Isaya 3
3
Mufili-fili mwa Jerusalema
1Cwale Muñ'a Bupilo, Muñ'a Bupilo ya Maata Kaufela, u tuha a zwisa lika kaufela ni batu ba ba sepilwe ki sicaba mwa Jerusalema ni Juda. U ta ba amuha lico ni mezi a bona. 2U ka amuha bahali ni masole ba bona, baatuli ni bapolofita ba bona, balauli ni manduna ba bona. 3U ka amuha baeteleli ba ndwa ni ba sicaba, ba litaba za mubuso, ni batu kaufela ba ba itusisa mabibo ku lukisa lika. 4Muñ'a Bupilo u ta ba liselela ku busiwa ki banana ba ba si ka tiya. 5Batu ba ta putelelana. Ba banca ha ba na ku kuteka ba bahulu, mi batu ba ba si na tuso ba ta ikuhumuseza bazamaisi ba bona.
6Nako ya taha foo ba mushiku o muñwi ba ta keta yo muñwi wa ku bona, mi ba li ku yena, “Wena ya na ni sika sa ku apala, u be muzamaisi wa luna mwa nako ye ya ziezi.”
7Kono yena u ta li, “Batili, isiñi na! Ha ni koni ku mi tusa. Ha ni na lico kamba liapalo. Mu si ke mwa ni eza mueteleli wa mina!”
8Ee, Jerusalema u zielehile! Juda wa wa! Ze ba eza ni ku bulela kaufela li lwanisa Muñ'a Bupilo. Ba shwaula patalaza Mulimu kasibili. 9Ba ta kutelwa ki bumaswe bwa bona. Ba eza sibi patalaza sina batu ba Sodoma. Ba zielehile, mi ziezi ba ipizelize yona ili bona.
10Batu ba ba lukile ba ka taba, mi za bona kamukana li ta konda. Ba ta ikola ze ba sebelelize. 11Kono batu ba ba maswe ba maibile. Ba ta kutisezwa bumaswe bo ba ezize.
12Ba ba kolotisa mali ba nyandisa batu ba ka, mi ba ba puma.
Batu ba ka, mu keluswa ki baeteleli ba mina, mi kamukwaocwalo mu timelelwa nzila ye mu swanezi ku nga.
Mulena u atula batu ba hae
13Muñ'a Bupilo u s'a itukiselize ku bulela taba ya hae. U s'a itukiselize ku atula sicaba sa hae. 14Muñ'a Bupilo u tisa bahulu ni baeteleli ba sicaba sa hae kwa katulo. U ba zekisa cwana, u li, “Mu sinyize likota za veine, mi mandu a mina a tezi ze mu ngile kwa babotana. 15Ha mu na tukelo ya ku pyata batu ba ka ni ku putelela babotana. Ni bulezi, na, Muñ'a Bupilo ya Maata Kaufela.”
Kelezo kwa basali ba Jerusalema
16Muñ'a Bupilo u li, “Mu bone mo ba ikuhumuseza basali ba Jerusalema! Ba zamaya ba nanulezi lingo mwahalimu. Ba andalalize milala. Ba hata ka sikeu, mi ba lilisa maseka a kwa mahutu a bona. 17Kono ni ta ba utwisa butuku. Ni ta ba beula kwa litoho ni ba eze litenda.”
18Lizazi la taha foo Muñ'a Bupilo a ta amuha basali ba Jerusalema ze ba ikuhumusa ka zona kaufela, ili mikabo ye ba beya kwa lingongo, kwa litoho, mwa milala. 19U ka zusa mikabo kwa miambo ya bona. U ta zwisa masila a ba ikwahezi ka ona kwa litoho. 20U ta zwisa likuwani za bona, milyani ya mabibo ye ba apala kwa mazoho ni mwa liteka za bona. 21A zuse masale a ba beya kwa minwana ni kwa lingo za bona. 22U ta zusa liapalo za bona ze nde kamukana, ni lijansi, ni likwama. 23A zuse liapalo za bona ze belela ni tutaulo twa bona to tu buleta, masila a ku itateza mwa milala, ni masila a matelele a ku ikwahela kwa litoho.
24Bakeñisa ku sebelisa lukumba, ba ta nunka maswe. Bakeñisa makanda a mande, ba ta itama ka mihala ye tata. Bakeñisa milili ye minde, ba ta ba ni litenda. Bakeñisa liapalo za butokwa, ba ta apala bwaya. Bunde bwa bona bu ta fetuha maswabisa.
25Banna ba mwa hae, ee, nihaili bona ba ba tata luli, ba ta bulaiwa mwa ndwa. 26Minyako ya munzi i ta lila, i silise. Mane ni ona munzi kasibili u ta swana ni musali ya inzi mapunu fafasi.
Lozi Interconfessional Bible, Catholic Edition © Bible Society of Zambia, 2009.