Isaya 46
46
1“A, ki ona mafelelezo
a milimu ya Babilona!
Pili, Bele ni Nebo n'e lapelwa,
kono cwale i lwezwi ki limbongolo,
ili mulwalo o bukiti kwa lifolofolo
ze katezi!
2A, ki ona mafelelezo a milimu yeo.
Maswaniso h'a koni ku ipilisa.
A hapiwa ni ku iswa ku sili.
3“A mu ni teeleze,
baikulu ba Jakobo,
mina kaufela ba ba siyezi kwa batu
ba ka.
Ni mi babalezi ku zwa nako
ye mu sa z'o pepwa.
4Ni Mulimu wa mina,
mi ni ta mi babalela
ku fitela mu hula,
mi se mu na ni limbi.
Ni mi bupile, mi ni ta mi babalela.
Ni ta mi tusa ni ku mi pilisa.”
5“Mu ka ni likanya ni mañi?”
ku bulela Muñ'a Bupilo.
“Kana u teñi ya swana ni na?
6Batu ba kwalula likwama za bona,
mi ba sulula gauda.
Ba likanya silivela fa likala.
Ba biza mumbuti kuli a eze mulimu.
Kiha ba u kubamela ni ku u lapela!
7Siswaniso seo ba si lwala fa maheta
a bona.
Ba y'o si beya mwa sibaka se siñwi,
mi si ta yema foo,
si sa koni ku suta fo si inzi.
Haiba mutu a si lapela,
ha si koni ku mu alaba,
kamba ku mu pilisa kwa kozi.
8“Mu hupule ze, mina baezalibi.
Mu nahane ze ni ezize.
9Mu hupule ze ezahalile kale.
Mu lumele kuli ki na Mulimu
ni nosi,
mi ha ku na ya swana ni na.
10Ni bulezi, i sa li kwa makalelo,
mo li ta felela lika.
Ni polofitile kale ze ta ezahala.
Ni bulezi kuli milelo ya ka
ha i na ku pala ni kamuta.
Na kona ku eza ze ni lelile kamukana.
11Ni biza munna kuli a zwe kwa upa.
U ta pamula sina mbande,
mi u ta peta ze ni lukisize.
Ni bulezi, mi ku ta ezahala.
12“Mu ni teeleze, mina mangulunde,
ba ba sa hupula kuli ku tula
ku kwahule.
13Lizazi la ku tula, na li atumeza.
Ha li yo kwahule ni hanyinyani.
Ku koma kwa ka
ha ku na ku liyehiswa.
Ni ta pilisa Jerusalema
mi ni bubanise libizo la Isilaele.”
Lozi Interconfessional Bible, Catholic Edition © Bible Society of Zambia, 2009.