”
Lozi Interconfessional Bible, Catholic Edition © Bible Society of Zambia, 2009.