Mubuleli 3
3
Nto ni nto i tomezwi nako
1Sifi ni sifi se si ezahala mwa lifasi si ezahala ka nako y'a ketile Mulimu.
2U toma nako ya ku pepa
ni nako ya ku shwa,
nako ya ku cala
ni nako ya ku kumula.
3U toma nako ya ku bulaya
ni nako ya ku folisa,
nako ya ku lutulula
ni nako ya ku yaha.
4U toma nako ya maswabi
ni nako ya tabo,
nako ya ku tubeta
ni nako ya ku bina.
5U toma nako ya ku latana
ni nako ya ku sa latana,
nako ya ku tubeta
ni nako ya ku sa tubeta.
6U toma nako ya ku fumana
ni nako ya ku latehelwa,
nako ya ku buluka
ni nako ya ku lataka.
7U toma nako ya ku pazula
ni nako ya ku luka,
nako ya ku kuza
ni nako ya ku bulela.
8U toma nako ya lilato
ni nako ya sitoyo,
nako ya ndwa
ni nako ya kozo.
9S'a kutelwa mutu ka musebezi wa hae kaufela ki sifi? 10Ni ziba butata bw'a lu file Mulimu. 11U tomezi lika kamukana nako ye lukela. U lu file takazo ya ku ziba ze sa taha, kono h'a lu fi kutwisiso ye tezi ya z'a eza. 12Cwale na lemuha kuli s'a lukela ku eza mutu ufi ni ufi ki ku taba, ni ku eza ze nde mw'a konela kaufela, h'a sa pila. 13Luna kamukana lu swanezi ku ca ni ku nwa, mi lu ikole ze lu belekezi, kakuli ki mpo y'a lu file Mulimu.
14Na ziba kuli lika kamukana z'a eza Mulimu li ta ina kuya kuile. Ha u koni ku ekeza kamba ku zwisa se siñwi kwateñi. Ni Mulimu u eza cwalo ili kuli batu ba mu sabe. 15Sifi ni sifi se si ezahala, kamba se si ta ezahala, ne si ezahalile kale. Mulimu u bonisa nto i liñwi ku ezahala hape ni hape.
Ku sa luka ko ku mwa lifasi
16Isiñi ze feela, kono ni se ni lemuhile kuli hape u kona ku fumana bumaswe mo ku lukela ku fumaneha bunde ni likatulo ze lukile. 17Na ipulelela mwa pilu, na li, “Mulimu u ta atula ba ba lukile ni ba ba maswe kamukwaoswana, kakuli lika kaufela, ni likezo kamukana li ta ezahala ka nako ya zona luli ye tomilwe.” 18Na feleleza ka ku hupula mwa pilu kuli Mulimu u lika batu, ili ku ba bonisa kuli ha ba fiti lifolofolo. 19Nihakulicwalo batu ni lifolofolo ba tahelwa ki bumai bo bu swana. Ba shwa mushwelo o swana. Mutu h'a fiti folofolo, kakuli bupilo ha bu talusi se siñwi kwa batu kamba lifolofolo. 20Bubeli bwa zona bu ya mwa sibaka si li siñwi ili mwa liluli. Bubeli bwa zona ki mona mo li zwa, mi li ta kutela mwateñi hamoho. 21Mutu u ka kona ku ziba cwañi luli kuli moya wa mutu u ya kwa lihalimu, wa folofolo ona u ya mwa mubu? 22Kiha ni se ni lemuha cwale kuli nto ye nde feela y'a ka eza mutu ki ku ikola z'a belekile. Ha ku na se siñwi hape s'a ka eza. Ha ku na mukwa w'a ka ziba ka ona se si ta ezahala ha s'a shwile.
Lozi Interconfessional Bible, Catholic Edition © Bible Society of Zambia, 2009.