E kanto di tur kanto 5
5
Mucha hòmber
1Mi ta biniendo mi hardin,
serka bo, mi ruman dushi, mi prometida.
Ei mi ta piki mi mira i yerb'i hole,
mi ta kome mi miel di abeha ku panal ku tur,
ei mi ta bebe mi biña i lechi.
(Otronan)
Amigunan, kome,
amantenan, bebe,
bebe bira fuma!
Mucha muhé
2Mi tabata na soño,
pero mi kurason sí tabata lantá.
Ata mi ta tende un zonido,
ta mi amor ta bati porta!
E ta grita:
‘Habri, mi ruman, dushi di mi,
mi palomita, mi prenda presioso!
Mi kabes ta papa muhá di serena,
su gotanan ta kologá na mi kabei.’
3‘M'a kita paña kaba,’ m'a rospondé,
‘mi mester bolbe bistié?
M'a laba pia kaba,
mi mester bolbe susha nan?’
4Mi amor a hinka man den buraku dje porta,
mesora mi kurason a bira loko den mi kurpa.
5M'a bula lanta pa habri porta p'e.
Ora m'a kohe kònòpi dje rèndu tene,
mi mannan tabata yen di mira
i su leim tabata choria fo'i mi dedenan.
6M'a habri porta pa mi amor,
pero e no tabat'ei, el a somentá!
Mi kurason a bai mi plant'i pia,
ora el a disparsé.#5:6 ora…disparsé: tradukshon a base di un kambio chikitu di vokalnan; hebreo tin: ora el a papia
M'a busk'é sin por a hañ'é,
m'a yam'é, pero e no a rospondé.
7E guardianan riba ronda di vigilansia den stat
a haña mi i a kohe mi ku sla,
laga mi tur na sanger;
nan a ranka mi bata fo'i mi kurpa,
e guardianan ei riba muraya!
8O, damitanan di Herusalèm,
mi ke supliká boso ku insistensia:
si boso haña mi amor,
boso sa kiko boso mester bis'é?
Bis'é ku mi ta muriendo di amor!
(Mucha muhénan di stat)
9Mucha bunita,
akaso bo amor t'asina diferente,
mas spesial ku otro hòmber,
ku bo ta supliká nos esei ku tantu insistensia?
Mucha muhé
10Mi amor ta radiante, su koló ta di bròns,
por rekonos'é den dies mil hòmber.
11Su kabes ta di oro,
e oro di mas puru ku ta eksistí.
Su krùlnan parse tròsh'i dadel,
pretu manera stabachi.
12Su wowonan parse palomba na roi di awa,
bañá den lechi,
sintá na kantu.
13Su kachete ta kama di yerb'i bálsamo,
ku ta plama dushi aroma;#5:13 ku…aroma: segun vershonnan antiguo; hebreo tin: torennan di speserei
su lepnan ta leli,
ku ta choria zeta di mira.
14Su brasanan ta bara rondó di oro,
tur na piedra di turkesa;
su barika ta un tronkon di ivor,
kubrí ku safiro.
15Su pianan ta kolumnanan di alabaster,
ankrá riba basenan di oro puru;
su aspekto ta manera seru di Libanon,
eksklusivo manera palu di seder.
16Su boka ta yen di dulsura,
tur kos na su kurpa ta enkantador!
Sí, asina mi amor, mi amigu ta.
Awor boso sa, damitanan di Herusalèm!
Currently Selected:
E kanto di tur kanto 5: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
