Hosea 12
12
1“Nto kamukana ye ezwa ki batu ba Isilaele ku kala kakusasana ku isa busihu ha i na tuso mi ya sinya. Buhata ni likezo za mifili-fili za ekezeha mwahal'a bona. Ba eza litumelelano ni Asiria mi ba lekisana ni Egepita.”
2Muñ'a Bupilo u na ni pilaelo kwa batu ba Juda, mi hape u ta utwisa Isilaele butuku kabakala likezo za batu ba hae. U ta ba kutiseza ka mo ba ezelize. 3#Sim 25.26 #Sim 32.24-26 Kukw'a bona Jakobo, n'a lwanile ni muhulwan'a hae Esau, ha ne ba sa li mwa mba ya m'a bona. Jakobo ha s'a hulile, a lwanisa Mulimu. 4#Sim 28.10-22 A lwanisa lingeloi mi a li tula. Jakobo a lila mi a kupa kuli a fuyaulwe. Mulimu a taha ku kukw'a luna, Jakobo, kwa Betele mi a bulela ni yena kwateñi. 5Yo n'e li yena Muñ'a Bupilo, Mulimu ya Maata Kaufela. La Muñ'a Bupilo ki libizo la kuli a lapelwe ka lona. 6Cwalehe, mina baikulu ba Jakobo, mu sepe Mulimu wa mina, mi mu kutele ku yena. Mu sepahale mi mu zamaye ka ku luka. Mu libelele ka buikokobezo kuli Mulimu wa mina a sebeze.
Manzwi a mañwi a katulo
7Muñ'a Bupilo u li, “Batu ba Isilaele ki bapumi sina Mukanana. Ba lata ku putelela baleki ka likala za buhata. 8Ba li, ‘Lu fumile. Lu ipumanezi bufumu, mi ha ku na ya ka kona ku lu tameleza kuli lu fumile ka bupumi. 9#Malivi 23.42-43 Kono na, Mulena wa mina ya mi zwisize mwa Egepita, ni ta mi kutiseza mwa maongo a matalo hape, mu pile sina mo ne mu inezi ha ni kile na taha ku mina mwa lihalaupa.
10“Ni bulezi ni bapolofita, ni ba file lipono ze ñata, mi ka bona ni file batu ba ka litemuso. 11Nihakulicwalo milimu ya buhata i sa lapelwa mwa Giliadi, mi ba ba i lapela ba ta shwa. Litabelo za lipoho ze sa eziwa mwa Giligali mi cwale tutala twa bona tu ta fetuha mabunda a macwe mwa masimu.”
12 #
Sim 29.1-20
Kukw'a luna, Jakobo, n'a sabezi kwa naha ya Arami, kw'a n'a il'o ba mulisana wa lingu za munna yo muñwi, kuli a fumane musali. 13#Mut 12.50-51 Muñ'a Bupilo a lumela mupolofita ku y'o lukulula batu ba Isilaele kwa butanga mwa Egepita, ni ku ba babalela. 14Batu ba Isilaele ba halifisize Muñ'a Bupilo hahulu. Ba lukela ku bulaiwa kabakala milatu ya bona. Muñ'a Bupilo u ta ba utwisa butuku kabakala ku mu shwaula.
Lozi Interconfessional Bible, Catholic Edition © Bible Society of Zambia, 2009.