Hosea 1
1
1 #
2 Male 14.23—15.7; 15.32—16.20; 18.1—20.21; 2 Lita 26.1—27.8; 28.1—32.33 Ki a manzwi a Muñ'a Bupilo a n'a file Hosea mwan'a Beeri, ili ka nako ya Oziasi, Jotami, Akazi ni Ezekiasi ha ne ba li malena ba Juda, ni Jeroboami mwan'a Jehoasi a nz'a li mulena wa Isilaele.
Musal'a Hosea ni bana
2Muñ'a Bupilo h'a kala ku bulelela Isilaele ka Hosea, u ize, “U y'o nyala musali, kono h'a na ku sepahala, ni bana ba hao ba ta swana ni yena. Kamukwaoswana, ni bona batu ba ka ba ni fulalezi mi ba fetuhile ba ba sa sepahali.”
3Mi cwale Hosea kih'a nyala Gomeri mwan'a Dibilaimi. A pepa mweli wa bona wa mushimani. 4#2 Male 10.11 Cwale Muñ'a Bupilo a li ku Hosea, “U mu beye libizo la Jizireele, kakuli ha ku na ku fita nako ye telele ni si ka fa mulena wa Isilaele mulatu, kabakala lipulao ze ne li ezizwe ki kukw'a hae Jehu kwa Jizireele. Ni ka felisa puso ya baikulu ba Jehu. 5Cwale ka yona nako yeo, ni ta felisa maata a Isilaele a ndwa, mwa Musindi wa Jizireele.”
6Gomeri a pepa mwana wa bubeli, ili wa musizana. Cwale Muñ'a Bupilo a li ku Hosea, “U mu beye libizo la Muhaniwa, kakuli ha ni sa na ku ba ni mukekecima kamba ku swalela batu ba Isilaele. 7Kono ni ka ba ni mukekecima kwa batu ba Juda. Na, Mulena Mulimu wa bona, ni ka ba pilisa, kono isi ka ndwa, ka mukwale kamba buta, ka lipizi kamba ka bapahami ba zona.”
8Cwale Gomeri ha s'a kwisize mwan'a hae wa musizana a itwala hape mi a pepa mwana yo muñwi wa mushimani. 9Muñ'a Bupilo a li ku Hosea, “U mu beye libizo la Lo-Ami, kakuli Maisilaele ha si batu ba ka, ni na, ha ni Mulimu wa bona.”
Ku kutiswa kwa Isilaele
10 #
Baro 9.26
Batu ba Isilaele ba ta ata inge mushabati wa liwate, kuli mane ha ba na ku konwa ku balwa kamba ku likanywa. Cwale Mulimu u li ku bona, “Ha mu batu ba ka,” kono nako ya taha h'a ta li ku bona, “Mu bana ba Mulimu ya pila.” 11Batu ba Juda ni ba Isilaele ba ka kopanywa hape. Ba ka iketela mueteleli a li muñwi ili bona, mi hape ba ta kutela ku ata ni ku pila hande mwa naha ya bona. Ku cwalo, lizazi la Jizireele li ta ba le lituna hahulu!
Lozi Interconfessional Bible, Catholic Edition © Bible Society of Zambia, 2009.