Filipensenan 4
4
Ekshortashon
1T'asina, mi rumannan stimá, ku mi tin tantu gana di mira, ku ta mi goso i mi korona, t'asina mes boso mester para firme den Señor.
2Euodia i Síntigè, mi ta roga boso pa yega na un akuerdo ku otro manera ruman den Señor. 3Sí, abo tambe, kompañero berdadero#4:3 kompañero berdadero; otro posibel tradukshon: Sizuge fiel (si bo lesa e palabra na griego komo nòmber propio) den trabou, mi ta pidi bo pa yuda e muhénan akí. Pasobra nan a lucha huntu ku mi pa e bon notisia, huntu ku Klemente i mi otro kolaboradónan, ku tin nan nòmber skibí den e buki di bida.
4Keda semper kontentu den Señor! Mi ta ripití: Keda kontentu!#1 Tesalonisensenan 5:16 5Laga tur hende mira kon amabel boso ta. Señor ta serka!#Salmo 119:151 6No preokupá pa nada, sino den tur sirkunstansia presentá boso petishonnan na Dios den orashon i semper ku gradisimentu.#Kolosensenan 4:2-7; 1 Tesalonisensenan 5:17-18 7I e pas di Dios ku niun hende no por komprondé, lo warda boso kurason i mente den union ku Kristu-Hesus.
8Pa konkluí, rumannan: pensa riba tur loke ta berdadero i noble, hustu i puru, agradabel i honorabel. Si tin kiko ku ta, ku ta bon i ku ta digno di alabansa, pensa riba eseinan. 9Pone loke boso a siña, risibí, tende i mira di mi, den práktika. I Dios ku ta duna pas, lo ta huntu ku boso.
Gradisimentu pa yudansa di e filipensenan
10Komo un ku ta biba den union ku Señor, tabata un goso grandi pa mi ku porfin boso a mustra atenshon pa mi. No ku boso no tabata interesá den mi, ma boso no tabatin chèns di mustra esei. 11Mi no ta bisa asina, pasobra mi ta sinti falta di algu, ya ku den tur sirkunstansia, mi a siña biba ku loke mi tin. 12Mi sa kiko ke men biba pober i biba den abundansia. Den tur sirkunstansia i tur kaminda, mi a siña kiko ta nifiká kome barika yen òf pasa hamber; di biba den abundansia òf biba den nesesidat. 13Mi por enfrentá tur kos pa medio di Esun#4:13 Esun; otro manuskrito tin: Kristu ku ta duna mi forsa. 14Sinembargo boso a hasi bon di yuda mi den mi problema.
15Filipensenan, boso mes sa mashá bon ku tempu mi a kuminsá prediká e bon notisia, ora mi a bandoná provinsia di Masedonia, niun otro iglesia no a mustra nan gratitut materialmente. Ta boso so a yuda mi! 16Asta tempu ku mi tabata na Tesalónika,#Echonan 17:1 boso a yega di manda yudansa mas ku un bia, pa kubri mi nesesidatnan.#2 Korintionan 11:9 17No ku mi ke algu di boso, ma mi ke mira boso krédito serka Dios subi. 18Mi a risibí sufisiente pago, asta mas ku esei! Mi a haña tur loke mi mester, awor ku Epafrodito a trese boso regalonan pa mi. Nan ta manera un holó dushi, un sakrifisio aseptabel i plasentero na Dios.#Éksodo 29:18 19I mi Dios lo kumpli ku tur boso nesesidatnan for di su rikesa glorioso, pa medio di Kristu-Hesus. 20Na nos Dios i Tata sea gloria pa semper i semper! Amèn.
Saludo final
21Kumindá tur esnan ku ta pertenesé na Dios i ta uní ku Kristu-Hesus. E rumannan ku ta serka mi ta manda kumindamentu. 22Tur esnan ku ta pertenesé na Dios ta manda kumindamentu, spesialmente esnan ku ta den sirbishi di emperador.
23Grasia di Señor Hesu-Kristu keda ku boso.#4:23 Tin manuskrito ta añadí: Amèn.
Currently Selected:
Filipensenan 4: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013