Isaya 45
45
Muñ'a Bupilo u keta Sirusi
1Sirusi ki mulena ya ketilwe
ki Muñ'a Bupilo!
Muñ'a Bupilo u mu ketezi
ku tula macaba.
U mu luma ku y'o amuha malena
maata a bona.
Muñ'a Bupilo u ta mu kwalulela
minyako ya munzi.
Ku yena Sirusi Muñ'a Bupilo u li,
2“Na kasibili,
ni ta lukisa nzila ya hao,
ni ululule malundu ni malundunyana.
Ni ta loba likwalo za kopa,
ni pumake ni lipakiso za sipi fahali.
3Ni ta ku fa bufumu bo bu zwa
mwa libaka ze patilwe, ze lififi.
Kihona u ta ziba
kuli ki na Muñ'a Bupilo,
ni kuli u ketilwe ki Mulimu
wa Isilaele.
4Ni ku ketela ku tusa mutang'a ka
Isilaele,
batu be ni ketile.
Ni ku file likute le lituna,
niha u sa ni zibi.
5“Ki na Muñ'a Bupilo.
Ha ku na mulimu u sili.
Ni ta ku fa maata a u tokwa,
niha u sa ni zibi.
6Ni ta eza cwalo kuli mutu kaufela,
ku kala kwa makalelo a lifasi
mane ku y'o fita kwa mafelelezo,
a zibe kuli ki na Muñ'a Bupilo,
ni kuli ha ku na mulimu u sili.
7Ki na ya eza liseli ni lififi,
ya tisa limbuyoti ni liziezi.
Ki na, Muñ'a Bupilo, ya eza zeo
kamukana.
8Ni ta luma maata a ku tula,
sina pula ye zwa kwahalimu.
Lifasi li ta kwaluluha ku a amuhela,
mi li ta tahisa tukuluho ni ze lukile.
Na, Muñ'a Bupilo, ni ta eza kuli zeo
li ezahale.”
Maata a Muñ'a Bupilo
9 #
Isa 29.16; Baro 9.20 Kana piza ya lizupa i ka kananisa
mubupi wa yona,
piza ye swana ni ze ñwi kamukana?
Kana lizupa li ka buza mubupi
s'a eza, nji?
Kana piza i ka bilaela ka bukwala
bwa mubupi wa yona?
10Kikuli ku na ni ya ka ituma pilu
ku buza bashemi ba hae, a li,
“Kiñi ha mu ni ezize cwana?”
11Muñ'a Bupilo, Mulimu ya Kenile
wa Isilaele,
yena ya loleka ze taha, u li,
“Ha mu na swanelo ya ku ni buza
ka bana ba ka,
kamba ku ni bulelela se ni swanezi
ku eza!
12Ki na ya ezize lifasi,
ni ku bupa batu kuli ba pile ku lona.
Ka maata a ka ni bapuzi lihalimu.
Ni zamaisa lizazi, kweli ni linaleli.
13Ki na kasibili ya susuelize Sirusi
ku lwana,
ili ku taleleza mulelo wa ka wa ku
lukisa lika.
Ni ta otolola nzila y'a zamaya
kaufela.
U ta yaha munzi wa ka wa Jerusalema
sinca,
ni ku lukulula batu ba ka
ba ba hapilwe.
Ha ku na ya mu lifile, kamba ku mu
leka kweta, kuli a eze cwalo.”
Muñ'a Bupilo ya Maata Kaufela
u bulezi.
14Muñ'a Bupilo u bulelela Isilaele, u li,
“Bufumu bwa Egepita ni Etiopia
bu ta ba bwa hao,
ni banna ba batelele ba Sabea
ba ta ba batanga ba hao.
Ba ta ku latelela ba li mwa mawenge.
Ba ta ku kubamela mi ba bulele, ba li,
‘Mulimu u na ni wena luli.
Yena a nosi ki Mulimu.
15Mulimu wa Isilaele,
ya pilisa batu ba hae,
ki Mulimu ya ipata!
16Ba ba eza maswaniso kamukana
ba ta swaba.
Kaufel'a bona ba ta tompololwa.
17Kono Isilaele u pilisizwe
ki Muñ'a Bupilo,
mi tabo ya ku tula kwa hae
ha i na ku fela.
Batu ba hae ha ba na ku shwaulwa
ni kamuta.’ ”
18Muñ'a Bupilo u ezize mahalimu.
Ki yena feela ya li Mulimu!
U bupile ni ku eza lifasi.
U li tiisize, mi li ta ina kuya kuile!
H'a si ka li eza sina lihalaupa
le li si na se siñwi,
kono ili sibaka mo ku pila batu.
Ki yena ya li, “Ki na Muñ'a Bupilo,
mi ha ku na mulimu u sili hape.
19Ha ni si ka bulelela kwa mukunda,
kapa ku pata mulelo wa ka.
Ha ni si ka kupa sicaba sa Isilaele
ku ni bata mwa matota.
Ki na Muñ'a Bupilo, mi ni bulela
se si lukile.
Ni zibahaza se i li sa niti.”
Muñ'a Bupilo ni milimu ya Babilona
20Mulena a li,
“A mu kopane hamoho,
batu ba macaba,
ba ba bandukile kwa ku wa
kwa mubuso.
Mu tahe kwa ku zekiswa!
Bona ba ba yangatela maswaniso
a bona a likota
mi ba lapela milimu ye sa koni
ku ba pilisa,
batu bao ha ba na se ba ziba luli!
21A mu tahe, mu t'o biha taba
ya mina kwa kuta.
Ba ba na ni buikalabelo ba buzane.
Ya bulezi ze ta ezahala kwapili
mi ya li polofitile kale ki mañi?
Kana i n'e si na, Muñ'a Bupilo,
Mulimu ya pilisa batu ba hae?
Ha ku na mulimu u sili.
22“Cwale mu kutele ku na,
mi mu piliswe,
mina batu ba lifasi kamukana!
Ki na feela Mulimu ya li teñi.
23 #
Baro 14.11; Bafil 2.10-11 Se ni bulela ki niti,
mi ha si na ku cinciwa.
Ni mi sepisa ka ku tiya,
ni ka se ni li sona kaufela, kuli,
‘Mañi ni mañi u ka t'o kubama
fapil'a ka,
mi a konke kuli u ta ni sebeleza
ka busepehi.’
24“Ba ta bulela kuli maata a ku tula
a fumanwa ka na feela.
Kono ba ba ni toya kaufela
ba ta shwaulwa.
25Na, Muñ'a Bupilo, ni ta yangwela
baikulu ba Jakobo kamukana,
mi ba ta ni lumba.
Lozi Interconfessional Bible, Catholic Edition © Bible Society of Zambia, 2009.