Hosea 8
8
Muñ'a Bupilo u nyaza Isilaele
1Muñ'a Bupilo u li, “Mu lize ngongi! Lila li taha li shoonokezi naha ya ka sina limbande! Batu ba ka ba sinyize bulikani bo ne ni isweli ni bona, mi ba hanile tuto ya ka. 2Ba ni biza Mulimu wa bona mi ba bulela kuli ki batu ba ka ni kuli ba ni ziba. 3Kono ba hanile ze nde. Kabakaleo lila za bona li ta ba lelekisa.
4“Batu ba ka ba iketezi malena kono ba ezize cwalo kwande a ka. Ba iketezi bazamaisi ili bona, ba si ka lumelelwa ki na. Ka silivela ni gauda ya bona ba ikezelize milimu ya maswaniso, mi kabakaleo ba ka timezwa. 5Ni toile poho ya gauda ye lapelwa ki batu ba Samaria. Ni ba halifezi hahulu. Kanti ba, ba ta nga nako ye kuma kai kuli ba tuhele ku lapela milimu ya maswaniso! 6Ne li mubeleki feela wa mwa Isilaele ya ezize siswaniso seo. Siswaniso seo ha si mulimu! Poho ya gauda yeo, ye lapelwa ki batu ba Samaria, i ka tubakiwa tuemba-emba!
7Ha ba cala moya, ba kutula liñungwa!
Simu ya mabele a sa buzwi
ha i koni ku tahisa buhobe.
Kono haiba mabele a buzwa,
a ta ciwa ki bazwahule.
8Sicaba sa Isilaele si fetuhile inge macaba a mañwi kaufela, mi ha si na tuso sina piza ye tubehile. 9Ka mahañi a bona sina limbongolo, batu ba Isilaele ba icembanela feela. Ba ikezi ku y'o kupa tuso kwa Asiria, mi ba lifile macaba a mañwi kuli a ba sileleze. 10Kono cwale ni ka ba kopanya, ni ba utwise butuku. Cwale ba tuha ba alabana ka butuku, mulena wa Asiria h'a ta ba nyandisa.
11“Mo ku atela tutala twa batu ba Isilaele twa ku zwisa libi, ni libaka za ku ezeza sibi ki mo li atela. 12Ni ñolela batu lituto ze ñata ze sa konwi ku balwa, kono ba li hana inge ze nca ku bona, kamba ze zwa ku sili. 13Ba ni ezeza litabelo ni ku ca nama ya zona. Kono na, Muñ'a Bupilo, ha ni li tabeli, mi cwale ni ka hupula bumaswe bwa bona ni ku ba utwisa butuku ka ku ba kutiseza kwa Egepita!
14“Batu ba Isilaele ba ikahezi miyaho ya bulena, kono ba libezi mubupi wa bona. Batu ba Juda bona ba ikahezi minzi ye silelelizwe. Kono ni ta tisa mulilo ku t'o cisa minzi, ni ku sinya miyaho ya bona ya bulena.”
Lozi Interconfessional Bible, Catholic Edition © Bible Society of Zambia, 2009.