Hosea 13
13
Katulo ya mafelelezo ku Isilaele
1Kwakale, batu ba lusika lwa Eferaimi ha ba bulela, masika a mañwi a Isilaele n'a saba. N'a talimelanga feela ku ba Eferaimi. Kono batu ba fosa kabakala ku lapela Baale, mi kabakaleo ba ta shwa. 2Ba sa zwelapili ku eza libi, ka ku ikezeza maswaniso a sipi, ni ku a lapela, ili milimu ya silivela, ye ezizwe ka ngana ya batu ni ka mazoho a bona. Ku zwa fo, ba li, “Mu i ezeze litabelo!” Batu ba ta kona cwañi ku tubeta maswaniso ao, ili maswaniso a swana sina lipoho! 3Cwalehe, batu ba, ba ta feliswa inge mbundu ya kakusasa, sina puka ye fela i sa li kakusasana. Ba ka swana inge mawawai a omile a fefulwa ki moya fa sihoto, kamba musi o zwa fa mulilo.
4Muñ'a Bupilo u li, “Ki na Mulena Mulimu wa mina, ya mi zwisize mwa Egepita. Ha mu na Mulimu u sili, haisi na feela. Ki na feela mupilisi wa mina. 5#Mul 8.11-17 Ni mi babalezi mwa naha ya lihalaupa le li omile. 6Kono ha se mu keni mwa naha ye nde, mu fumani ze ne mu tokwa kamukana, mi cwale mu kalile ku ikuhumusa ni ku ni libala. 7Cwalehe, ni ta mi lwanisa inge tau. Ni ka mi bubamela mwa linzila sina ngwe. 8Ni ta mi lwanisa sina bele ye latehezwi ki bana ba yona, mi ni ta mi pazaula maswe. Ni ta mi cela hona fo sina tau, ni ku mi pazaula tuemba-emba inge sibatana.
9“Ni ta mi yundisa, mina batu ba Isilaele! Cwale mu ka tuswa ki mañi? 10#1 Sam 8.5-6 Mu kupile ku ba ni malena ni baeteleli. Kono ba ta kona cwañi ku pilisa sicaba? 11#1 Sam 10.17-24; 15.26 Ka bunyemi bwa ka ni mi file malena, mi ka buhali bwa ka ni mi amuhile bona.
12“Bufosi bwa Isilaele ni mulatu wa hae li ñozwi, mi ze ñozwi li bulukehile hande. 13Isilaele u na ni nako ya ku pila, kono u bukuba, mi h'a koni ku ikungela yona. U swana inge mbututu ya bata ku pepwa, kono u palela mwa mba! 14#1 Bakor 15.55 Ha ni na ku pilisa sicaba se kwa lifasi la ba ba shwile, kamba ku ba lamulela kwa maata a lifu. Lifu, tisa likozi za hao ze bulaya! Tisa manyando a hao, wena lifasi la ba ba shwile! Ha ni sa na mufelañeke kwa batu ba. 15Niha Isilaele a kateleha sina limela ze nca, ni ka tisa moya o cisa wa kwa upa, o zwa mwa lihalaupa. U ka t'o omisa mawelu-welu ni liliba za bona. U ka felisa linto kaufela ze na ni tuso. 16Samaria u swanezi ku utwiswa butuku kabakala ku ni fetuhela. Batu ba hae ba ta shwela mwa ndwa. Limbututu li ka tubakelwa fafasi, mi basali ba ba itwezi ba ta pazulwa limba sina lihwapa.”
Lozi Interconfessional Bible, Catholic Edition © Bible Society of Zambia, 2009.