Hosea 14
14
Kupo ya Hosea ku Isilaele
1Mu kutele ku Mulena Mulimu wa mina, mina batu ba Isilaele. Mu sitatalisizwe ni ku wiswa ki sibi sa mina. 2Mu kutele ku Muñ'a Bupilo, mi tapelo ye i be yona nubu ya mina ku yena, “U swalele libi za luna kamukana, mi u amuhele tapelo ya luna, mi lu ta ku lumbeka sina mo lu sepiselize. 3Asiria h'a koni ku lu pulusa ni kamuta, ni lipizi za ndwa ha li koni ku lu sileleza. Ha lu na ku bulela ni kamuta kwa milimu ya luna ya buhata kuli, ‘U Mulimu wa luna.’ Oho Muñ'a Bupilo, wena u bonisa musa ku ba ba si na ya ba tusa.”
Muñ'a Bupilo u sepisa Isilaele bupilo bo bunca
4Muñ'a Bupilo u li,
“Ni ta kutiseza batu ba ka ku na.
Ni ka ba lata ka pilu ya ka kaufela,
kakuli ha ni sa ba nyemela.
5Kwa batu ba Isilaele
ni ta ba sina pula mwa naha
ye omile.
Ba ka tubula sina lipalisa,
sina likota za Lebanoni.
6Ba ta pila ni ku hula sinca
mane ba be bunde sina likota
za olive.
Ba ta ba ni muunko o munde
sina sidare ya Lebanoni.
7Ba ta kutela hape ku pila
mwa silelezo ya ka.
Ba ka pila hande sina tima ya licalo,
ni ku ba ni miselo ye miñata
sina simu ya veine.
Ba ta tuma sina waine ya Lebanoni.
8Batu ba Isilaele
ha ba sa na ku sebeleza milimu
ya maswaniso hape.
Ni ta alaba litapelo za bona
mi ni ta ba babalela.
Ni ta ba muluti wa bona sina kota
ye tala kamita.
Ki na siliba sa limbuyoti za bona
kaufela.”
Mafelelezo
9Bao ba ba butali ba utwisise se si ñozwi mo, mi ba si buluke mwa lipilu za bona. Linzila za Muñ'a Bupilo li lukile, mi batu ba ba lukile ba pila ka zona, kono baezalibi ba sitatala ni ku wa kakuli ha ba li lateleli.
Lozi Interconfessional Bible, Catholic Edition © Bible Society of Zambia, 2009.