Revelashon 20
20
E mil añanan
1E ora ei mi a mira un angel baha for di shelu ku e yabi di abismo i un kadena grandi den su man. 2El a kohe e dragon, e kolebra bieu,#Génesis 3:1 es desir diabel òf Satanas, tene, i a mar'é pa mil aña ku kadena. 3El a bent'é den abismo, sera e abismo i pone un seyo ariba, di manera ku e dragon no por a hinka e nashonnan mas den tentashon, promé ku e mil añanan pasa. Despues mester lag'é lòs pa poko tempu.
4E ora ei mi a mira trono i alma di e hendenan di kende a kita nan kabes afó, pasobra nan a tene na testimonio di Hesus i na palabra di Dios.#Revelashon 6:9 Nan a bai sinta riba trono i a haña outorisashon pa aktua komo hues.#Daniel 7:9,22,27; Mateo 19:28; Lukas 22:30 Esaki ta esnan ku no a adorá ni e bestia ni su imágen i ku no a haña e marka#Revelashon 13:16-17; 14:9 ni riba nan frenta ni riba nan man. Nan a bolbe biba i a goberná mil aña komo rei huntu ku Kristu. 5Esaki ta e promé resurekshon. E otro mortonan no a biba atrobe promé ku e mil añanan a pasa. 6Felis esnan ku ta pertenesé na Dios i ku tin parti den e promé resurekshon. E di dos morto no tin poder riba nan, pero nan lo ta saserdote#Revelashon 1:6; 5:10 di Dios i di Kristu i nan lo goberná komo rei mil aña kunÉ.
E viktoria riba Satanas
7Dia e mil añanan pasa, lo laga Satanas sali for di su prizòn. 8Lo e sali bai pa gaña e nashonnan ku ta biba na e kuater skinanan di mundu, esta Gog i Magog,#Ezekiel 38:2,9,15 i pa reuní nan pa guera. Nan ta mes numeroso ku e pipitanan di santu kantu di laman. 9Nan ta ranka sali den tur e hanchura di pais i sitia kampamentu di esnan ku ta pertenesé na Dios, e siudat ku E ta stima. Pero kandela lo baha for di shelu#20:9 shelu; otro manuskrito tin: shelu for di serka Dios kima nan kaba ku nan. 10Lo benta diabel, ku a gaña nan, den e lago di kandela i suafel, kaminda e bestia i e profeta falsu tambe ta. Lo torturá nan di dia i anochi, te den tur eternidat.
Huisio
11E ora ei mi a mira un trono grandi koló blanku i Esun ku tabata sintá riba dje. Tera i shelu a hui p'E i no a bolbe mira nan mas. 12Mi a mira e mortonan, grandi i chikitu, pará dilanti di e trono. A habri e bukinan. A habri un otro buki mas, e buki di bida.#Salmo 69:28; Revelashon 3:5 A husga e mortonan segun nan echonan, manera nan tabata deskribí den e bukinan.#Daniel 7:9-10 13Laman a duna e mortonan ku tabata den dje bèk, i morto i reino di morto a duna nan mortonan bèk, i a husga nan, kada un segun su echonan. 14E ora ei a benta morto i reino di morto den e lago di kandela. E lago di kandela ei ta e di dos morto.#Mateo 25:41; Revelashon 2:11; 21:8 15A benta tur esnan ku nan nòmber no tabata den e buki di bida, den e lago di kandela.
Currently Selected:
Revelashon 20: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
