Hosea 9
9
Hosea u tumusa manyando a Isilaele
1Batu ba Isilaele, mu tuhele ku eza mikiti ya mina sina bahedeni. Mu fulalezi Mulimu wa mina, mi mu bile ba ba sa sepahali ku yena. Mwa naha kamukana mu itekisize ili mina ku Baale inge liozwa, ni ku tabela lico ze mu hupula kuli mu li filwe ki yena! 2Kono cwale ha mu na ku ba ni lico ze ñata za mabele, ni mafula a olive, mi ha ku na ku ba ni waine. 3Batu ba Isilaele ha ba na ku ina mwa naha ya Muñ'a Bupilo, kono ba swanezi ku kutela kwa Egepita, mi mwa Asiria ba ka y'o ca lico ze hanisizwe. 4Mwa linaha li sili, ha ba na ku kona ku tiseza Muñ'a Bupilo limpo za waine kamba ku mu tiseza litabelo za bona. Lico za bona li ka silafaza ba ba li ca kaufela inge ze ciwa fa mafu. Lico za bona li ka ba za ku cela feela tala, isiñi za ku isa kwa Tempele ya Muñ'a Bupilo. 5Cwale nako ya mukiti ye ketilwe ku kuteka Muñ'a Bupilo ha i ka fita, ba ta eza cwañi? 6Kozi ha i ka taha mi batu ba nze ba hasani, Maegepita ba ka ba kubukanya hamoho ku y'o ba pumbeka mwa Memfisi! Bufumu bwa silivela ni matota a minzi ya bona li ta kwahelwa ki bucwañi ni macacani a miutwa.
7 #
Luk 21.22
Nako ya manyando se i fitile, ili nako ya ku fa batu se si ba swanela. Zeo ha li ezahala, Isilaele u ka li ziba. Mu li, “Mupolofita yo ki sikuba. Munna yo, ya na ni moya wa Mulimu, wa pulumuka.” Mina batu mu ni toile hahulu, kakuli libi za mina ki ze tuna hahulu. 8Mulimu u ni lumile ka bupolofita ku t'o lemusa batu ba hae, bona Maisilaele. Kono nihakulicwalo, ko ni ya kamukana mu lika ku ni swasa sina nyunywani. Mwa naha ya Mulimu luli, batu ki bona lila za bapolofita. 9#Baat 19.1-30 Ba maswe hahulu mwa linto ze ba eza, sina mo ne ba inezi kwa Gibea. Mulimu u ka hupula bumaswe bwa bona mi u ta ba utwisa butuku.
Manyando a tiswa ki bumaswe bwa Isilaele
10 #
Lipa 25.1-5
Muñ'a Bupilo u li, “Ha ni kala ku fumana Isilaele, ne ku swana inge mutu h'a ka fumana miselo ya veine ye hulela mwa lihalaupa. Ha ni kala ku bona bo kukw'a mina, ne ku swana inge ku bona feiga ye kala ku buzwa mwa silimo. Kono ha ba fita kwa Baale Peori, ba ni siya mi ba kala ku lapela Baale, mane na ba toya hahulu sina mo ne ni toyezi milimu ya maswaniso ye ne ba lata. 11Butuna bwa Isilaele bu ka fela kapili sina nyunywani ye fufa, mi ha ba sa na ku pepa. Basali ha ba na ku itwala, nihaili limbututu ha li na ku ba teñi. 12Niha ne ba ka ba ni bana ne ni ta ba nga kaufela, ni sa siyi nihaili a li muñwi ya pila. Ha ni ka siya batu ba, ba ka tahelwa ki manyando a likozi ze sabisa hahulu.”
13Muñ'a Bupilo, na kona ku bona cwalo kuli bana ba bona ba zumiwa, mi ba bulaiwa. 14Muñ'a Bupilo, ni ka ku kupañi s'o ka ezeza batu ba? Ku fetula basali ba bona baumba! Ku ba paleliswa ku anyisa bana ba bona!
Katulo ya Muñ'a Bupilo ku Isilaele
15Muñ'a Bupilo u li, “Likezo za bona ze maswe kaufela li kalezi mwa Giligali. Kihona ko ni kalezi ku ba toya. Kabakala bumaswe bo ba ezize ni ta ba leleka mwa naha ya ka. Ha ni sa na ku ba lata ni kamuta, kakuli baeteleli ba bona kamukana ba ni fetuhezi. 16Batu ba Isilaele ba swana inge simela se si omezwi ki mibisi, se si sa beyi miselo. Ha ba na ku ba ni bana ba bona. Mi ha ne ka ba ni bona ni ka bulaya bana ba, ba ba latwa hahulu.”
Mupolofita u bulela ka za Isilaele
17Mulimu ye ni sebeleza u ka hana batu ba hae kakuli ha ba si ka mu utwa. Ba ka ba bayambaeli mwahal'a macaba.
Lozi Interconfessional Bible, Catholic Edition © Bible Society of Zambia, 2009.