Isaya 63
63
Macaba a ka tulwa ki Muñ'a Bupilo
1 #
Isa 34.5-17; Jer 49.7-22; Ezek 25.12-14; 35.1-15; Am 1.11-12; Obad 1-14; Mala 1.2-5 “Ki mañi yo ya zwa kwa Edomo, ya zwa kwa Bozira, a apezi liapalo ze nde-nde ze fubelu, yo ya bonahala ku zamaya a na ni maata?”
“Ki Muñ'a Bupilo, ya na ni maata kwa ku pilisa, ya t'o zibisa ku tula kwa hae.”
2“Liapalo za hae, kiñi ha li li ze fubelu cwana, sina za mutu ya luba miselo ya veine mwa silubelo?”
3 #
Sin 14.20; 19.13, 15 Muñ'a Bupilo wa alaba, u li, “Ni lubakezi macaba sina miselo ya veine, mi ha ku na ya til'o ni tusa. Ni a hatikezi ka buhali, mi mali a ona a lambakile liapalo za ka. 4Ni hupuzi kuli nako ya ku pilisa sicaba sa ka i n'e fitile, nako ya ku nata lila za bona. 5#Isa 59.16 Na komoka ha ni talima ni ku bona kuli ne ku si na ya n'a ka ni tusa. Kono ku halifa kwa ka ku ni file maata, mi na tula ili na. 6Mwa ku halifa kwa ka ni hatikezi macaba mwa butuna bwa ona, mi n'a tuba-tuba. Na sululela mali a ona fafasi.”
Bunde bwa Muñ'a Bupilo ku ba Isilaele
7Ni ta bulela ka za lilato le li sa feli la Muñ'a Bupilo. Na mu lumba ka z'a lu ezelize zona kaufela. U fuyauzi hahulu batu ba Isilaele, kabakala musa ni lilato la hae le li sa feli.
8Muñ'a Bupilo a li, “Ki batu ba ka. Ha ba na ku ni puma.” Mi kabakaleo a ba pilisa. 9A ba pilisa mwa manyando a bona kamukana. I n'e si lingeloi, kono n'e li yena Muñ'a Bupilo kasibili ya ba pilisize. Ka lilato ni makeke a hae a ba yangwela. N'a ba babalezi kamuta ka linako ze felile. 10Kono ba mu fetuhela, mi ba mu swabisa. Cwale Muñ'a Bupilo a ba sila sa bona, mi a ba lwanisa.
11Kono cwale ba hupula za kwakale, za mazazi a Mushe mutang'a Muñ'a Bupilo, mi ba buza, ba li, “Kanti cwale Muñ'a Bupilo u kai ya n'a pilisize baeteleli ba batu ba hae kwa liwate? U kai Muñ'a Bupilo ya n'a file Mushe maata a matuna? 12#Mut 14.21 Muñ'a Bupilo ya sebelisize maata a hae, mi a eza lika ze tuna ka Mushe, yena ya aluhanyize mezi a liwate mwa meeto a batu ba hae, kuli a tumise libizo la hae kuya kuile, u kakai?” 13Muñ'a Bupilo h'a ba etelela mwa mezi a buliba, ne ba hata hande sina lipizi za mwa naheñi, mi ha ba si ka sitatala. 14Sina likomu ha li y'o fuliswa mwa mafulelo a mande a mwa libala, ni Muñ'a Bupilo a pumulisa cwalo batu ba hae. Muñ'a Bupilo a etelela cwalo batu ba hae, mi libizo la hae la kutekeha.
Tapelo ya ku shwelwa makeke ni ku tusiwa
15Muñ'a Bupilo, kwa lihalimu koo, ko u inzi mwa kanya ni ku kena kwa hao, u lu talime. Ku lu tukufalelwa kwa hao ku kai? Maata a hao a inzi kakai? Lilato ni musa wa hao li ile kai? U si ke wa lu tuhela. 16U Ndat'a luna. Nihaili bo kukw'a luna bo Abrahama ni Jakobo ba palelwa ku lu tusa, kono wena, Muñ'a Bupilo u Mushemi wa luna. Ki wena ya lu pilisize ka linako kaufela. 17U lu tuheleziñi lu nze lu keluha linzila za hao? Kiñi ha u lu liselezi ku ba bahanyezi mane lwa ku fulalela? Kuta, kabakala ba ba ku sebeleza, ni kabakala batu ba ba bile ba hao nako kaufela.
18Lila za luna li batil'o lekiseleza batu ba hao, mi ba silafalize Tempele. 19U lu eza inge ha u si ka ba mubusi wa luna, inge ha lu si ka ba sicaba sa hao.
Lozi Interconfessional Bible, Catholic Edition © Bible Society of Zambia, 2009.