Isaya 65
65
Bafetuheli ba ta fiwa mulatu ki Mulimu
1 #
Baro 10.20
Muñ'a Bupilo a li, “Ne ni itukiselize ku alaba litapelo za batu ba ka, kono ha ba si ka lapela. Ne ni itukisize kuli ba ni fumane, kono ha ba si ka lika mane nihaili ku ni bata. Sicaba ha si si ka ni lapela, niha ne ni itukiselize ku alaba, ni li, ‘Ki na yo. Ni ta mi tusa!’ 2#Baro 10.21 Nako kaufela ni itukiselize ku amuhela hande batu ba, ba ba eza ze maswe ka bomu mi ba nga linzila za bona. 3Ha ba swabiswi ki ku tundamena ku ni nyemisa. Ba eza litabelo za sihedeni mwa masimu a milimu, mi ba cisa insense fa tutala twa sihedeni to tu yahilwe ka litina. 4Busihu ba ya kwa mañope a macwe ni kwa mayumbelo ku y'o buza mioya ya ba ba shwile. Bona batu ba, ba ca nama ya kulube, mi ba puka mulo wa nama ya litabelo za sihedeni. 5Cwale ba bulelela ba bañwi kuli ba ine kwahule ni bona, kakuli bona ba kenile hahulu, mi ha ba swaliwi. Ha ni koni ku utwana ni batu ba ba cwalo. Buhali bwa ka ku bona bu swana ni mulilo o sa timi.
6“Ni se ni hupuzi kale mo ni ta ba utwiseza butuku, mi katulo ya bona i se i ñozwi. Ha ni na ku tuhela ka bomu ze ba ezize, kono ba ta kutisezwa, ku bulela Muñ'a Bupilo. 7Ba ta kutisezwa kabakala libi za bona ni za bo kukw'a bona. Ba cisize insense fa libaka ze pahami za milimu ya sihedeni, ni ku bulela maswe ka na. Cwale ni ta ba fa mulatu o ba lukela.”
8Muñ'a Bupilo u li, “Ha ku na mutu ya ka sinya miselo ye minde ya veine. Bakeñisa ku i sinya, ba eza waine ka yona. Ni na cwalo, ha ni na ku sinyeleza batu ba ka kaufela. Ni ta pilisa ba ba ni sebeleza. 9Ni ta fuyaula Maisilaele ba lusika lwa Juda, mi baikulu ba bona ba ta luwa naha ya ka ya malundu. Batu ba ka ba ba ketilwe, ba ba ni sebeleza, ba ta ina hona koo. 10#Josh 7.24-26 Ba ta ni lapela, mi ba ta isa lingu ni likomu za bona kwa mafulelo mwa Libala la Sharoni mwa wiko, ni Libala la Akore kwa upa.
11“Kono ku ta ba ni fapahano ni mina ba ba ni hana, ba ba limbulula Sione, lilundu la ka le li kenile, mi ba lapela Gadi ni Meni, ili milimu ya litohonolo ni bumai. 12I ta ba bumai bwa mina ku shwa lifu la monde, kakuli ha mu si ka alaba ha ne ni mi biza, kamba ku teeleza ha ne ni bulela. Mu iketezi ku sa ni utwa ni ku eza ze maswe. 13Mi cwale na mi bulela kuli ba ba ni lapela ni ku ni utwa ba ta ba ni lico ze ñata ni ze nwiwa ze ñata, kono haili mina mu ta lapa ni ku nyolwa. Ba ka taba, kono mina mu ka swaba. 14Ba ta opeliswa ki tabo kono mina mu ta lila ka lipilu ze butuku. 15Batu ba ka, ba ba ketilwe, ba ta sebelisa libizo la mina inge sikuto. Mu ta bulaiwa ki na, Muñ'a Bupilo. Kono ba ba ni utwa ni ta ba fa libizo le linca. 16Mañi ni mañi ya bata ku fuyaulwa mwa naha u ta kupa ku fuyaulwa ki Mulimu, yena ya sepahala. Ya itama kaufela u ta konka ka libizo la Mulimu, yena ya sepahala. Manyando a kale a ta fela ni ku libalwa.”
Lika li bupiwa sinca
17 #
Isa 66.22; 2 Pit 3.13; Sin 21.1 Muñ'a Bupilo u li, “Cwale ni tuha ni eza lifasi le linca ni lihalimu le linca. Za kale ha li sa na ku hupulwa. 18Mu tabe, mi mu nyakalale kuya kuile ka se ni bupa. Jerusalema yo munca, ye ni ta eza, u ka tala tabo, ni batu ba mwateñi ba ta tangalala. 19#Sin 21.4 Na kasibili, ni ta ba ni tabo kabakala Jerusalema ni batu ba ona. Mwateñi, ha ku na ku ba ni lililo, mi lituso ha li na ku kupiwa. 20Ha ku na mwanana ya ta shwa a sa li mbututu, mi mutu ni mutu u ta pila nako ya hae kaufela. Ba ba ta pila lilimo ze mwanda ba ta hupulwa kuli ba shwile ba sa li ba banca. Ku shwa nako i si ka fita i ta ba sisupo sa kuli ni ba natile. 21Batu ba ta yaha mandu, mi ba ta ina ku ona. Ba ta cala masimu a likota za veine, mi ba ikole waine ya zona. 22Mandu a bona h'a na ku itusiswa ki batu ba sili. Waine ya bona ha i na ku nwiwa ki ba sili. Batu ba ka ba ta pila nako ye telele sina likota. Ba ta ikola ka ku tala lika ze ba sebelelize. 23Musebezi o ba eza u ta konda, mi bana ba bona ha ba na ku kopana ni maziezi. Ni ta ba fuyaula, bona, ni baikulu ba bona mwa linako ze taha kamukana. 24Mane ni ta alaba litapelo za bona ba si ka feza kale ku ni lapela. 25#Isa 11.6-9 Litongwani ni lingunyana li ta ca hamoho, mi litau li ta ca bucwañi sina mo li ezeza likomu. Linoha ha li sa na ku ba ni kozi. Fa lilundu la ka le li kenile la Sione, ha ku na ku ba ni se si maswe kamba se si holofaza.”
Lozi Interconfessional Bible, Catholic Edition © Bible Society of Zambia, 2009.