Isaya 64
64
1Kiñi ha u sa pazuli lihalimu, mi wa shetumuka? Malundu n'a ka ku bona mi a ngangamiswa ki sabo! 2N'a ta kuña sina mezi a bila fa liiso. Taha, mi u t'o bonahaza maata a hao kwa lila za hao, ili kuli macaba a njanjiswe ki ku ba teñi kwa hao. 3U kile wa taha, mi wa t'o eza lika ze sabisa ze ne lu si ka libelela. Malundu a ku bona, mi a nyanganyiswa ki sabo. 4#1 Bakor 2.9 Ne ku si na ya n'a boni kamba ku utwa za Mulimu ya swana ni wena, ya eza likezo ze cwana ku tusa ba ba beile sepo ya bona ku yena. 5U amuhela ka tabo ba ba tabela ku eza ze lukile, bona ba ba hupula m'o latela kuli ba pile. U n'o lu nyemezi, kono lwa zwelapili lu nze lu ku foseza. Niha n'o nyemile cwalo, lwa zwelapili lu nze lu eza ze maswe ku zwa kwakale. 6Kaufel'a luna lu ezize sibi, mane ni yona mikwa ya luna ye minde i silafalile. Kabakala libi za luna lu swana ni matali a nyanine a fefulwa ki moya. 7Ha ku na ya sikuluhela ku wena ka tapelo. Ha ku na ya t'o bata tuso ku wena. U ipatezi luna, mi u lu tuhezi kabakala libi za luna.
8Kono Muñ'a Bupilo, u Ndat'a luna. Lu swana ni lizupa, mi wena u mubupi. Kaufel'a luna lu musebezi wa mazoho a hao. 9Hakulicwalo u si ke wa lu nyemela hahulu, kamba ku hupula sibi sa luna kuya kuile. Lu batu ba hao. U be ni musa ku luna. 10Minzi ya hao ye kenile i se i swana ni lihalaupa, mi Jerusalema u sabezwi, i s'e li matota. 11Tempele ya luna, sibaka se sinde se si kenile, mo ne ba ku lumbekela bo kukw'a luna, i sinyizwe ki mulilo. Libaka ze ne lu lata kaufela s'e li matota. 12Muñ'a Bupilo, kana zeo kamukana ha li ku sisimuni, nji? Kikuli ha ku na s'o ka eza, mi lu ine cwalo lu nze lu nyanda mane lu palelwe ni ku itiisa, nji?
Lozi Interconfessional Bible, Catholic Edition © Bible Society of Zambia, 2009.