Mubuleli 4
4
1Cwale na talima hape kwa bumaswe kaufela bo bu ezahala mwa lifasi mo. Ba ba nyandiswa ne ba lila, mi ne ku si na ya n'a ka ba tusa, kakuli ba ba ne ba ba nyandisa ne ba na ni maata. 2Ni ikumbuta ba ba shwile, ba ba se ba ile. Bao ba mbubo-mbubo ku fita ba ba sa pila. 3Kono ba ba mbubo-mbubo ku fita bao ba babeli, ki ba ba si ka pepwa, ili ba ba si ka bona kale bumaswe bo bu eziwa mwa lifasi mo.
4Hape ni se ni itutile se si sebelisa batu ka tata. Libaka kikuli ba bata ku ba ni bufumu bo buñata ku fita ba bañwi. Kono ha ku na tuso. Ku swana ni ku matisa moya. 5Ba bulela kuli mutu u ta ba sikuba h'a iputa mazoho, mi a ituhelela ku bulaiwa ki tala. 6Mwendi ku cwalo, kono bunde ki ku ba ni lika ze likani feela, mwa pilu u nz'o iketile, ku fita ku pateha hahulu ka mazoho a mabeli nako kaufela, u nz'o lika ku swala moya.
7Ni lemuhile nto ye ñwi hape mwa bupilo ye si na tuso. 8Ki yo mutu ya inzi a nosi. H'a na mwana, kamba munyani, kono u sebeza nako kaufela. H'a itumeli ka bufumu bw'a na ni bona. U belekela mañi ka tata cwalo, mane u itima tabo kaufela? Ze ha li na tuso ni zona, mi ki mukwa wa ku ipilisa maswe.
9Bubeli ki bo bunde ku fita buñwi, kakuli ba babeli ba ta sebeza hande hahulu. 10Haiba yo muñwi wa bona a wela fafasi, yo muñwi u ta mu yemisa. Kono haiba ki yena feela a nosi mi a wa, ku maswe hahulu kakuli ha ku na ya ta mu tusa. 11Haiba ku bata hahulu, batu ba babeli ba kona ku lobala hamoho ni ba futumalelwa, kono a li muñwi u ta futumalelwa cwañi? 12Banna ba babeli ba kona ku itamulela kwa ndwa ye ne ka fenya mutu a li muñwi. Muhala wa namunganga u tata kwa ku u puma.
13Haiba mulena wa supala, mi mwa bucembele bwa hae a ba sikuba se si sa lati ku elezwa, h'a swani ni mucaha wa mubotana ya na ni ngana. 14Mucaha u kona ku zwa mwa bunjebwe ni ku fetuha mulena wa naha ya habo, kamba ku zwa mwa tolongo ku y'o ina fa lubona. 15Na hupula ka batu ba bañata ba ba pila mwa lifasi mo, mi na lemuha kuli mwahal'a bona ku na ni mutangana ya ta ba mulena. 16Mwendi batu ba ba buswa ki mulena ha ba na ku ba ni palo, kono ha s'a ile, ha ku na ya ka itumela ka s'a ezize. Ha ku na tuso. Ku swana ni ku matisa moya.
Lozi Interconfessional Bible, Catholic Edition © Bible Society of Zambia, 2009.