Isaya 5
5
Pina ya simu ya veine
1 #
Mat 21.33; Mar 12.1; Luk 20.9 Mu teeleze ha ni mi opelela pina ye, ili pina ya mulikan'a ka ni simu ya hae ya veine.
Mulikan'a ka n'a na ni simu ya veine
fa lilundu le li nunile.
2A lima mubu, mi a pumbula macwe.
Kih'a cala likota ze nde za veine.
A yaha tawa ya ku litela,
mi a yepa musima wa ku lubela.
A yemela miselo kuli i buzwe,
kono ya wawata kaufel'a yona.
3Cwale mulikan'a ka u li, “Mina batu ba ba pila mwa Jerusalema ni mwa Juda, a mu atule mwahal'a simu ya ka ya veine ni na. 4Kana ku na ni se ni kile na palelwa ku ezeza simu yeo, nji? Cwale kikabakalañi ha i beile miselo ye wawata, isiñi miselo ye minde ye ne ni libelezi?
5“Se ni ta eza kwa simu ya ka ya veine ki se. Ni ta lutulula lukwakwa lwa yona, ni tube ni limota le li i sileleza, mi i ciwe ni ku hatikelwa ki lifolofolo. 6Ni ta i tuhela i yowela, i be tite. Ha ni na ku kolela likota kamba ku tahula, kono ni ta i tuhela i kwahelwe ki macacani ni mikakani, mane ni ta hanisa ni pula ku nela mwateñi.”
7Isilaele ki yona simu ya veine
ya Muñ'a Bupilo ya Maata Kaufela.
Batu ba Juda ki zona likota za veine
z'a cezi.
N'a libelezi kuli ba ta eza ze nde,
kono bakeñisa cwalo
ba fetuhile babulai!
N'a libelezi kuli ba ta eza ze lukile,
kono ba ba zielehile mwahal'a bona
ba lilela ku eziwa ka mulao.
Bumaswe bo bu eziwa ki batu
8Mu na ni bumai! Mu ekeza mandu a mañata ni masimu fahalimw'a ze mu se mu na ni zona. Ku tuha ku tokwahala sibaka se si siyezi sa ku amuhela ba ba bata ku t'o yaha ku mina, mi mu ta pila mu nosi mwa naha. 9Ni utwile Muñ'a Bupilo ya Maata Kaufela h'a li, “Mandu-tuna a, a mande, a ta siyala ili mabumbuywa a mukungulu. 10Makocela a beile mwa simu ye tuna a ta taza likapanyana feela la waine. Kwa lizuma ze lishumi za peu, ku kutuzwi feela sizuma si li siñwi.”
11 #
But 2.7-9
Mu na ni bumai! Mu pakelelanga ku nwa i sa li kakusasana, mi mu tona busihu kaufela mu nze mu nwa. 12Mwa mikiti ya mina mu na ni lilimba, lihalepa, milupa, lipala ni waine. Kono ha mu utwisisi s'a eza Muñ'a Bupilo. 13Mi kabakaleo mu ta hapiwa mu sa lemuhi. Baeteleli ba mina ba ta bulaiwa ki tala, mi batu ba ta bulaiwa ki linyolwa. 14Lifasi la ba ba shwile li ba shukezwi, mi li ba atamiselize mulomo. Li mizaka batu ba ba bubana ba Jerusalema hamohocwalo ni nyangela mwahal'a lilata ni maefe-efe a bona.
15Mutu ni mutu u ta tompololwa, mi ba ba ikuhumusa kamukana ba ta kokobezwa. 16Kono Muñ'a Bupilo ya Maata Kaufela u bonisa butuna bwa hae ka ku eza ze lukile, mi Mulimu ya Kenile u bonahaza ku kena kwa hae ka mukwa w'a atula batu ba hae ka ona. 17Mwa mabumbuywa a munzi lingunyana li ta fumana bucwañi mi ku ta fula lipulinyana.
18Mu maibile! Mu palezwi ku itukulula kwa libi za mina. 19Mu li, “Muñ'a Bupilo a akufe ku eza z'a bulezi kuli u ta li eza, ili kuli lu li bone. Mulimu ya kenile wa Isilaele a zwelepili mwa milelo ya hae. Lu bone s'a hupula mwa pilu ya hae.”
20Mu maibile! Mu biza ze maswe kuli ki ze nde, mi ze nde mu li li maswe. Mu fetula lififi ku li eza liseli, mi liseli mu li eza lififi. Ze baba mu li eza ze munati, mi ze munati mu li eza ze baba.
21Mu maibile! Mu hupula kuli mu butali, ni kuli mu talifile hahulu.
22Mu maibile! Lindume za macwala! Lindume ba ba si na sabo ha ku fitwa fa ku zwaka macwala! 23Kono mu lukulula ba ba na ni milatu haiba ba mi leka kweta, mi ba ba si na mulatu mu palelwa ku ba atulela ka swanelo. 24Cwalehe, sina mw'a cela mataka ni bucwañi mwa mulilo, mibisi ya mina i ta bola ni lipalisa za mina li ta oma, li fefuke, kakuli mu hanile s'a mi lutile Muñ'a Bupilo ya Maata Kaufela, Mulimu ya kenile wa Isilaele. 25Muñ'a Bupilo u nyemezi batu ba hae, mi u otolozi lizoho la hae ku ba utwisa butuku. Malundu a ta nyanganya, mi litupu za ba ba shwile li ta siyala mwa mikwakwa sina matakala. Kono nihakulicwalo buhali bwa Muñ'a Bupilo ha bu na ku fela fa, mane lizoho la hae li ta be li sa otolohezi ku nata.
26Muñ'a Bupilo u fa poniso ya ku biza sicaba se si kwahule. U ba lizeza muloli kuli ba tahe ku zwa kwa manaha a kwahule. Mi ki ba, ba taha kapili ni ka bubebe. 27Ku bona ha ku na ya katezi, kamba ya sitatala. Ha ba ozeli kamba ku lobala. Ha ku na lukanda lo lu tepeta kamba muhala wa siheta o pumehile. 28Masho a bona a shengile, buta bwa bona se bu lukile. Litaku za lipizi za bona li tiile sina licwe, mi mahutu a likoloi za bona a pikuluha kapili sina kakundukundu. 29Masole ba bona ba bopa sina litau ze bulaile folofolo ni ze i lwala kuli ku si ke kwa ba ni ya ta li amuha.
30Lizazi leo ha li ta fita, ba ta tiisa ku bopela Isilaele sina mulumo wa mezi a liwate. Mu bone naha ye! S'e li lififi ni ñalelwa! Liseli se li mizizwe ki lififi.
Lozi Interconfessional Bible, Catholic Edition © Bible Society of Zambia, 2009.