Hosea 6
6
Ku baka kwa batu ko ku sa sepahali
1Batu ba li, “A lu kuteleñi ku Muñ'a Bupilo. U lu utwisize butuku, kono kaniti luli u ka lu folisa. Nih'a lu holofalize, u ka lu tama malapi fa mañiba a luna, ha ku cwalo, nji? 2Mwa mazazi a mabeli kamba a malalu u ta lu wetulula, mi lu ta pila fapil'a hae. 3A lu likeñi ku isa lipilu za luna kwa ku ziba Muñ'a Bupilo. U ka taha ku luna ka niti, sina masa h'a patalala. U ta lu tela luli sina pula ya maseulo.”
4Kono Muñ'a Bupilo a li, “Isilaele ni Juda, ni ka mi eza cwañi? Lilato la mina ku na li fela kapili inge mbundu ya kakusasana. Li swana inge puka ye fela i sa li kakusasana. 5Kikabakaleo ni mi lumezi bapolofita ba ka ku tisa manzwi a ka a katulo ni manyando. Se ni bata ku mina sa utwahala! 6#Mat 9.13; 12.7 Se ni bata hahulu ki lilato la mina le li sa feli ku na, isiñi litabelo za lifolofolo za mina. Ni lata kuli batu ba ka ba ni utwe ku fita ku ni ezeza feela litabelo za ku cisa.
7“Kono batu ba, ba sa kena feela mwa naha ye ne ba sepisizwe, sina Adama ba sinyize bulikani bo ne ni isweli ni bona. 8Giliadi ki munzi o tezi batu ba ba maswe ni babulai. 9Baprisita ba swana inge litopa za masholi ba ba lalela batu mwa nzila. Mane nihaili mwa nzila ye ya kwa Sikemi, ili kwa sibaka se si kenile, ba bulaya ba ba fita. Ba eza bumaswe bo kaufela ka bomu! 10Ni boni nto ye sabisa hahulu mwa Isilaele. Batu ba ka ba isilafalize ili bona ka ku lapela milimu ya buhata.
11“Kono haili mina, batu ba Juda, ni se ni tomile nako ye ni ka mi utwisa butuku kabakala ze mu eza.
Lozi Interconfessional Bible, Catholic Edition © Bible Society of Zambia, 2009.