Isaya 2
2
Kozo ye sa feli
(Mika 4.1-3)
1Taba ye patuluhezwi Isaya, mwan'a Amozi, ki Mulimu ka za Juda ni Jerusalema, ki ye. 2Mwa mazazi a taha,
lilundu fo i yemi Tempele
ya Muñ'a Bupilo li ta ba
le li lumbile ku fita a mañwi.
Macaba a mañata a ta tahanga
a capukezi ku lona.
3Buñata bwa batu ba ka taha, ba li,
“A lu kambameñi fa lilundu
la Muñ'a Bupilo,
lu ye kwa Tempele ya Mulimu
wa Isilaele.
Lu ta ituta s'a bata kuli lu si eze.
Lu ta zamaya mwa linzila z'a ketile.
Lituto za Muñ'a Bupilo
li zwa kwa Jerusalema.
U bulela ni batu ba hae
a li fa Lilundu la Sione.”
4 #
Joel 3.10; Mika 4.3 U ta atula mizeko mwahal'a macaba
a matuna.
Lisabule za bona ba ta li tula mihuma,
ni malumo a bona a ta eziwa litipa
za ku kokolisa mitai.
Macaba h'a sa na ku lwana hape.
H'a sa tola a itukiseza ndwa.
5Cwale baikulu ba Jakobo,
a lu zamayeñi mwa liseli
l'a lu fa Muñ'a Bupilo!
Wa taha Mulena Mulimu
6Mulimu, u fulalezi batu ba hao, baikulu ba Jakobo. Naha i tezi bulauli bo bu zwa kwa upa, ni kwa naha ya Mafilisita. Batu ba latelela mikwa ya bazwahule. 7Naha ya bona i tezi silivela ni gauda, mi bufumu bwa bona ha bu feli. Naha ya bona i tezi lipizi, mi makoloi a bona a ndwa h'a feli. 8Naha ya bona i tezi milimu ya maswaniso, mi ba lapela lika ze ba ikezelize ka mazoho a bona.
9Mañi ni mañi u ta ishonda ni ku swabiswa. Muñ'a Bupilo, u si ke wa ba swalela!
10 #
Sin 6.15; 2 Bates 1.9 Ba ta ipata mwa mañope a macwe mwa malundu kamba ku yepa misima mwa mubu ili ku lika ku banduka buhali bwa Muñ'a Bupilo, kamba ku ipata kwa maata a bulena bwa hae! 11Lizazi la taha foo muipo wa batu, ni ku inuneka kwa bona ku ta feliswa. Kihona Muñ'a Bupilo a ta lumbekwa a nosi. 12Ka lona lizazi leo, Muñ'a Bupilo ya Maata Kaufela u ta kokobeza mañi ni mañi ya ipeile maata, ufi ni ufi ya ikuhumusa ni ku ikanyisa. 13U ta sinya likota ze telele za sidare za mwa Lebanoni, ni lioke kamukana za mwa naha ya Bashani. 14U ta ululula malundu a lumbile ni tulundunyana. 15U ta lutulula litawa ze telele hamohocwalo ni mamota a minzi ya masabelo. 16Mane, u ta tibisa lisepe ze tuna, ze nde ka ku fitisisa. 17Ku inuneka ni buikuhumuso bwa batu li ta feliswa. Ki Muñ'a Bupilo a nosi ya ta pahamiswa lizazi leo ha li ta fita. 18Milimu ya maswaniso i ta fela, mbuu.
19Batu ba ta ipata mwa mañope a macwe mwa malundu, kapa ku yepa misima mwa mubu ku lika ku banduka buhali bwa Muñ'a Bupilo, kapa ku ipata kwa maata a bulena bwa hae, h'a ka taha ku t'o nyunga lifasi. 20Lizazi leo ha li ta fita, ba ta lataka maswaniso a gauda ni silivela a ba ezize, mi ba li siyele lingeti ni bo sikampafwa. 21Muñ'a Bupilo h'a ka taha ku t'o nyunga lifasi, batu ba ta ipata mwa misima ni mwa mañope a macwe mwa malundu, ku lika ku banduka buhali bwa hae, kamba ku ipata kwa maata a bulena bwa hae.
22Mu si ke mwa sepa batu ba ba fokola, ba ba tamehile ku shwa! Tuso ya bona ki ifi? Ha ku na!
Lozi Interconfessional Bible, Catholic Edition © Bible Society of Zambia, 2009.