Hosea 2
2
1Cwalehe, banabahabo mina Maisilaele mu ba bize kuli ki Batu ba Mulimu, Ba ba sheumbilwe ki Muñ'a Bupilo!
Gomeri ni Isilaele ba ba sa sepahali
2Bana ba ka, mu shemba-shemba m'a mina, nihaike h'a sa li musal'a ka, mi ni na, ha ni sa li munn'a hae. Mu mu kupe ka tata kuli a tuhele bubuki ni buhule bwa hae. 3H'a sa tuheli, ni ka mu tubula, a siyale mapunu inge mw'a kile a pepelwa. Ni ka mu eza inge naha ye omile ye sa koni ku melisa se siñwi, mi u ta bulaiwa ki linyolwa. 4Ha ni na ku shemuba bana ba hae, kakuli ki bana ba lihule le li si na maswabi. 5Yena u ize, “Ni ta ya kwa linyazi za ka, ba ni fe lico ni mezi, kubo ya boya bwa ngu ni masila a mande a line, ni mafula a olive ni waine.”
6Cwalehe, ni ka mu beya mwa lukwakwa lwa miutwa, ni ka mu yahela limota kuli a si ke a zwa mwateñi. 7U ka na a lika ku matela linyazi za hae, kono h'a na ku ba swala. U ka na a ba bata, kono h'a na ku ba fumana. Cwale kihona a ka li, “Na kutela ku munn'a ka wa pili, fo ne ni pila hande ku fita nako ye.”
8N'a si ka kolwa kuli n'e li na ya n'a mu fanga lico, waine, mafula a olive, silivela ni gauda ye ñata hahulu, ya n'a itusa ka yona mwa lisebelezo za Baale. 9Cwale ka nako ya kutulo, ni ka kutisa lico ni waine ye ne ni mu file, ni ku mu amuha masila a boya ni a line o ne ni mu file kuli a apale. 10Ni ka mu tubulela fapil'a meeto a linyazi za hae, mi ha ku na ya ka kona ku mu zwisa mwa maata a ka. 11Ni ta felisa mikiti ya hae kaufela, mikiti ya silimo, ya kweli ni kweli, ya lipumulo, ni mikopano ya hae kaufela ya bulumeli. 12Ni ka sinya likota za veine ni likota za hae za feiga z'a n'a li u li filwe ki linyazi za hae kabakala ku ba tusa. Ni ka fetula masimu a hae a veine ni likota ze ñwi za miselo lihalaupa, mi cwale kihona li ka sinyiwa ki lifolofolo za mwa naheñi. 13Ni ka mu fa mulatu wa linako kaufela z'a n'a ni libalanga, ha n'a cisezanga Baale insense, ni ku ikapesa mikabo ya hae ye minde h'a matela kwa linyazi za hae. Ku bulela Muñ'a Bupilo.
Lilato la Muñ'a Bupilo kwa batu ba hae
14Cwale ni ka mu isa mwa lihalaupa hape, mi ni ka y'o mu shemba-shembela mwateñi, ni ku mu kutisa ka manzwi a lilato. 15#Josh 7.24-26 Ni ka mu kutiseza litima za veine z'a n'a na ni zona, mi Musindi wa Manyando ni ka u fetula munyako wa sepo. U ka y'o kutela ku na sina mw'a n'a inezi pili, a sa li yo munyinyani, h'a zwa kwa Egepita. 16Cwale u ka kutela ku ni biza munn'a hae. H'a sa na ku ni biza Baale wa hae. 17Ha ni sa na ku mu tuhela a bulela libizo la Baale ni kamuta.
18Ka yona nako yeo ni ka eza bulikani ni lifolofolo za mwa naheñi kamukana, ni linyunywani kaufela, kuli li si ke za holofaza batu ba ka. Hape ni ka zwisa lilwaniso za ndwa kaufela mwa naha, mikwale kamukana ni buta, ili kuli batu ba ka ba pile mwa kozo ni buiketo.
19Isilaele, ni ka ku eza musal'a ka.
Ni ka ba ni niti ni ku sepahala
ku wena.
Ni ta ku bonisa musa ni lilato
le li sa feli,
mi u ka ba wa ka kuya kuile.
20Ni ta buluka sepiso ya ka,
mi wena u ka ba wa ka.
U ka ziba kuli ki na Muñ'a Bupilo.
21Ka yona nako yeo
ni ka alaba litapelo za batu ba ka
ba Jizireele.
Ni ka nelisa pula fafasi.
22Lifasi li ka melisa lico,
miselo ni olive.
23 #
Baro 9.25; 1 Pit 2.10 Ni ta beya batu ba ka mwa naha
ni ku ba pilisa hande.
Ni ta bonisa lilato
ku ba ba ne ba bizwa Batoiwa.
Ku ba ba ne ba bizwa Batu ba Sili,
ni ka li, “Mu batu ba ka,”
mi bona ba ka alaba, ba li,
“U Mulimu wa luna.”
Lozi Interconfessional Bible, Catholic Edition © Bible Society of Zambia, 2009.