2 Samuele 3
3
1Ndwa ya zwelapili mwahal'a limpi ze yemela lubasi lwa Saule ni Davida ni makuta a hae. Maata a Davida a ya a nz'a ekezeha, kono balwanisi ba hae, bona ne ba nze ba ya ba fokola.
Bana ba Davida
2Ba ba tatama, ki bona bana b'a n'a pepezi Davida kwa Heberoni. Wa pili n'e li Aminoni. M'ahe n'e li Akinoami, wa kwa Jizireele. 3Wa bubeli n'e li Kiliabi. M'ahe n'e li Abigaili, mbelwa wa Nabali wa kwa Karimele. Wa bulalu n'e li Abisalomi. M'ahe n'e li Maaka, mwan'a Talimai, mulena wa Geshuri. 4Wa bune n'e li Adonija. M'ahe n'e li Hagiti. Wa buketalizoho n'e li Shefatia. M'ahe n'e li Abitali. 5Wa busilela n'e li Itireami. M'ahe n'e li Egila, musal'a Davida. Bashimani bao kamukana ne ba pepezwi mwa Heberoni.
Abinere u kena ku ba Davida
6Ndwa ha ne i sa zwelapili mwahal'a masole ba Saule ni ba Davida, maata a Abinere a ekezeha ka nako ni nako ku ba ndu ya Saule.
7Zazi le liñwi Ishibosheti, mwan'a Saule, a zekisa Abinere ka ku fosa ni musali ya n'a li siendi sa Saule, ili yena Rizipa mwan'a Aya. 8Taba yeo ya nyemisa Abinere hahulu. Kih'a li, “Kikuli u hupula kuli ni sebeleza Juda, nji? Ku zwa kwa makalelo ni bile ya sepahala ku ndat'aho Saule, kwa banyani ba hae, ni kwa balikani ba hae cwalo, mi ni ku tusize kuli u si ke wa tulwa ki Davida. Kono kacenu u ni zekisa ka mulatu wa ku fosa ni musali! 9Mulimu a ni bulaye ha ni sa talelezi taba yeo, ili buitamo bw'a sepisize Mulimu ku fa Davida. 10#1 Sam 15.28 Muñ'a Bupilo u sepisize Davida kuli u ta amuha Saule ni baikulu ba hae mubuso, mi a eze Davida mulena wa Isilaele ni wa Juda, ku zwa kwa makalelo a naha ku y'o fita ko i felela.” 11Kabakala ku saba hahulu Abinere, Ishibosheti a palelwa ku bulela nihaili linzwi li li liñwi feela.
12Ka yona nako yeo Davida n'a li kwa Heberoni, mi Abinere a luma batu ku yena ku y'o li, “Ya ka busa naha ye ki mañi? Eza tumelelano ni na, mi ni ka ku tusa ku sikululela sicaba sa Isilaele kaufela ku wena.”
13Davida a li, “Ku lukile! Ni ta eza tumelelano ni wena feela ha u ka lumela ku tisa Mikali, mwan'a Saule wa musali ha u t'o bonana ni na.” 14#1 Sam 18.27 Cwale Davida a luma batu ku Ishibosheti ku y'o li, “Ni kutisize musal'a ka Mikali. Ni mu ondile ka ku bulaya Mafilisita ba mwanda kuli ni mu nyale.” 15Ishibosheti kiha s'a mu zwisa ku munn'a hae Palitiele, mwan'a Laishi. 16Palitiele a mu latelela nzila kamukana, mane a y'o fita kwa munzi wa Bahurimi, a nz'a lila. Cwale Abinere a li, “Kutela kwa hae,” mi a kuta.
17Abinere a ya kwa bahulu, mi a li ku bona, “I s'e li nako ye telele mu nze mu bata Davida kuli a be mulen'a mina. 18Cwale ye ki yona nako ya mina. Mu hupule kuli Muñ'a Bupilo n'a ize, ‘Ni ta itusisa mutang'a ka Davida ku lamulela batu ba sicaba sa ka sa Isilaele kwa Mafilisita ni kwa lila za bona ze ñwi kaufela.’ ” 19Abinere a bulela hape ni batu ba lusika lwa Benjamine, mi cwale a ya kwa Heberoni ku y'o zibisa Davida se ne ba lumezi ku eza batu ba lusika lwa Benjamine hamoho ni ba Isilaele cwalo.
20Abinere a taha ku Davida kwa Heberoni ni batu ba mashumi a mabeli, mi Davida a ba ezeza mukiti. 21Abinere a bulelela Davida, a li, “Ni ta ya cwale ni y'o sikululela sicaba kamukana sa Isilaele ku wena, mulen'a ka. Ba ta lumela kuli u be mulen'a bona. Cwale u ta fumana s'o n'o bata, mi u ta busa naha kaufela.” Davida a tiisa kuli u ta babalela Abinere, mi a mu fundula ka kozo.
Abinere wa bulaiwa
22Mwamulahonyana, Joabi ni manduna ba bañwi ba Davida ba fita ku zwa kwa lifunga, mi ba kuta ni tutu ye ñata. Nihakulicwalo Abinere n'a s'a zwile mwa Heberoni ku Davida, kakuli Davida n'a s'a mu funduzi ka sepiso ya kuli u ta mu sileleza. 23Joabi ni batu ba hae ha ba fita, a t'o bulelelwa kuli Abinere n'a tile ku Mulena Davida, mi n'a s'a mu funduzi ka sepiso ya silelezo ye tiile. 24Cwale Joabi a ya ku mulena, mi a li ku yena, “U ezizeñi? Abinere n'a tile ku wena, mi kikabakalañi ha u mu tuhezi a ikela feela cwalo? 25U tezi feela ku t'o ku puma, ni ku t'o bona mwa libaka kaufela mo u zamaya, ni z'o eza kamukana. Wa ziba cwalo!”
26Ha s'a zwile ku Davida, Joabi a luma batu ku y'o kutisa Abinere, mi ba y'o mu kutiseza kwa siliba sa Sira. Kono Davida n'a sa zibi ni se sikana ka taba yeo. 27Abinere h'a t'o fita mwa Heberoni, Joabi a mu isa kwatuko kwa munyako, a ikeza inge ya n'a bata ku mu bulelela likunutu, mi a mu taba mwa mba. Mi Abinere a shwa cwalo kakuli n'a bulaile Azaele, munyan'a Joabi. 28Davida h'a y'o utwa taba yeo, a li, “Muñ'a Bupilo wa ziba kuli na, ni ba ba ni latelela, ha lu na mulatu ni hanyinyani mwa pulao ya Abinere. 29Mulatu wa pulao yeo u be fahalimw'a Joabi ni lubasi lwa hae. Mwa masika a hae kaufela ku be ni mutu ya ka ba ni sooya kamba mbingwa, ya ka swanela feela ku eza misebezi ya sisali, ya ka bulaiwa mwa ndwa, kamba ya si ke a ba ni lico!” 30Cwale Joabi ni munyan'a hae Abishai ba bulaya Abinere kakuli n'a bulaile munyan'a bona Azaele mwa ndwa kwa Gibioni.
31Davida kiha s'a laela Joabi ni batu ba hae ku pazula liapalo za bona, ku apala masaka, ni ku silisa Abinere. Mi kwa mayumbelo, yena Mulena Davida kasibili n'a zamaya mwamulaho a situpu. 32Abinere a bulukwa kwa Heberoni, mi mulena a lila hahulu kwa mabita, mi batu kamukana ni bona ba lila. 33Davida a bulela manzwi a, mwa sililo sa Abinere, a li,
“Kiñi Abinere h'a shwile sina sikuba?
34Mazoho a hae n'a si ka tamiwa,
ni mahutu a hae n'a si ka hulehwa.
U shwile sina mutu ya bulailwe ki batu
ba ba maswe!”
Mi batu ba lila hape.
35Batu ba lika ku eleza Davida kuli a ce sico lizazi li si ka likela kale, kono a konka, a li, “Mulimu a ni bulaye haiba ni ka ca se siñwi lizazi li si ka likela kale!” 36Ba lemuha kezo yeo, mi ba taba. Kaniti s'a n'a eza mulena kamukana ne si tabisa batu. 37Batu ba Davida ni ba Isilaele kamukana ba utwisisa kuli mulena n'a siyo mwa mulelo wa pulao yeo ya Abinere. 38Mulena a li kwa manduna ba hae, “Ha mu zibi kuli kacenu le ku shwile mueteleli yo mutuna mwa Isilaele, nji? 39Niha ni li mulena ya ketilwe ki Mulimu, ni ikutwa ku fokola kacenu. Batu ba, bana ba Zeruya, ni ba bona kuli ki balwani hahulu! Muñ'a Bupilo a fe likebenga zeo mulatu o ba swanela!”
Lozi Interconfessional Bible, Catholic Edition © Bible Society of Zambia, 2009.