Hosea 7
7
1“Kamita ha ni bata ku folisa batu ba ka ba Isilaele ni ku ba pilisa hande, se ni bona feela ki bumaswe bwa bona ni libi ze ba eza. Ba pumana. Ba kena mwa mandu ni ku uzwa tutu mwateñi, mi ba amuha batu za bona mwa mikwakwa. 2Ha ba nahani kuli ni ka hupula bumaswe bwa bona kaufela bo ba eza. Libi za bona li ba beile mwahali mi ha ba koni ku li pata ku na.”
Mulelo wa petuhelo mwa mutala
3Muñ'a Bupilo u li, “Batu ba puma mulena ni manduna ba hae ka milelo ya bona ye maswe. 4Kamukan'a bona ki babeteki mi ha ba sepahali. Sitoyo sa bona si swana inge mulilo o mwa sitofu, o sa kotezwi ki muapehi ku fitela liñende ha li se li huhumuhile. 5Ka lizazi la mukiti wa mulena ba kolwisize mulena ni manduna ba hae ka waine, ni ku ba eza likuba. 6Ee, ku cwalo, ka milelo ya bona ba cisa inge mulilo wa mwa sitofu. Busihu kaufela bunyemi bwa bona ne bu nze bu yekauka inge mashala a cisa, mi kakusasana bu tuka inge litumbutumbu.
7“Ka buhali bwa bona ba bulaya babusi ba bona. Malen'a bona ba bulawa ka ku tatamana, kono ha ku na ya ni lapela kuli ni ba tuse.”
Isilaele ni macaba
8Muñ'a Bupilo u li, “Batu ba Isilaele ba swana sina liñende le li si ka beswa hande. Ba itingile fa macaba a ba potolohile. 9Ha ba lemuhi kuli ku itinga kwa bona kwa bazwahule ku ba amuhile maata a bona. Mazazi a bona a balilwe, kono bona ha ba zibi cwalo. 10Buikuhumuso bwa batu ba Isilaele ki bona bo bu ba atula. Niha ku ezahalile zeo kaufela, ha ba si ka kutela ku na, Mulena Mulimu wa bona. 11Isilaele u swana sina nkwilimba ye si na ngana. Batu ba hae ba kala pili ku kupa tuso kwa Egepita, kihona cwale ba matela kwa Asiria. 12Kono ni ta ba teela lulaba mwa nzila, ni ba swase inge linyunywani ha ba fita. Ni ta ba utwisa butuku ka bumaswe bo ba ezize.
13“Ba maibile! Ba ni siile mi ba ni kwenuhezi. Ba ka timezwa. Ne ni batile ku ba pilisa, kono bulapeli bwa bona ku na ne li bwa buhata. 14Ha ba si ka ni lapela ka lipilu za bona kaufela, kono ba alabana feela fafasi inze ba bokolola sina bahedeni. Ha ba lapelela lico za bubeke kamba waine, ba isehaka sina bahedeni. Ki bafetuheli ba ba cwañi! 15Niha ni ba hulisize ni ku ba tiisa, ba ni kwenuhezi. 16Ba zwelapili ku ni hana ni ku ikela kwa milimu ye si na maata. Ha ba sepahali sina buta bo bu kopami. Kabakala lipulelo za buikuhumuso ze ba bulela baeteleli ba bona, ba ta shwa lifu la lilumo, mi Maegepita ba ta ba seha.”
Lozi Interconfessional Bible, Catholic Edition © Bible Society of Zambia, 2009.