Hosea 4
4
Pilaelo ya Muñ'a Bupilo ku Isilaele
1Muñ'a Bupilo u na ni pilaelo kwa batu ba ba pila mwa naha ye. U teeleze, wena Isilaele, ku s'a bulela. Pilaelo ya hae ki ye, “Ha ku na busepahali kamba lilato mwa naha, mi batu ha ba ni ngi kuli ni Mulimu. 2Batu ba eza lisepiso ze ba sa buluki. Ba bulela buhata, ba bulaya, ba uzwa, mi ba buka. Bumaswe bwa ekezeha, mi lipulao za tatamana. 3Cwalehe, naha i ka oma hahulu, mane linto kamukana ze pila mwateñi li ta shwa. Lifolofolo ni linyunywani kaufela, nihaiba zona litapi li ka shwa.”
Pilaelo ya Muñ'a Bupilo kwa baprisita
4Muñ'a Bupilo u li, “Ku si ke kwa ba ni ya nyaza kamba ku beya batu mulatu, kakuli pilaelo ya ka i ku mina baprisita. 5Busihu ni musihali mwa sitatala, ni bona bapolofita ba swana ni mina. Ni ka sinya m'a mina, Isilaele. 6Batu ba ka ba sinyizwe ki ku sa ni ziba. Mina baprisita mu hanile ku ni latelela, mi mu hanile tuto ya ka. Mi cwale na mi hana, mi ha ni na ku lumelela bana ba mina ku ba baprisita ba ka.
7“Mo ba atela baprisita, ni lifoso za bona li ata cwalo, mi cwale likute la mina ni ka li fetula maswabi. 8Mu fumiswa ki lifoso za batu ba ka, mi mu sa ba batiseza kuli ba fose hahulu. 9Mu ta utwiselezwa butuku bo bu swana hamoho ni sicaba! Ni ka mi fa mulatu ni ku mi kutiseza bumaswe ka ze mu eza. 10Mu ka na mu ca likabelo za mina za litabelo, kono ha mu na ku kula. Mu lapela milimu ya lupepo, kono nihakulicwalo ha mu na ku ba ni bana, kakuli mu ni fulalezi mi mu lapela milimu i sili.”
Muñ'a Bupilo u nyaza bulapeli bwa sihedeni
11Muñ'a Bupilo u li, “Waine ye nca ni ya kale i tokwisa batu ba ka ngana. 12Ba kupa lipono kwa maswaniso a tukota! Tukota to tu ba bulelela ze ba bata ku ziba! Ba ni hanile. Sina musali ya sa ikeza lihule, kihona mo ba ipeezi kwa milimu i sili. 13Ba ezeza litabelo mwa libaka za ku lapelela ze fahalimw'a malundu, mi ba ciseza insense fa tulundunyana mwatas'a likota ze telele za mitai ye miñata, kakuli muluti wa mwateñi ki o munde hahulu!
“Kabakaleo bana ba mina ba basizana ba ikeza mahule, mi basali ba bana ba mina ba buka. 14Nihakulicwalo ha ni na ku ba fa mulatu ka kezo yeo, kakuli ni mina luli mu zamaya ni liozwa za mwa litempele. Hamoho ni bona mu eza litabelo za sihedeni. Sina nguli ha i li, ‘Batu ba ba si na kutwisiso ba ka shandauka.’
15“Nihaike mina batu ba Isilaele mu sa sepahali ku na, Juda yena a si ke a ba ni mulatu o swana. Mu si ke mwa y'o lapelela kwa Giligali kamba kwa Betele, mi mu si ke mwa y'o ezeza kwateñi lisepiso ka libizo la Muñ'a Bupilo. 16Batu ba Isilaele ki liñañeli ze swana inge limbongolo. Cwale ni ka ba uta cwañi sina lingunyana ze mwa mafulelo a mande? 17Batu ba Isilaele ba mwa maata a milimu ya buhata. Mu ba tuhele cwalo. 18Ha ba se ba nwile hahulu waine, ba tabela buozwa bwa bona, ni ku lata tompololo ku fita likute. 19Ba ta zamaya sina ba ba fefulwa ki moya, mi ba ta swabela litabelo za bona za sihedeni.
Lozi Interconfessional Bible, Catholic Edition © Bible Society of Zambia, 2009.