Hosea 3
3
Hosea ni musali ya sa sepahali
1Muñ'a Bupilo a li ku na, “U y'o kutisa musal'a hao niha s'a na ni mulikani ya zamaya ni yena. U mu late sina mo ni sa latela batu ba Isilaele, niha ba sikuluhelanga kwa milimu i sili, mi ba lata ku fa milimu ya maswaniso limpo za miselo ye omile.”
2Cwale ni mu lekile ka silivela ya muwaya-waya o eza lishumi ka ze ketalizoho, ni ka buloto bwa bukiti bo bu eza likilo ze mwanda ka mashumi a ketalizoho. 3Na mu bulelela kuli u ta ina ni na ka nako ye telele a sa bi lihule, mi ka yona nako yeo ni ta mu yemela. 4Ka ona mukwa wo, batu ba Isilaele ba ka nga nako ye telele ba si na mulena kamba baeteleli, ba si na litabelo kamba likota ze betilwe fo ba pailelanga, ku si na milimu ye ezizwe, kamba maswaniso a itusiswa kwa ku laula. 5Nako i ta taha ba Isilaele fo ba ta kutela hape ku Mulena Mulimu wa bona, ni muikulu wa Davida mulen'a bona. Cwale ba ka saba Muñ'a Bupilo, mi ba ka amuhela limpo ze hae ze nde.
Lozi Interconfessional Bible, Catholic Edition © Bible Society of Zambia, 2009.