2 Samuele 4
4
Ishibosheti wa bulaiwa
1Ishibosheti, mwan'a Saule, h'a y'o utwa kuli Abinere u bulailwe mwa Heberoni, a saba, mi batu ba Isilaele kaufela ba komoka. 2Ishibosheti n'a na ni manduna ba babeli ba ba ne ba talima za lifunga, ili Baana ni Rekabi, bana ba Rimoni wa kwa Beeroti, wa lusika lwa Benjamine. Beeroti n'o balwa kuli u kwa neku la Benjamine. 3Batu ba ba ne ba yahile mo pili, ne ba sabezi kwa Gitaimi, ko ne ba il'o pila sina balicaba ku fitela nako ye.
4 #
2 Sam 9.3
Jonatani, mwan'a Saule, n'a na ni mwana ya n'a bizwa Mefibosheti. N'a na ni lilimo li ketalizoho ha ku t'o utwahala za mafu a Saule ni Jonatani kwa Jizireele. Muleli wa hae a mu nanula mi a saba, kono n'a akufile hahulu, mane a mu wisa, mi a ba sihole.
5Rekabi ni Baana ba funduka ku ya kwa ndu ya Ishibosheti, mi ba y'o fita musihali o mutuna, ha n'a sa pumuzi. 6Musali ya n'a inzi fa munyako n'a ozela ha n'a nz'a fefula buloto, mane a be a lobala. Cwale Rekabi ni Baana ba kena mwa ndu. 7Ha ba se ba li mwahali, ba ya kwa musiyo wa Ishibosheti kw'a n'a ipumulezi, mi ba mu bulaya. Cwale ba mu puma toho, ba i nga, mi ba zamaya busihu kaufela mwa Libala la Jordani. 8Ba y'o i fa Mulena Davida ya n'a li kwa Heberoni, mi ba li ku yena, “Ki ye toho ya Ishibosheti, mwan'a sila sa hao Saule, ya n'a batile ku ku bulaya. Kacenu, muñ'a ka, Muñ'a Bupilo u ku file kuli u kutiseze Saule ni baikulu ba hae bumaswe.”
9Davida a ba alaba, a li, “Ka Mulimu ya pila, ya ni lamulezi mwa likozi kaufela, ni li, 10#2 Sam 1.1-16 ‘Mulumiwa ya n'a kile a taha ku na kwa Zikilagi ku t'o ni bulelela ka za lifu la Saule, n'a hupula kuli u ni tiseza litaba ze nde. Na mu swala, mi na mu bulaya. Ki ona mupuzo o ni mu file ka litaba z'a n'a tisize! 11Ku ta ba cwañi, kwa batu ba ba maswe ba ba bulaya mutu ya lukile, a li mwa ndu ya hae mane a lobezi! Na konka kuli ni ta mi kutiseza bumaswe ni mina ka lifu la hae, ni mi zwise mwa lifasi!’ ” 12Davida a fa taelo, mi masole ba hae ba bulaya Rekabi ni Baana, ba ba puma mazoho ni mahutu, mi ba y'o a paheka fa likamba la lisa mwa Heberoni. Ba nga toho ya Ishibosheti, mi ba y'o i pumbeka mwa libita la Abinere hona mo mwa Heberoni.
Lozi Interconfessional Bible, Catholic Edition © Bible Society of Zambia, 2009.