Isaya 44
44
Muñ'a Bupilo ki yena Mulimu a nosi
1Muñ'a Bupilo u li,
“Teeleza cwale, Isilaele,
mutang'a ka,
mina batu ba ka be ni ketile,
baikulu ba Jakobo.
2Ki na Muñ'a Bupilo ya ku bupile.
Ni ku tusize ku kala kwa makalelo
a bupilo bwa hao.
U si ke wa saba. U mutang'a ka,
sicaba se ni iketezi se ni lata.
3“Ni ta sela mezi mwa naha
ye omile,
ni bubise linuka mwa lihalaupa.
Ni ta sululela bana ba hao
maata a ka,
ni limbuyoti za ka
kwa baikulu ba hao.
4Ba ta mela hande sina bucwañi
bo bu selaelwa,
sina matoya a fa munanga wa nuka
ya mezi a buba.
5“Batu ba ta li,
a li muñwi ka a li muñwi,
‘Na, ni wa Muñ'a Bupilo.’
Ba ka taha ku t'o kopana
ni ba sicaba sa Isilaele.
Mutu yo muñwi ni yo muñwi
u ta iswaya libizo la Muñ'a Bupilo
fa mwambo wa hae,
mi a ipize kuli ki yo muñwi
wa sicaba sa Mulimu.”
6 #
Isa 48.12; Sin 1.17; 22.13 Muñ'a Bupilo ya busa mi ya babalela
Isilaele,
Muñ'a Bupilo ya Maata Kaufela,
u bulela se, u li,
“Ki na wa pili ni wa mafelelezo,
Mulimu ya li teñi yena a nosi.
Ha ku na mulimu u sili haisi na.
7Kana u teñi ya ka eza ze ni ezize, nji,
ni ku bulela ka butali ze ta ezahala
kaufela
ku kala kwa makalelo luli
ni kuya kuile?
8Batu ba ka, mu si ke mwa saba!
Mwa ziba kuli ku zwa kwa linako
za kale,
mane ku t'o fita nako ye,
ni zibisize ze ta ezahala kaufela,
mi mina mu lipaki za ka!
Kikuli ku na ni mulimu u sili, nji?
Kana ku na ni mulimu u sili ya
maata, ye ni si ka utwa, naa?”
Bulapeli bwa milimu ya maswaniso
9Ba ba eza maswaniso kaufela ha ba na tuso, ni milimu ye ba babaza hahulu cwalo ha i na tuso. Ba ba lapela milimu yeo ki libofu ba ba si na se ba ziba, mi ba ta swabiswa. 10Ki musebezi o si na tuso wa ku eza siswaniso sa butale ni ku si lapela inge ki mulimu! 11Mañi ni mañi ya ka si lapela u ta swabiswa. Ba ba eza milimu ya maswaniso ki batu feela. A ba tahe, ba t'o zekiswa. Ba ta saba hahulu mi ba ta tompololwa.
12Mumbuti u nga butale ni ku bu sebeza ka mulilo. Lizoho la hae le li maata li zukuza sikoma ku i tula, mane i be ni sibupeho. Wa lapa, ku nyolwa ni ku katala.
13Mubeti u likanya kota ya hae. U ñola fateñi siswaniso ka siñoliso, mi u kala ku beta ka libetiso za hae. U si eza ka sibupeho sa mutu ni ka bunde bwa sifateho sa hae, mi kihona si beiwa mwa lilapelo mwa ndu ya hae. 14Mwendi a ka itusisa kota ya sidare, kamba a ka keta ya oke, kamba ya kiprese, ili likota za mwa mushitu. Kapa mwendi a ka cala kota ya mupulanga, mi a litele kuli i meliswe ki pula. 15#But 13.11-19 Kwa kota, mutu u itusisa kalulo ye ñwi, u tumbula mulilo wa ku ola, kamba wa ku apehisa lico. Ka kalulo ye ñwi u beta mulimu wa siswaniso, mi wa u lapela! 16Ka kalulo ye ñwi u eza mulilo f'a besa nama. Wa i ca, mi wa kula. Wa ola, a futumalelwe, mi a li, “Ki bunde, kwa futumala! Yela, ha si mulilo kwa bunde!” 17Ka kalulo ye ñwi ya kota hape u eza siswaniso. Wa kubama ni ku si lapela. Wa si lapela, u li, “Ki wena mulimu wa ka. Ni pilise!”
18Batu ba ba cwalo ba bukuba hahulu, mane ha ba zibi se ba eza. Ba kwala meeto ni minahano ya bona ku za niti. 19Muezi wa maswaniso h'a na ngana kamba butali bwa kuli, “Ni cisize kalulo ye ñwi ya kota. Fa mashala a yona ni apehile buhobe, mane ni besize ni nama ye ni cile. Mi ni ezize siswaniso ka kalulo ye ne siyezi ya kota. Kanti fa, ni kubamela sishingwa sa kota!”
20Kanti, ngana ya teñi i likana ni ya ku ca mashala. Minahano ya hae ya bukuba i mu kelusize, mane ha ku sa na tuso. H'a lemuhi kuli siswaniso s'a sweli mwa lizoho la hae ha si mulimu ni hanyinyani.
Muñ'a Bupilo, yena mubupi ni mupilisi
21Muñ'a Bupilo u li,
“Isilaele, u hupule litaba ze.
U hupule kuli u mutang'a ka.
Ni ku bupezi kuli u be mutang'a ka,
mi ha ni na ku ku libala ni kamuta.
22Ni fiyelezi libi za hao kwahule
sina lilu.
U kutele ku na. Ki na ya ku pilisa.”
23Mu huwe ka tabo, mina mahalimu,
kakuli Muñ'a Bupilo u ezize cwalo!
Mu huwe mina, libaka ze tungile
za lifasi!
Mu huwe ka tabo, mina malundu
ni mina likota za mwa mushitu
kaufela!
Muñ'a Bupilo u pilisize Isilaele,
sicaba sa hae,
mi kamukwaocwalo u bonahalize
butuna bwa hae.
24“Ki na Muñ'a Bupilo,
Mubupi ni Mupilisi wa mina.
Ki na Muñ'a Bupilo,
Mubupi wa lika kaufela.
Ki na ni nosi ya bapuzi mahalimu.
Ha ni bupa lifasi
ha ku na ya ni tusize.
25 #
1 Bakor 1.20
Ni eza bukuba balauli
mi ni pundungela lipono za mahata.
Ni hanyeza manzwi a batalifi
mi ni bonisa kuli butali bwa bona
ki bukuba.
26Kono mutang'a ka h'a polofita,
ha ni luma numwana ku t'o bonahaza
milelo ya ka,
ni eza milelo ni bupolofita bo
kuli li ezahale.
Ni bulelela Jerusalema
kuli batu ba ta yaha mwateñi hape,
ni minzi ya Juda kuli i ta yahiwa
sinca.
Minzi yeo i ta bonahala mwa matota.
27Ka taelo feela, ni omisa liwate,
mane ni kambukisa linuka za buliba.
28 #
2 Lita 36.23; Ezra 1.2 Ni li ku Sirusi,
‘Ki wena ya ta ni buseza.
U ta eza ze ni bata kuli u li eze.
U ta laela kuli Jerusalema u yahiwe
sinca,
ni kuli mutomo wa Tempele u tomiwe!’ ”
Lozi Interconfessional Bible, Catholic Edition © Bible Society of Zambia, 2009.