Hosea 5
5
1“Mu teeleze, mina baprisita! Mu utwe, mina batu ba Isilaele! Mu teeleze, ni mina bana ba malena! Ne mu lukela ku atula ka swanelo, kono cwale katulo i ka wela fahalimw'a mina! Mu bile katwa kwa Mizipa, kanyandi ka ka ambami fa Lilundu la Tabore. 2Mu bile musima o tungile kwa munzi wa Akasia, mi ni ka mi fa mulatu kamukan'a mina. 3N'a ziba mw'a inezi Isilaele. H'a koni ku ipata ku na. S'a bile ya sa sepahali ku na, mi batu ba hae ha ba koni ku ni lapela.”
Temuso ya Hosea
4Bumaswe bwa lifoso ze ba ezize batu bu ba paleliswa ku kutela ku Mulimu wa bona. Bulapeli bwa milimu ya maswaniso bu ba tamile, mi ba palelwa ku ziba Muñ'a Bupilo. 5Buikuhumuso bwa Maisilaele bwa ba atula. Ba sitataliswa ni ku wiswa ki libi za bona, mi batu ba Juda ba wa hamoho ni bona. 6Ba ka nga likomu ni lingu za bona ku y'o ezeza Muñ'a Bupilo litabelo, kono ha ku tusi. Ha ba koni ku mu fumana kakuli u ba siile. 7Kabakala ku sa sepahala ku Muñ'a Bupilo, bana ba bona ha si ba hae. Cwalehe, bona hamoho ni naha ya bona ba tuha ba sinyiwa.
Ndwa ya Juda ni Isilaele
8Mu lize litolombita za ndwa mwa Gibea! Mu lize ngongi mwa Rama! Mu tabe mukosi wa ndwa mwa Betele! Mu kene mwa ndwa, banna ba Benjamine! 9Lizazi la ku utwiswa butuku la taha, mi Isilaele u ta shandauka. Batu ba Isilaele, taba ye i ta ezahala luli!
10Muñ'a Bupilo u li, “Ni halifile kakuli baeteleli ba Juda ba lwanisize Isilaele mi ba ikuzwelize naha ya hae. Cwale ni ka ba lumela koto ye swana sina muunda. 11Isilaele u mwa ziezi. U amuhile naha ya hae ye ne mu lukela kakuli n'a tundamezi ku kupa tuso ku ba ba ne ba si na se siñwi. 12Cwale ni ka tiseza Isilaele manyando, ni palali kwa batu ba Juda.
13“Isilaele ha s'a boni mw'a n'a kulela, ni Juda ha s'a boni mañiba a hae, cwale Isilaele a ya kwa Asiria ku y'o kupa tuso ku mulena yo muhulu, kono a palelwa ku ba alafa, kamba ku folisa mañiba a bona. 14Ni ka lwanisa batu ba Isilaele ni ba Juda sina tau. Ni ka ba cancaula tuemba-emba, mi kihona ni ka ikela. Ha ni ta ba huhula kaufela, ha ku na ya ka kona ku ba pulusa.
15“Ni ta siya batu ba ka ba li nosi, ku fitela ha se ba nyandile hahulu kabakala libi za bona, mi ba ta kutela ku na ba nze ba ni bata. Mwendi mwa manyando a bona ba ta lika ku ni fumana.”
Lozi Interconfessional Bible, Catholic Edition © Bible Society of Zambia, 2009.