Isaya 9
9
Mulena ya ta busa
1 #
Mat 4.15
Naha ya masika a Zebuloni ni Nafetali n'e kile ya tompololwa, kono kwapili likute li ka taha mwa sibaka mo, ku kalela kwa Liwate la Mediteranea ku isa kwa upa kwa naha ye mwabuse bwa Jordani, kwa Galilea kasibili, ko ba ina balicaba.
2 #
Mat 4.16; Luk 1.79 Batu ba ba ne ba zamaya mwa lififi
ba boni liseli le lituna!
Ba pilile mwa naha ya miluti,
kono cwale ba benyezwa ki liseli.
3U ba tabisize, Muñ'a Bupilo.
U ba file tabo ye tuna.
Ba tabela s'o ezize,
sina mo ba tabela batu ha ba kutula,
kamba ha ba ikabela tutu ye hapilwe.
4U lobile joko ye n'e ba imela
ni tupa ye n'e ba nata fa maheta.
Wena, Muñ'a Bupilo, u tuzi sicaba
se ne si nyandisa
ni ku tukuta batu ba hao
sina m'o n'o tulezi
mpi ya Mamidiani kale.
5Makatulo a mpi ya balwani
hamoho ni liapalo za bona
ze lambakani mali
li ta sinyiwa ki mulilo!
6Lu pepezwi mwana!
Lu filwe wa mushimani!
Mi u ta ba mubusi wa luna.
U ta bizwa Nduna ya Butali,
Mulimu ya Maata,
Ndate wa Kamita,
Mulen'a Kozo.
7 #
Luk 1.32-33
Maata a hae a bulena a ta na hula.
Mubuso wa hae
u ta ba mwa kozo kamita.
U ta busa sina shwana
wa Mulena Davida,
mi u ta toma maata a hae fa mulao
o lukile, cwale ni kuya kuile.
Muñ'a Bupilo ya Maata Kaufela
u itukiselize ku eza ze kamukana.
Mulena u ta utwisa Isilaele butuku
8Mulena u s'a bulezi katulo ya mubuso wa Isilaele, ili bona baikulu ba Jakobo. 9Batu ba Isilaele kaufela, mañi ni mañi ya pila mwa munzi wa Samaria, u ta ziba kuli ki Mulena ya ezize cwalo. Ka nako ye ba ikuhumusa ni ku ipahamisa. Ba li, 10“Miyaho ya litina i wile, kono lu ta i yolisa ka miyaho ya macwe. Likota za sikomora li lemilwe, kono luna, lu ta li yolisa ka likota ze nde za sidare.”
11Muñ'a Bupilo u susuelize lila za bona ku y'o ba lwanisa. 12Masiria kwa upa ni Mafilisita kwa wiko ba atamisize milomo ya bona ku komeza Isilaele. Nihakulicwalo buhali bwa Muñ'a Bupilo ha bu si ka fela, kono lizoho la hae li sa otolohezi ku utwisa butuku.
13Batu ba Isilaele ha ba si ka baka. Niha ba natilwe ki Muñ'a Bupilo ya Maata Kaufela, ha ba si ka kutela ku yena. 14Muñ'a Bupilo u ta utwisa baeteleli ba Isilaele ni batu ba bona butuku ka zazi li li liñwi feela. U ta wengula toho ni muhata. 15Toho ki bona ba bahulu ni batu ba ba kutekeha, mi muhata ki bona bapolofita ba ba luta za buhata! 16Ba ba etelela batu ba, ba ba kelusize ni ku ba lyanganisa luli. 17Kabakaleo, Mulena h'a na ku bandisa nihaili a li muñwi wa ba banca, mi h'a na ku ba ni makeke ku mbelwa ufi ni ufi kamba kwa lindiala, kakuli batu kamukana ki bahedeni mi ba maswe, ni ze ba bulela kaufela ha si za ngana. Kono nihakulicwalo buhali bwa Muñ'a Bupilo bu ta be bu si ka fela, mi lizoho la hae li ta be li sa otolohezi ku utwisa butuku.
18Bumaswe bwa batu bu tuka sina mulilo o cisa mikakani ni liseto. Bu cisa sina lubya mwa mushitu, lo lu tunyiseza musi mwahalimu. 19Kakuli Muñ'a Bupilo ya Maata Kaufela u nyemile, tupa ya hae i cisa sina mulilo mwa naha kaufela mi i bulaya batu. Ha ku na ya bilaela ka wahabo. 20Kai ni kai mwa naha batu ba swala ni ku ca kaco kafi ni kafi ke ba fumana, kono ha ba kuliswi. Mane ba ca ni bana ba bona luli! 21Batu ba Manase ni ba Eferaimi ba itwanisa, mi hamoho ba lwanisa Juda. Nihakulicwalo, buhali bwa Muñ'a Bupilo ha bu si ka fela, kono lizoho la hae li sa otolohezi ku utwisa butuku.
Lozi Interconfessional Bible, Catholic Edition © Bible Society of Zambia, 2009.