2 Samuele 2
2
Davida u beiwa mulena wa Juda
1Mwamulaho a zeo, Davida a buza Muñ'a Bupilo, a li, “Kana ni ka y'o zamaisa o muñwi wa minzi ya Juda, na?”
Muñ'a Bupilo a alaba, a li, “Ee.”
Davida a buza, a li, “Ki ufi?”
Muñ'a Bupilo a li, “Heberoni.” 2#1 Sam 25.42-43 Davida kih'a ya kwa Heberoni ni basali ba hae ba babeli, bo Akinoami ya n'a zwa kwa Jizireele, ni Abigaili mbelwa wa Nabali, ya n'a zwa kwa Karimele. 3A ya ni batu ba hae hamoho ni mabasi a bona, mi ba y'o yaha mwa minzi ye bapani ni Heberoni. 4#1 Sam 31.11-13 Cwale batu ba Juda ba taha kwa Heberoni, mi ba toza Davida ni ku mu eza mulena wa Juda.
Davida a utwa kuli batu ba munzi wa Jabeshi, mwa Giliadi, ba bulukile Saule. 5Kih'a luma kwateñi batu ka manzwi a, a li, “Muñ'a Bupilo a mi fuyaule ha mu bonisize busepahali ka ku buluka mulen'a mina. 6Cwale Muñ'a Bupilo a mi eze cwalo ni mina ka sishemo ni lilato. Ni na, ni ta mi eza hande cwalo kabakala se mu ezize. 7Mu tiye mi mu be ni bundume! Saule mulen'a mina u shwile, mi batu ba Juda ba ketile na, ku ba mulen'a bona.”
8Mulauli wa mpi ya Saule, Abinere, mwan'a Nere, n'a tobile ni mwan'a Saule, yena Ishibosheti. Ba sila Jordani ku ya kwa Mahanaimi. 9Kwateñi a y'o mu eza mulena wa manaha a Giliadi, Asere, Jizireele, Eferaimi ni Benjamine, ili naha ya Isilaele kaufela. 10Ishibosheti n'a na ni lilimo ze mashumi a mane h'a beiwa mulena wa Isilaele, mi a busa lilimo ze peli.
Haili ba lusika lwa Juda bona, ba sepahala hahulu ku Davida. 11A ba busa lilimo ze supile ni likweli ze silezi mwa Heberoni.
Ndwa mwahal'a Isilaele ni Juda
12Abinere ni manduna ba Ishibosheti ba zwa mwa Mahanaimi ku ya kwa munzi wa Gibioni. 13Joabi, mwan'a Zeruya, ni manduna ba Davida ba y'o kopanela ni bona kwa Lisa la Gibioni. Kamukan'a bona ba ina fafasi, ba bañwi buse bo, ba bañwi buse bwani bwa lisa. 14Abinere a li ku Joabi, “Ku ketwe mitangana kafa ni kafa kuli ba t'o lwana fapil'a luna.”
Joabi a li, “Ku lukile.”
15Cwale batangana ba lishumi ka ba babeli ba ba yemela Ishibosheti ni lusika lwa Benjamine ba lwana ni batu ba Davida ba lishumi ka ba babeli. 16Yo muñwi ni yo muñwi a swala ya libani ni yena kwa toho, ba tabana ka mikwale mwa lubaci, mi kaufel'a bona ba wela fafasi, ba shwile. Ki ka lona libaka le, sibaka seo sa kwa Gibioni ha si bizwa Simu ya Mikwale.
17Cwale kwa ba ni ndwa ye sabisa, mi Abinere ni Maisilaele ba tulwa ki batu ba Davida. 18Bana ba Zeruya ba balalu ne ba li teñi fo, ili Joabi, Abishai ni Azaele. Azaele n'a na ni lubilo sina puti. 19A lelekisa Abinere, a mata a libile ku yena. 20Abinere a itemuna, mi a li, “Kanti ki wena Azaele?”
Yena a li, “Ee, ki na.”
21“U si ke wa ni lelekisa!” ku bulela Abinere. Hape a li, “Matisa yo muñwi wa masole, mi u nge s'a na ni sona.” Kono Azaele a mu tatama. 22Hape Abinere a li ku yena, “Tuhela ku ni matisa wena! Kiñi ha u bata kuli ni ku bulaye? Ni ka talimana cwañi ni muhulwan'a hao Joabi ha u s'o shwile?” 23Kono Azaele a tundamena. Cwalehe, Abinere a kutisa lilumo kwamulaho, a mu taba fa mba, mane la y'o zwela fa mukokoto. Azaele a wela fafasi a shwa, mi ufi ni ufi ya n'a fita fa sibaka seo f'a n'a shwezi n'a yema.
24Kono Joabi ni Abishai ba lelekisa Abinere, mi ha li y'o likela, ba fita fa Lilundu la Ama, kwa upa wa Giya ka nzila ye liba kwa lihalaupa la Gibioni. 25Batu ba lusika lwa Benjamine ba t'o kubukana hape ku Abinere, ba mu beya mwahali, ba yema fahalimw'a lilundu, mi ba itukiseza ku lwana. 26Abinere a huweleza Joabi, a li, “Kana lu ka lwana kuya kuile? Kana ha u boni kuli kwa mafelelezo ku ka taha toyano feela, nji? Lu bana ba Isilaele hamoho ni mina. U ta nga nako ye kuma kai u si ka hanisa batu ba hao ku lu lelekisa?”
27Joabi a alaba, a li, “Ni konka ka Mulimu ya pila kuli kambe n'o si ka bulela, batu ba ka ne ba ta mi lelekisa ku fitela kamuso kakusasa.” 28Joabi kiha s'a liza tolombita. Batu ba hae kamukana ba lisela ku lelekisa Maisilaele, mi ndwa ya fela.
29Abinere ni batu ba hae ba zamaya mwa Libala la Jordani busihu bo kaufela. Ba sila Nuka ya Jordani, mi ha ba se ba zamaile nako ya kakusasa kaufela, ba y'o fita kwa Mahanaimi musihali.
30Joabi ha s'a lisezi ku ba lelekisa, a kopanya batu ba hae kamukana, mi a bona kuli ba lishumi ka ba supile ni ba babeli ne ba sa bonwi, ku sa balwi Azaele. 31Batu ba Davida ne ba bulaile banna ba mianda ye milalu ka mashumi a silezi kwa batu ba Abinere, ku ba lusika lwa Benjamine. 32Joabi ni batu ba hae ba nga situpu sa Azaele, mi ba y'o si buluka mwa libita la ba lusika lwa habo bona kwa Betelehema. Cwale ba zamaya busihu kaufela, mi ba y'o fita kwa Heberoni ha ku patalala.
Lozi Interconfessional Bible, Catholic Edition © Bible Society of Zambia, 2009.